Härzlich Willkomme chliine Prinz! (lang und mundart)

[sunny85]

Liebä chliinä Prinz,
Wo dini gross Schwöschter ihre 1. Geburtstag gfiiret gha hed, esch für eus klar gsi, dass mir eus no es 3. Chind wünsched.
Am Fritig de 13. Februar 2015 han ich de scho en positive Schwangerschaftstest i de Händ gha. dFreud isch gross gsi, aber au vonere gwüsse Angscht überschattet worde, hani doch genau 4 Johr vorhär i de gliche Ziit positiv teschtet und es Oktoberli erwartet, woni de weder ha müessä go loh. Mis Gfühl isch im Grund gnoh sehr positiv gsi und glich, immer wieder hed sich die blödi Angscht inegschliche. Woni dich de i de 12. Woche sErschtä mol gspürt ha, isch mini Angscht verschwunde und hed ändlich de Freud so richtig Platz gmacht. I de 13. Woche hani de au eusi Hebamme kenneglehrt, die bescht Entscheidig woni ha chönne träffe. Ich ha mir für die Schwangerschaft ganz e persönlichi Betreuig gwünscht, wo mini Wünsch und Ängscht kennt. Nach minere Vorgschicht, vorzitigi Plazentaablösig be 35+3 und Not Kaiserschnitt unter Vollnarkose, hani mi eifach guet ufghobe wellä fühle. So isch das mit de Beleghebamme perfekt gsi.
Ziit esch vergange, be jedere Kontrolle isch me zfriede gsi mit dir und mir. Wo die 36. Woche do gsi isch, hani de doch immer weder chli Sorge gha, wenn sich öpis komisch oder wie bi dinere Schwöschter agfühlt hed. Aber au die Woche isch verbigange und mini Sorge hend sich ab det komplett verabschiedet.
I de 37. Woche heds de mol no fascht so usgseh, wie wenn du de plötzli doch no vor 37+0 usewetscht, mi Körper hed scho rächt gschaffet. Aber es hed sich de alles nomol beruhigt.
Din ET wär de 20.10.15 gsi. Sehr oft hani gsprüchlet, wenn i chönnt wähle, de nähmti de 15.10.15. Nie aber hätti dänkt, dass ich dich genau a däm Tag s’Erschtä mol wird i minä Arme ha….
Am Mittag vom 14.10.15 hani plötzlich gmerkt, wie sich i mir ine öpis löst und uselauft. Erschtä Gedanke: Fruchtblose?!? Und de isch mir dini Schwöschter dure Chopf gschosse, schnäll ufs WC und voller Angscht nach Bluet usschau ghalte…Nüd! Uff! Das wo usegloffe isch, isch eifach Schliim gsi, in riesä Mängene.
Wo de din Brueder und dini Schwöschter Mittagschlof gmacht hend, esch weder ganz vill total flüssige Schliim cho und mis Gfühl hed plötzli gfunde, lüt mol de Hebamme a. Do’s durs Telefon halt ned werkli gnau uszmache gsi isch, was es wirkli isch, isch sie verbiicho. De Fruchtwassertescht hed ergäh, dass es no kei Fruchtwasser isch, sondern wirkli eifach nur Schliim. Hm, guet, ich goh sicher no über de ET….Am Nomitag bini de mit de Chind i Garte, zum mich chli ablänke, ha das Gfühl vom ständig uselaufende Schliim grässlich gfunde.
Woni am Obig de ellei gsi be, di Papi isch no wäggange, hani eifach so im Gfühl gha, dass irgendöpis wird passiere. Spöter bini de näb dim Papi im Bett gläge und ha mi det so gar ned wohl gfühlt. Ha mi de verabschiedet und bi is Büro go ligge, wo mir vorem is Bett go no e wasserdichte Molton ufs Bett due händ. Ich be aso uf de Siite im Bett gläge und du hesch dich immer wieder mol bewegt. Und bi jederä Bewegig hani gspürt, wie Flüssigkeit uselauft. Hm, aso so fühlt sich doch kei Schliim a…Ich ha mi uf die ander Siite drüllt, wieder sglichä Spieli. So bini halt nomol ufs WC. Woni det min Oberkörper vürebogä ha, esch sWasser nur no so usegloffe. Ha de alles chli gnauer unter dLupe gnoh…Im WC schwimmet wiissi Stückli: Chässchmieri?!? Und uf de Binde au, wiissi Stückli und ganz fiini Höörli: Lanugobehoorig?!? Für mich esch de Fall klar gsi. Jetzt ischs definitiv dFruchtblose gsi. Ab det hani de au nümme welle is Bett go ligge und be ufs Sofa züglet. Det hani zerscht mol chli Färnseh glueget, nei, das isch doof. Es isch det übrigens öpis nach Mitternacht gsi. De hani e CD abgspielt und mich gfrogt: Und jetzt? Wehe keini in Sicht. Umelaufe oder Entspanne? Nach dem ich mich chli bewegt ha, hani mich für entspanne entschiede unds mir ufem Sofa bequem gmacht. Tatsächlich bini de immer wieder chli wägdöset. Gäg de Morge hed mi de doch mol so ganz vorsichtig e erschti Wehe usem Schlof loh ufschreckä. Juhu, es