Geburtsbericht Juna Eva, 16.11.2019

Teilt Eure Erfahrungen!

Moderator: Phönix

Antworten
JuliaJuna2019
Newbie
Beiträge: 7
Registriert: Mo 11. Jan 2021, 14:37
Geschlecht: weiblich

Geburtsbericht Juna Eva, 16.11.2019

Beitrag von JuliaJuna2019 »

Hallo Zäme

Mini Geburt isch, im Nochhinein, gar ned so schlächt gsi :D Aber vo Vore:

Mer hend en relativ langi Kinderwunschphase hinder eus, Diagnose wie Endometriose, schlächts Spermiogramm, etc. Nach 4 Johr und ere FG nach IUI isch euses Wunder im Nov 2019 ufd Wält cho.

Ich han scho immer en super FA gha wo mich au operiert het und mich au bim erhöhte Brustkräbsriko und denn bim KiWu betreut het. För mech isch emmer klar gsi, dass ich ide Hirslandenklink in Aarau entbinde wird. Bin det scho öfters operiert worde und min Arzt isch Belegarzt dete.

Ich han e Problemlosi SS gha, kei Beschwerde usser s normale halt, grad am Schluss, bis 4 Wuche vor ET hani gschaffet.

ET isch de 15.11.19 gsi, en Fritig. Am Zistig vorher hani die erste Wehe becho. Als erstgebärendi frogt mer sech jo emmer wies esch ond wartet druf...I fende mer chas weder met Krämpft no sus öppisem beschribe...

Also die Wehe send cho, alles guet. Zobe beni es Bett ond chuum beni heregläge hets agfange, allpot e wehe...Denn hani denkt, weni eh ned schlofe chan, ladi mer en App abe womer chan d Wehe stoppe. Send öppe 30 sekunde lang alli 5 Minute gsi. Irgendwie hani die Nacht denn umebrocht. Am Mittwoch am Morge hani es nasses Hösli gha ond denkt i heg Fruchtwasser verlore. Also aglüte ond am Nomitag id Klinik. De Fruchtwassertest isch negativ gsi, alles guet, kei Wehe 8)

Am Mittwoch Obe beni es Bett und wieder s gliche Speli wie en Tag voher. Wehe öppe all 4 Minute. Mer denkt jo emmer, wenn seli alüte oder go? Aber mer wott jo de Maa auned unnütig wecke, weler ja mues go schaffe...Anyway, au die Nacht esch ergendwie ome. Dure Tag hani kei Wehe gha und eifach denn gschlofe...

Am Donnstig Obe, 1 Tag vorem ET, wieder is Bett, wieder Wehe, all 3 Minute. Bis am 5i am Morge hani mi duregrunge denn hani aglüte ond mer send id Klinik. Naja denn womer acho send am 6si oder so wieder kei Wehe, CTG alles guet. Mi Maa seit zude Hebamme, er nähm mi nüm met hei :-) Wellmer a dem Tag eh en FA Termin gha hend, het sie aber gseit i sell hei, öppis ässe, chli schlofe ond ed Badwanne ond denn am Nomi zum Termin bim FA oder denn halt in Spital. Hämer also gmacht, am Nomitag zur Kontrolle bim FA, alles bestens kei Wehe, die chli het pfuset 8) Guet, simmer wieder hei. Denn Zobe wieder glich, Wehe all 2 Minute. Am 1 hani aglüte...D Hebamme het gseit mer selle cho aber ned pressiere. Also hani min Maa gweckt ond denn simmer los.

