Im Geburtshuus: Liebsti Lucille

[nocturne]

Liebsti Lucille

Das isch dGschicht vo dinere Geburt, de wohl Schönschti und intensivsti Moment im Läbe vo dim £Papi und mir.

Lut Arzt hättisch du sölle am 14. Juni 2009, an eusem erschte Hochziitstag, uf dWelt cho. Du hesch dich aber i mim Buuch so wohl gfühlt und immerno ummeturt.

Täg sind verbi gange und mir sind ziemlich ungeduldig worde. Mir sind jede Obe go spaziere und händ ghofft, dass du dich dadurch uf de Weg zu eus machsch, aber nüt isch gsi, du hesch dich nit drum kümmeret. Ich han so sehr wölle wüsse wie du ussehsch, schmöcksch und wie du dich afühlsch, han dich doch nur no wölle id Arme neh.
Am 23. Juni: Zobe hani immerwieder es Weheli gspührt, die händs sich aber agfühlt wie Senkwehene. Also bini wie immer totmüed ins Bett gheit und han probiert zschlofe, isch aber nur mit Unterbrüch gange wie i de Wuche vorher.
Am 24. Juni: Din Papi isch denn am vieri ufstande und go schaffe. Woner denn am zwei heicho isch han ich im verzellt das ich wieder emole Senkwehene han, die aber mittlerwile e chli regelmässiger chöme. Mir händ denn am Nomitag fersehglueget und eus nit wiiters um die Weheli kümmeret. Ich han zwar vermuetet dass du dich gli wirsch uf de weg mache aber meh au nit. Mir sind denn am frühe Obe nomol e Rundi go spaziere, um de Sportplatz und e chli dur de Wald. Diheime hämmer no fein gesse und denn wieder Fernseh glueget.

Churz vor de Nüne hani denn dim Papi gseit, er söll doch bitte ins Geburtshuus alüte. Ich han nämlich Wehe im 7 Minuteabstand gha. Din Papi het denn aglüte und mir händ uf die zehni chöne verbi goh. Amzehni simmer denn zOlte gsi und dHebamme het mich untersuecht. De Muettermund isch 1.5 cm offe gsi und de Gebärmuetterhals isch scho verstriche gsi, sie het denn au no wölle es CTG mache, aber uf das hesch du kei lust gha, du hesch dich nämmlich immerwieder versteckt. Dini Herztöne het sie denn aber scho chöne kontrolliere und die sind super gsi. Desther het denn gseit, dass mir ganz am Afang vo de Geburt sind und das es no e Zitli wird goh. Sie het mir denn no es paar Tropfe vomene Äthärische Öl uf e Binde do, damit de Muettermund weicher wird. Mir chöne entscheide, öpp mir im Geburtshuus wänd e chli schlofe oder lieber Hei gönd, woni no es Bad chönt neh, bevor mir no chli probiere zschlofe. Mir sind denn am Elfi Zobe wieder Hei gfahre, immer im Hinterchopf, dass du gli bi eus wirsch si. Am zwänzg ab Elfi simmer wieder Diheime gsi. Din Papi het mir Wasser id Badwanne laufe lo, wärend ich mich fürs Bad parat gmacht han, denn bini id Badwanne gstige, und din Papi hets sich nomol e Rundi ins Bett gleit. Nach zeh Minute hanis nümm agnehm gfunde i de Badwanne und han im Papi gruefe, dass er mir doch söll cho helfe usstige, er het mir denn schnell ghulfe und isch denn wieder ins Bett, was ich au versuecht han. Het aber nit so ganz wölle klappe bin immerwieder an Bode gknünlet und han mich mitem Oberkörper ufs Bett gleit, um so die immer schmerrzvollere Wehe zveratme.
Am 25. Juni: Ich han din Papi am halbi Eins gweckt und gseit er söll de Hebamme alüte ich fühli mich gar nümm wohl Diheime, da ich all zwei Minute e Wehe gha an und jedi Wehe ca. anderhalb Minute gange isch und scho sehr weh to het. Din Papi isch den im halbschlof e chli hässig gsi, will er nonig ganz realisiert het, dass du gli chunsch. Er het denn aglüte und mir händ mit de Hebamme am halbi zwei im Geburtshuus abgmacht. Din Papi und ich händ eus also wieder azoge, immer mit Wehene, han mir eifach immerwieder gseit dass ich das schaffe und das alles guet chunt, wenn wieder e Wehe cho isch hani lut müesse stöhne und ammigs sogar fasch e chli schreie. Wommer denn im Auto gsesse sind hani de Sitz ganz flach müesse mache, will ich eifach nit gw¨sst han wie sitze oder chneunle. Mir sind den losgfahre, din Papi het sich immer vorgstellt gha, wie das wird wenn du chunsch und er e chli schneller dörf fahre aber er isch no nie so langsam uf Olte gfahre wie in dere Nacht, will sobald er e chli schneller gsi isch, han ich wärend de Wehene jedi Delle im Bode viel stärcher gspührt.