goht öpis! So werkli wirksam ischs de aber nonig gsi. Di Papi isch de am Morge am 6i go schaffe und ich ha dim Grosi aglüte und gfrogt, ob sie ächt ufd Ziit wo dini grosse Gschwüschterte ufstönd wür zu mir cho, do ich jo nid gwüsst ha, wie dSituation bis de usgseht. Am 8ti hani de de Hebamme aglüte und sie über alles informiert. Sie hed de gmeint dämfall chäm sie verbii. Dis Grosi esch de cho und hed diesi 2 usem Bett gnoh und agleit und de hämmer zäme öpis zmorge gässe. Ich ha relativ luschtlos amene Brötli umeknabberet, do ich im Hinterchopf gha han, dass ich be dim Brueder mis ganze Zmorge weder härgäh han, wo dGeburt losgange isch. Öpis nachem 9ni isch de dHebamme do gsi und hed wieder en Fruchtwassertescht gmacht, dasmol, ich hätt nüd anders erwartet, ischs wirkli Fruchtwasser gsi. De hed sie no es CTG gschriebe und du bisch so entspannt gsi, wie immer. Sie hed no dini Lag Kontrolliert und mir no Bluet abgnoh, wägem Entzündigswärt, do me jo nach Blosesprung nur ca. 24 h hed, bis dGeburt sett losgoh. Und sie hed gmeint, je nach däm wie de Wärt isch, hämmer de au eher chli Ziit zum no abwarte..Nochhär hämmer besproche wies sell wiitergoh,dHebamme hed gfunde, sie well mir nur ungärn en mindischtens 30 minütigi Autofahrt unter heftige Wehe zuemuete, darum gömmer de lieber chli früehzitig richtig Spital und defintiv vorem Fiirobigverkehr. Sie isch de no bis am Mittag be mir bliebe und hed sich de verabschiedet. Mir händ veribart, dass mir spötischtens am 4i abfahred, wenns vorhär meh wird mit de Wehe, de sölled mir eus mälde. Ich ha de din Papi ufs Zmittag hei bstellt und mir händ alli zäme Zmiitag gässe. Ich wieder sehr luschtlos, aber irgendöpis hani jo glich müesse zue mir näh. Näbebi hani müesse schluckwiis vo däm grusigä Wehätee trinke, je meh ich vo däm trunke ha, desto schwärer ischs mir gfalle überhaupt no ztrinke, es hed mi amig fascht gwürgt. Dini Gschwüschterte sind de is Bett füre Mittagschlof und din Papi, dis Grosi und ich sind am Tisch ghocket und händ käffelet, aso ich äbe mit Wehetee. Zwüsche düre bini no mini Täsche go fertig packe und ha alles parat gmacht. Din Papi hämmer grad dihei phaltet, hätt ned werkli was brocht, wenn er nomol is Büro wär go cherä. Wo mir aso do am Tisch ghocket send und fröhlich plauderet händ hani immer mol chli Wehe gha und dis Grosi hed gfunde, dass ich so entspannt do am Tisch chönn hocke…Tja und de isch plötzli e Wehe cho, wo mir de doch e Momänt dSproch verschlage hed und de hed dis Grosi gmeint:“Gönd ihr doch gschiider!“ Isch ihre de glaub doch ned so wohl gsi mit eus dihei. Und din Papi hed de au gfunde:“chum mir gönd doch glich scho!“ So hed er aso am halbi 3 de Hebamme aglüte und gseit, das mir lieber doch scho welled go. Mir hend abgmacht, dass mir eus am halbi 4i im Spital träffed. Ich ha ganz vorsorglich no en Plastiksack mit is Auto gnoh. Uf de Autobahn esch de das passiert, woni erwartet ha. Ich han min Plastiksack gfüllt und glichziitig no e Wehe gha, grässlich. Im Spital hed eus, eusi Hebamme scho erwartet und mir händ zäme sGebärzimmer bezoge. Ich ha zwar chli meh Wehe gha as dihei, aber so werkli passiert isch no nüd. Im Spital nomol es CTG gschriibe. Und de hämmer au no grad sZnacht müesse bstelle, mis händs aber no zrugg phalte. Zwüsched düre send mi no dChef- und dAssistänzärztin cho begrüesse, do die be de Geburt wärded debii si, uf Grund vo minere Vorgschicht. De händs irgendwas vo“ me chönnt de Wehetropf ahänke, damit mol öpis goht, so de Blosesprong scho länger här isch“, gschwaflet. Mir isch de Lade abe, ich wett doch uf kei Fall igriffe, wenns ned nötig isch. Sie send de weder gange und ich ha bi dim Papi über die 2 gwätteret. dHebamme hed de gmeint, wenn ich iverstande sig, de wür sie mir en Ilauf mache zum dWehe chli meh in Gang bringe,das isch am viertel vor 5i gsi. Ok, versuechet mirs. Di Papi hed immer ufd Uhr gluegt und hed voll im Griff gha, wies grad umd Wehe stoht und er hed de bald mol feschtgstellt, jetzt chömids aber flissiger und länger. Am halbi 6i ischs de richtig losgange und ich ha dWehe wirkli konzentriert