Am Ziischtig 10. Juli 2007 am Obe nach äm Yoga und nach dr Akupunktur öppe uf die 10i hani äs Zieh im Buuch gspüürt wo öppe au haubstung cho isch. Zerscht hani no gmeint i heigi eventuell Fruchtwasser verlore und ha mi im Internet no chlei schlau gmacht. So uf die haubi zweufi isch das zieh stercher worde und i ha nid rächt gwüsst öb das jetzt wehe si... wie ou äs isch jo d's erschte mou gsi. Mi Schatz isch uf au fäu mou is Bett go pfuuse - falls äs los geit dass är no chlei schloof cha vorhole
I ha denn mou is Spitau aglütte und gfrogt öb das Fruchtwasser chönnti gsi si. Si hei denn gmeint eher flüssige Schliim und i söu mou no chlei go ligge falls i das nid wott cho kontrolliere. Guet i däm fau bini mou ufs Sofa gläge. Äs isch äuä so haubi eis gsi. Woni gläge bi ischs mer aber nümm so wou gsi und i ha müesse ufsitze damit i ds zieh besser ushaute. Ha denn wöue zu mim Schatz is Bett go ligge - chuum bini gläge ischs scho wieder los gange mit zieh und i ha müesse ufstoh und ha mou usgschnuufet derzue... äs isch öppe au 5 Minute cho.
Mi Schatz het denn gseit dass mer mou d'Täsche packe und är sech no ä channe Kaffe useloht - falls äs ä längi nacht gitt im Spitau... Im Outo zum Spitau hani immer no au 5 Minute ä Wehe gha - i ha se eigentlich nume im Buuch gspüürt. Zum Glück hei mer nume 15 minute gha für ufe. Wo mer im Notfau si acho öppe am 01.20 Uhr hani nach ere Wehe plötzlich no ä zweuti und ä dritti gha wo grad aschliessend si cho.
D'Hebamme het mi när as CTG agschlosse und i bi fasch gstorbe im ligge wo d'wehe si cho - bi när ufghocket damit i se ha chönne veratme. Am chliine isch äs guet gange luut de Härztönli. I ha när wöue wüsse wie wiit dr Muetermund offe isch und d'Hebamme hets kontrolliert und gseit 4 cm!!! Und das nach so churzer Ziit. Si het när gseit dass si mer mou äs Zimmer parat machi und öb i gärn id Badwanne möchti.
Ja sofort - auso si mer übere is Gebährzimmer und si het d's wasser afo iloh. I dere Ziit hani mini Wehe probiert d's verschnuufe. Woni när ändlich ha is Wasser chönne (das isch öppe am 2.15 Uhr gsi) hani mi grad chönne entspanne - aber nid lang - d'Wehe hei mer chuum ziit gloh mi chönne d's erhole. Äs het wieder ä starchi und när no 1-2 schwecheri Wehe gä. Uf äm Rügge ir Wanne hanis nid usghaute und i bi immer uf d'chnöi ha mi a de Griffe gha und mis Becki gäge d'Wanne hingere drückt. So hani dr Schmärz besser ertreit. Mi Schatz het mer immer äs chüels Tüechli für d'Stirne abzchüele gmacht und mer d's trinke gä. Scho elei sini Awäseheit het mer immäns goufe die Schmärze düre d'stoh! D' Wehe si so schnäu hingere nang cho dass i praktisch kei erholig gha ha.
Schnuufe elei het nümme broocht und i ha denn wie im Yoga uf A, O, U, M usgschnuufet. So hani viu lenger chönne usschnuufe und d'Wehe chönne überbrücke. Irgendeinisch si d'schmärze so heftig worde dass i nume no gschroue ha gäge schluss vom usschnuufe und i ha mim Schatz d's Zeiche gä dass är dr Hebamme söu rüefe. Si hei so viu d's tüe gha dass mer fasch die ganz ziit elei gsi si.
Wo d'Hebamme cho isch het si gluegt wie wiit offe dr Muetermund isch und anschiinend isch är ganz offe gsi - si het nämlich d'Fruchtblase ufgmacht. Dr Schmärz isch grad agnähmer worde und isch jetzt meh im Becki gsi und nümme uf äm Buuch und im Rügge. Sie het gseit i söui jetzt mini Chraft nümme obe use loh sondern gäge abe und drücke derzue... OK - komisch wenn me plötzlich cha presse obwou i gar nid ä richtige Pressdrang gha ha. Das isch öppe am 4.10 Uhr gsi. Si het no gseit dass d's Fruchtwasser grüenlich isch gsi und das äs jetzt schnäu müessi go.