Churz vor de viertel ab eins simmer acho und dHebamme isch punkt viertel ab auch acho, zum Glück, ich han nämlich sehr starchi Schmerze gha. Mir sind denn ine und händ ins Untersuechigszimmer chöne, wärend dEsther sGeburtszimmer e chli parat gmacht het, mit Cherze und no es paar andere Sache. Din Papi isch die ganz Ziit bi mir gsi und het mir ghulfe schnufe und het glueget dass ich mich nit verchrampfe, das het mir sehr viel Sicherheit geh. Ich han immer de Gedanke im Chopf gha, dass es no sehr lang wird goh und no viel schlimmer wird vo de Schmerze, so hani mi wenigsten se chli chöne ablenke.

Denn plötzlich hani zu de Hebamme gseit, dass ich ufs Wc muess sie het denn gseit, ich söll nur goh, es sig keis Problem, ich dörfi mich eifach nid verchrampfe. Din Papi het mir au ghulfe wieder ufzstoh, will ich plötzlich de Drang zum presse verspührt han und nur no vom Wc weg han wölle. Es het den plötzlich „Plopp“ gmacht in mir inne und isch füecht worde zwüsche mine Bei, han gmeint es isch dFruchtblose wo platzt isch, aber nei, es isch de letschti Teil vom Schlimpfropfe gsi wo abgange isch.

Also bini us de Hose use, will ich gwüsst han ich gangnümm ohni dich do use. Mir händ denn ins Geburtszimmer übere dörfe, dört bini denn uf allne vierne uf das Mätteli wo am Bode gsi isch gange und han dim Papi gseit er söll uf de Stuhel sitze wo dört gsi isch. Het er denn au gmacht, denn hani mich wieder bi ihm chöne alehne, zum verschnufe vo de Wehe, was sehr schwierig gsi isch, will ich jo han wölle presse. DHebamme het mich denn nomol kontrolliert und gseit, dass ich dörf presse, wenni de Drang verspühre. Ich han eigentlich immer wölle im Wasser gebäre, aber in dem moment hani eifach uf dem Mätteli wölle sitze und din Papi i mim Rugge als Stützi. Also het dHebamme sWasser wieder abgstellt und het mir wölle de Mayahocker bringe, hani aber au nit wölle, sie het denn gseit, dass ich wenigsten uf es Chüssi sitze muess, damit di nChopf überhaupt platz het, do hani denn halt jo gseit und din Papi het mir ghulfe mich e chli zlüpfe, damit sChüssi unter mir platz het. DHebamme isch sich denn no schnell go umzieh und ich han au wölle T-shirt wechsle, au do het mir din Papi wieder super ghulfe. Denn isch dini Geburtscherze azündet worde, damit du de Weg zu eus findisch. Ich han denn wärend de Wehe avo presse und han mol dörfe abelänge, isch ganz komisch gsi, will ich nit dis Chöpfli, sondern die no intakti Fruchtblose han dörfe berüere. Es isch ganz komisch gsi zum alänge wienen Wasserballon. Denn hani no zwei drei mol presst und dis Chöpfli isch scho halb dusse gsi, in dem Moment isch dFruchtblose platzt und du bisch ganz gebore. Du bisch mit de sogenante „Glückshuube“ gebore, was eus beidne die Geburt erliechteret het. Din Papi het den mis Shirt ufe ghebt und dEsther het dich mir grad uf de Buuch gleit. Es isch für mich de Schönsti Moment in mim Läbe gsi. Din Papi und ich sind so dankbar gsi, dini erste paar chline Motzer zghöre, du bisch schönste Wese woni je gseh han. Du bisch am 25. Juni 2009 am 01.48 Uhr uf die Welt cho und hesch eusi Herze im Sturm eroberet.

Mir zwei sind denn ufs Bett überezüglet, damit de Reste au no chunt. Denn isch die zweiti Hebamme cho, sie het dGeburt scho verpasst gha. Mir händ denn gwartet bis dNabelschnur uspulsiert gsi isch, denn het din Papi se Duregschnitte. Denn bisch du no gmesse worde und Kontrolliert öp alles in ordnig isch bi dir, was au de Fall gsi isch. Du bisch 48cm gross und 3100gr schwer gsi und hesch en Chopfumfang vo 34cm gha. Din Papi het dich denn azoge und ich bin no gneit worde. Denn hesch wieder zu wir dörfe cho und hesch grad chli hunger gha. Öppe am halbi vieri am Morge simmer denn in euses Zimmer züglet.

