Silas Noah - en Kaiserschnitt mit Vollnarkose

[Tigerentli]

Mittwoch 20. Juni 2007
Dä Simon und ich händ uf diä 18.00 Uhr en Termin im Spital gha, wo mir diä ganzi Geburt resp. dä Kaiserschnitt nomol händ chönä durespreche. Zerscht isch mir recht vill Bluet gnoh worde und denn bini für e Stund as CTG ghängt wordä. Während derä Ziit isch en Anästhesist (dä wo d Narkose macht) zu üs cho und hät diä ganz Narkosegschicht mit üs aglueget! Er hät üs bestätiget, dass es vom Unfall her keis Problem sötti sii, dass mir dä Kaiserschnitt mit ere Teilnarkose (Spinalanästhesie) chönd machä. Nocher isch no dä Arzt verbi cho, wo mich am andere Morge tuet operiere! Das isch so en nette Maa gsi, dass er am Simon und mir würkli d Angscht vor dere Operation hät chönä neh! Mir sind mega begeisteret gsi vo ihm. Er hät denn au nomol en Ultraschall gmacht und glueget, ob dä Silas immer no glich liegt und wiäs ihm goht! Alles isch tiptop gsi!
Nochem Spital sind dä Simon und ich no es letschts Mol als Paar go Znacht essä. Mir händ üses mexikanische Esse richtig gnosse, obwohl d Gedanke natürlich scho ganz fescht bim morgige Tag gsi sind!
Natürlich händ mir idä Nacht au nid weiss gott wiä vill gschlofe, d Nervosität isch gstiege!

Dunschtig 21. Juni 2007
Uf diä 08.00 Uhr händ mir müesse im Spitol sii! Zerscht isch üs üsi Hebamme vorgstellt worde, au ganz e liebi Person wo sich sehr guet um üs beidi kümmeret hät! Zerscht bini wieder as CTG agschlosse worde und mir händ wieder am Silas sini Herztönli ghört! Gli druf abä händs mir e Infusion gsteckt und en Blasekatheter gleit (wääk)! Noch dene Strapaze isch mir s erschti Mol dä Kreislauf zämägheit und i han gmerkt dassi ohnmächtig werde! D Hebamme isch sofort mit Globuli und Rescuetröpfli cho, so dass min Kreislauf gli wieder do gsi isch! So händ mir gwartet, bis s Telefon vom Ops cho isch!

Ca. am 10.15 Uhr ischs denn losgangä: sie händ üs is Anästhesie-Zimmer brocht, wo dä Simon zerscht emol id OP-Kleider hät müesse! Zerscht händs versuecht mir d Spritzä im Liege z geh, noch dä erschte Versüech wos mir en elektrische Blitz s rechti Bei durab geh hät und dä Arzt irgendwiä nid diä richtig Stell gfunde hät, händ mir en Positionswechsel is Sitze gmacht! I weiss nümä, wiä villmol dä Arzt versuecht hät zum Sprütze, bi 10 Mol hani ufghört zum zähle. Es hät eifach irgendwiä nid welle klappe, er isch nid i mini Wirbel inächo! Je länger diä Prozedur gangä isch, desto meh hani s Vertraue i diä Teilnarkose und au in Arzt verlore! Am Simon isch denn dur mis Liede au no schlecht worde und er hät use müesse! S Schlimme am ganze sind nid d Schmerze vodä Sprütze gsi, sondern eifach das Missvertraue woni i dä Sach übercho han. Zudem sind so vill Mensche i dem chline Ruum gsi, wiä es Wespinest! Vor mir sind zwei in OP-Kleider kleideti Männer gsi, wo kei Wort mit mir gredet händ und mich nur abgstütz händ! Eifach e katastrophali Atmosphäre!
Schlussendlich hät denn dä Arzt gseit, dass er scho no länger chan versueche z steche, aber d Chance uf e Teilnarkose sehr chli isch! So hani denn gseit, dassi das nümä länger möchti duremache.
Glücklicherwiis hät dä Simon nomol churz zu mir chönä und mir händ üs wenigschtens no churz chönä verabschiede!
So isches wiitergangä in OPs, wo sie mir denn über d Infusion e Vollnarkose gsprützt händ. Vo döt weg weissi nüt meh!

ca. 12.00 Uhr
Langsam verwachi wiä useme Tüüfschlof und im erschte Moment gsprüi eifach en Schmerz une am Buuch! Dä Schmerz isch denn dä Uslöser gsi, dassi überhaupt verstande han, wo dassi bin und wasi do machä! Bim Auge uftue lueged mi zwei ganz chlini Äugli a und i gseh s erschti Mol üsen chline Silas Noah! Isch en mega Augeblick gsi! Ufwache und Dis Baby liegt uf dä Bruscht! Er isch so chli und herzig gsi, i hans chum chönä fasse! Irgendwenn hani mol dä Simon gfroget, was es überhaupt isch und ob alles guet gangä isch! Er hät mir denn gseit, dasses en Bueb isch und alles guet gloffe isch! Dä Silas isch gsund und es isch alles dra! Es hammer Gfühl!

Liebe Silas
Es isch nid dä Weg gsi, wo mir üs für Dich als Start is Lebe gwünscht händ, aber es isch für dä Moment diä richtig Lösig gsi, zum Dich uf dere Welt chöne in Empfang z neh! I weiss, dass dä Papi Dich ganz lieb begrüesst und sich diä Stund, wo Dis Mami no gschlofe hät, super um Dich kümmeret hät!
Mir händ Dich mega gern!

Dini Eltere Anja und Simon

[Ale]

schad, dass d'geburt andersch gsi isch ous du erwartet hesch drfür hesch's schönschte gschänk becho wo me sech ume cha vorschtöue! wünsche öich aues aues guete witterhin mit öichem chline schätzeli!!

[goldgüägi]

Hallo

mir läufts grad kalt den Rücken runter wenn ich deinen Geburtsbericht lese.

Mir ist etwas sehr ähnliches passiert wie dir

Auch ich habe meinen Sohn mit Kaiserschnitt und Vollnarkose geboren. Zwar hatte ich keinen Geplanten KS aber unter der Geburt gings plötzlich nicht mehr weiter.
Leider konnte bei mir auch keine PDA gestochen werden ( hatte auch X Versuche und kenne die Schmerzen im Bein nur zu gut )
Beim mir kamen dann noch die jeweils sehr heftigen Wehen dazu.

Drücke dich. Finde es gut, hast du dein Geburtserlebnis aufgeschrieben, denn genau so habe ich meine Geburt einigermassen verarbeiten können.

Vergessen werde ich es wohl nie und es treibt mir schon wieder Tränen in die Augen, wenn ich daran denke.

Aber jeder Augenblick mit Ramón entschädigt mich für die Schmerzen und macht die ganze Geschichte nur noch halb so traurig

[Chicola]

Hallo Tigerentli!

Mir isch au so gange wie Dir! De Chli hät Steislage gha und somit isch de KS plant gsi. Trotz 5 PDA-Versüech häts nöd wele klappe. Genauso wie bi Dir isch dänn alles sehr schnell gange und nachdem ich no churz han chöne mim Maa tschüss säge, bin ich scho weg gsi.

Han de Chli au erscht 3 Std. spöter gseh und dörfe hebe.

Jetzt sind scho über 3 Jahr vergange und wie Du seisch...es isch nöd en eifach Weg gsi, aber Hauptsach eusi Chind sind gsund!

C.