müesse veratme. Din Papi hed i de Zwüscheziit sis zNacht becho und ich be ab und zue au e Gable devo go ifordere. dWehe hani zu dem Ziitpunkt sehr stark im Rügge gmerkt und be minere Hebamme es Wärmechüssi verlangt. So hani be jedere Wehe din Papi vom zNacht wäggruefe und mich a de Badwanne abgstützt, während er mir das warme Chüssi i Rügge drückt hed. Glichziitig ischs Wasser id Badwanne gloffe, do ich de Wunsch güsseret han, mol swarme Wasser zur Schmärzlinderig uszprobiere. Ca. am halbi 7ni bini de is Warme Wasser gstiege und das isch eifach herrlich gsi. Bi de Wehe bini über de Badwannerand ghanget und ha mich id Oberschänkel vo dim Papi krallt. Es isch rächt zügig vorwärtsgange und dWehe sind heftiger und heftiger worde und ich ha immer wieder gseit:“Ich mag nüm!“ eimol hani no dezuegfüegt:“ wie cha mer sich so öpis nur freiwillig atue!“ Und immer wieder isch mir dure Chopf, ich wett ändlich fertig si, damit i mis zNachtässe bechume. Ha immer wieder dä Täller vor mir gseh. Irgendwie eschs de es Ziitli nümm so rächt vorwärts gange und dHebamme hed gmeint, obs mir glich sigi mich mol für es Ziitli umzdreihe in Rückelag. Vo det ewäg ischs de weder wiiter gange, do ich aber teilwiis ned so rächt traut ha mol chli chräftiger zdrücke, hed mich dHebamme chli agleitet und de eschs de zackig vorwärts gange. Am 20.37 isch mini Hebamme chli hektisch worde und ich ha Angscht becho. Sie hed mir de im Nochhinein verzellt, dass du mit dem Chinni am Damm hangebliibe besch und din eint Arm um de Hals umegleit gha hesch. Darum hed sie be de letschte Wehe schnäll chli müesse mithälfe, zum dich befreie und so, dass dÄrztin nüd mitbechonnt, suscht hätted die mich anschinend sofort us de Badwanne zerrt. So bisch du am 15.10.15 am 20.37 is warme Wasser gebore worde, mit 3820g und 47cm. dHebamme hed dich no vo de Nabelschnuer befreit, wo du locker um de Hals gha hesch und de hani ich dich döffe usem Wasser fische und uf mini Bruscht leggä. Bim ufelüpfe hani grad gseh, dass du en chliine Bueb bisch! Das isch so en wunder,wunderschöne Moment gsi, dich so voller Chässchmieri uf mir druf zha und vo dir mit grosse Auge agluegt zwärde. Scho gli hesch du a de Bruscht afo suuge und wo dNabelschnuer uspulsiert gha hed, hed din Papi sie döffe duretrenne. Denn hani plötzli bluetet und me hed im Wasser ned rächt gseh was los isch. So hani de us de Badwanne use müesse. Mini Gebärmuetter hed sich leider ned rächt welle zämezieh und ich ha zimli vell Bluet verlore…De isch es rächt hektisch worde und me hed mir Weheverstärker gä, damit dGebärmuetter wieder ihri Arbeit ufnimmt, das isch extrem schmärzhaft gsi und ich ha nur no gschroue. So händs es de aber schnäll i Griff becho. Mi Chreislauf isch aber nochhär total im Chäller gsi, beni doch chorz devor no so „elegant“ us de Wanne gstiege. Eigentli händ mir nach de Geburt grad gli weder hei wellä, aber ich ha mich de entschiede 1 Nacht det zbliibe, do ich doch zemli schwach gsi be nach dem ganze. Am Afang hed mich das mit em Bluetverlust rächt möge, jetzt mit chli Abstand isch es extrem i Hintergrund grückt und es überwiegt dFreud, sGlück und de Stolz, e so e schöni Geburt erläbt zha und dass min Körper dasmol alles ganz ellei gmeisteret hed. Überglücklich simmer au, dass mir dich chliine Prinz gsund und Munter händ döffe i eusi Arme schliesse. Und sehr dankbar bini au für alles, wo eusi Hebamme für eus gmacht hed und wie sie sich für mich igsetzt hed.

[alexaS]

Etz lueg mal a, über wem siin Geburtsbricht ich da gad schtolpere So schön gschribe, Sunny! Und au da namal herzlichi Gratulation! Din positive, liebevolle Bricht schteigeret mini Vorfreud uf d Geburt gad namal!

[Snoopy2014]

so schön gschriebe. Es isch doch immer wieder erstunlich wie eifach ä Geburt chan funktioniere wenn alli Faktore positiv zämme spiele und so wenig wi möglich sich dri gmischt wird. Wünsch Euch ganz ä schöni kennelernzyt und alles Gueti für zuekunft mit dine 3Schätz.

[amin]

Sunny: sehr schön geschrieben! Ach...eine Geburt ist einfach etwas so wunderschönes...!! Musste gerade auch an meine denken