Du bisch min gröscht Schatz und sbeste wo din Papi und ich je zäme „gmacht“ händ. Denn au dGeburt hätt ich ohni din Papi nit so guet gmeisteret.

Ich lieb dich us tüfschtem Herze und danke dir defür, dass du mir sone schöni Geburt beschert hesch.

Dis Mami

[Trochantor]

en sehr schöne gebrutsbricht hesch gschriebe, isch richtig spannend gsi zum lese. da freut mi für di, dass du so en schöne geburt hesch dörfe erläbe.
wünsche eu 3 alles guet als familie

[sunlight]

hi ängeli

soo e schöni geburt händ ihr dörfe erläbe! und du hesch das eso wunderschön ufgschriebe. danke as du das met uns tuesch teile!

gniesse eure chlyne ängel us tiefstem härze! wünsch euch au wyterhin alles gueti.

sunlight

[nocturne]

Trochantor/sunlight: danke für euri Kompliment und die liebe Wünsch
Es het mir au e riese Freud gmacht dä Bricht zschribe, ich hoffe er git anderne Erstgebärende de Muet sich ganz uf sich selber und das "Ereignis" iizloh.

[Summer T]

schön gschribe!Wünsche oi alles gueti!

[nocturne]

SummerT: Danke viel mol






Liebsti Lucille

Nach dem du mir scho sone schöni Geburt ermöglicht hesch, bisch du au jetzt nach zwei Mönet wohl sliebst und zfridnigschte Baby woni je han dörfe erlebe.
Jede Tag mit dir isches Gschenk, du bisch sone Liebi, pflegeliechti.
Ich hätt mir niemals tröime loh, dass du so toll wirsch si.

Dis Mami

[nocturne]

Liebsti Lucille

Hüt an Wienachte bisch du genau sechs Mönet alt.
So schön wie dini Geburt gsi isch, isch au das Läbe mit dir.
Du bisch min gröscht Schatz, en Engel wo uf Erde dörf wandle.
Du machsch mi unendlich stolz, wie du sitzisch und alles neugierig betrachtisch, demit spielsch und lachsch.
Wenn ich gsehne wieviel Truur und Leid uf dere Welt passiert, wieviel Mensche ihri Chind müend lo zieh no bevor sie die Welt dörfe betrette, so vieli chlini Seele, für all die hani es Cherzli brenne.
Spöter wird ich dir erkläre für wer das Cherzli brennt und wems söll Trost und Chraft schicke.
Ich hoffe vo ganzem Herze dich no sehr lang uf dim Weg uf dere Welt dörfe zbegleite.

In unermesslicher Liebi

Dis Mami

[schlingel]

Viele Dank für die Traumgeburt. Äs isch eifach zu schön zum läse. Ich wünsche euch vo Härze alles Liebi und eifach nurs Bescht. Super Entscheidig mit äm Geburtshuus.

[Leona]

mega härzig gschriibä...

so schöön...

[nocturne]

Danke für dKompliment.

Ich wünsche euch vo Herze, alles Glück vo dere Welt mit eurne Chline Schätz

[*caro21*]

@aengeli
joehhh bin grad jetzt ueber Din Geburtsbricht gstolpered, wow, han grad muesse paar Traenli weg putze, haesch das so wunderschoen und ifuehlsam gschriebe, mega! Mich haets am ganze Koerper gfruehrt und froi mich unbekannterwiis sehr fuer Dich dass alles so guet gange isch, Dini Chli isch wuerklich zuckersuess!

Wiiter so.

Liebe Gruess

Caro

[nocturne]

Caro: danke für dini liebe Wort und dini liebe Wünsch
Ich wünsche dir, dass du gli es Menschli unterem Herze treisch und e schöni Geburt dörfsch erlebe.

Lg Ängeli85

[Oxalis]

u schön gschriebe. erinnert mi a mini geburte im geburtshuus. i 9 wuche, dörfed mir denn 3te empfange und i hoff, au wieder so schön

[nocturne]

Oxalis: schön hesch schöni Geburte dörfe erlebe.
Ich wünsche dir alles gueti für dini restlichi Schwangerschaft und e schöni Gebürt.

[pfusi08]

so ein schöner bericht. musste meine tränen trocknen....

[nocturne]

Liebsti Lucille

Es isch unglaublich wie schnell Ziit vergoht
Morn wirsch du scho zwei Johr alt und bisch siit fast 5 Monet e super grossi Schwöschter.
Du erfreusch eus jede Tag mit neue Sache und dim Verhalte

Du bisch euses erste Wunder und du wirsch so schnell gross.

Mir sind dankbar für jede Tag wo mir mit dir dörfet erlebe

Mir liebet dich Mama und Papa