Am 2 simer im Spital acho, Wehe all Minute gfüehlt kei Pause...Ide Badwanne isches auned besser worde und nach 10 Minute beni de wieder use :lol:

Nach 6 Stund em Spital, also öppe am 8i am morge han i nüm chönne. Eigentli händ all gmeint gha es goht schnäll... Mi Maa het mi vorher scho fliessig massiert aber d Wehe send emmer stärker worde...Nachdem de Tropf mit Schmärzmittel nüd gnützt het, hend s mer denn um die 9i en PDA gleid. Die best Entscheidig gsi. I hätt chönne de Mount Everest bestiige 8)

Mi Maa isch völlig k.o. gsi ond het am 10ni gmeint, er gächi hei go chli schlofe...Min MuMu isch det 2cm off gsi. D Hebamme isch verwunderet gsi und het gmeint i dem Stadium gächmer eigentli nüm hei. Aber mer henden de logoh und gseit mer lüüte ah. Tja, 2h spöter, am 12i öppe hani gseit er mües weder cho, well de MuMu 10cm offe gsi isch. Er het grad welle ist Bett...Also ischer wieder cho und denn hämer denkt, gli isch sie do...Denkste...

D Hebamme het mim arme Arzt scho Znacht am 2 aglüte, dass i do ben. Aber denn om die 5i am Nomitag het sie gmeint sie lütet ah wells ned vorwärts goht. Er isch denn relativ schnell cho und het gmeint er warti no en Stund. Die chlii isch ned ganz i Geburtskanal grütscht, de Kopf heter gspürt aber sie isch wie festgsteckt. Er het denn gmeint mer sell mer Wehemittel gäh, damit sie es Becki drückt werd. Wenn das ned klapp sellmer mer Wehehemmer gäh, dass sie sech entspannt und alei aberütscht. Wenn beides net nützt denn blibi nur no Suugglogge oder KS...Ohje...

Naja es isch natürli so gsi, dass er cho isch am 6si zobe und alles unveränderet gsi esch. Nachdem er denn en OP Kleider weder cho isch, hämer gwüsst es goht los...Guet...Sugglogge...Kei Ahnig, nie ghört, velech au besser gsi :D

Zerst ischer mit some chline gäle Ding ume egge cho, en schibe miteme Pümpeli drah. Met dem heter es Vakuum welle herstelle zum ihre Kopf zlenke, det woner here mues...Het natürli ned klapped, das Ding esch emmer abgange. Ahjo, das het velech so 5cm Durchmässer gha. I mues dezue säge, dass das alles überlieferige vo mim Maa sind, nachde PDA hani wie so en Filmriss...Uf jede Fall escher denn miteme metallige cho, au en Schibe miteme Pümpeli drah. De hani denkt, ohje das wird nachher ned guet für mini Vagina usgoh...Aber jo...Leider het au die zwenig Vakuum gha und isch emmer weder ab...Denn verschwindet d Hebamme ond chont meteme Wägeli weder ine, mitere Glogge durf und eme Garteschluuch...Aso so hets för me usgeh haha. Es isch en hydraulischi Sugglogge gsi, met chli meh Power und 10m Durchmässer. Naaaja die het denn klappet und sie esch abegrütscht.

Am 16.11.2019 um 19.05 Uhr isch euses Wunschchind Juna Eva mit 3755g, 51cm und 37cm KU ufd Wölt cho.

Alles super, lediglich vode Glogge hetsie en minimali Wunde am Kopf gha, aber nüd verzoge oder so. Well sie aber Fruchtwasser gschlückt het was scho grüen gsi esch, hetmer sie emmer mol wede gholt zum Beobachte. Klar hani ide Presswehe em Arzt alli Schand gseit und nach KS gschraue und eifach min Rueh welle, au verständlich nach 17h im Spital und 4 Täg Vorwehe, aber alles in allem hani en super Geburt ha, ned zletzt dank mim Arzt wo so guet gschaffet het dassi nur en Mini Labie und Vagianlriss gha han. Ohni ihn hättis definitiv ned gschaffet und settemer nomol es Chend ha wird er mech weder entbinde und i werde au wieder id Hirslande goh, för mech die besti Klinik.

Benutzeravatar
swozzie99
Member
Beiträge: 173
Registriert: Fr 8. Mär 2019, 13:34
Geschlecht: weiblich

Re: Geburtsbericht Juna Eva, 16.11.2019

Beitrag von swozzie99 »

Herzliche Gratulation! Dein Bericht erinnert mich an unsere Geburt, welche jedoch am Schluss ein KS wurde. Wünsche euch alles Gute!!

Antworten