De hani aues derfür do damit dr Chlii cha uf d'Wäut cho. I gloube bir 4. oder 5. Presswehe hei si gseit do si jo Hoor
Und mi Schatz het gseit dass mer ne grad zum Coiffeur muess amäude 
I bi so inere Trance gsi vor luuter Adrenalin und Endorphine dass i das gar nid richtig kappiert ha. D'Hebamme het no gseit i söui abe länge (si het mi äuä wöue motiviere aber i ha mi nume uf d'Wehe konzentriert. Äs het ziemlich brönnt und zoge im Scheideigang und d's haube Chöpfli isch scho devore gsi. De isch aber die Wehe fertig gsi und i ha müesse mit däm Druck warte bis die nöchschti cho isch um üse Schatz ändlech ganz uf d'Wäut d's presse - am 11. Juli um 4.40 Uhr.I has gar nid richtig kapiert dass üse chlii Sohnemann dr PHELAN RAPHAEL jetzt do isch - Si hei ne ziemlich schnäu abgnablet (wahrschinlech wägem grüenliche Fruchtwasser) und d'r Papi het wüus so schnäu gange isch gar nid d'ziit gha d's überlege und dini Nabuschnuer düre gschnitte.
Si hei när d's Wasser usegloh und d'Plazenta isch ziemlich glii grad use cho mit ere Wehe. Mi Schatz het zwar gseit si heige mer rächt dr Buuch usdrückt - vo däm weiss i gar nüt meh. Dass i rächt Bluet verlüüre hani no gseh und i ha afo zittere - i ha mini Bei chuum meh chönne kontrolliere.
D'Hebamme het mir us dr Wanne ghoufe und hei mi ufs Gebährbett begleitet. Dört hani üse Schatz uf d'Bruscht bercho - i ha gar kei Träne gha - wahrschinlech wöu i immer i däm Hormonruusch bi gsi. Nachämne Ziitli het är scho dr Chopf glüpft und isch ufe chräblet zur Bruscht. Denn het är ou grad afo suuge
Mi Schatz isch näbe mir gsi und mir hei üses chliine wunder beguetachtet.I dere Ziit hei si mi no afo näie, da i ä Dammriss und teufi Scheideriss gha ha und drum ou gnue Bluet verlore ha. Leider het die Ärztin wo denn dört isch gsi nid grad gueti Arbeit gleischtet. Si het sech gstoche während äm Näie und het so viu Fademateriau bruucht dass mini Wunde gar nid richtig het chönne heile. D'Nachsorgehebamme het mir när dehei viu überflüssigs Fademateriau usegschnitte und het mir Spüelige und Sitzbäder mit Meersalz verordnet. Das ganze het nid grad zu mire psychische Stabilität biitreit. Jetzt hets nid ganz chönne zämäheile und mir müesse ir Nachkontrolle de luege was mer wei mache.
Zudäm hei si am zweute Tag üsem chlii Schatz ä Verdacht uf Trisomie 21 güsseret und zwar nume uf grund vo dr Lidstellig vo de Ouge. Mi Schatz isch grad ziemlich hässig worde und i bi sowieso nid guet zwäg gsi wöu si mir denn no äs zweuts mou hei wöue bluet näh (Wäge dr Ärztin wo sech gstoche het) wöu si die erschti Bluetprob verlore hei!!!!!
I ha Rollvene und äs isch immer ä Horror Bluet d's näh bi mir. Im Wuchebettbricht isch när sogar no öpis vo adütteter Vierfingerfurche gstange... das isch eifach d's viu gsi für mis eh scho dünnhütige Närvekostüüm.Dehei isch mer dä Verdacht nümm us äm Chopf gange und i ha ou viu grännet - nid nume wägem BabyBlues ou wäge dr Sorg um üse chlii Schatz. Do het d'Hebamme ä ultraschnälle Termin bimene Kinderarzt organisiert damits mir besser geit und i gwüssheit ha. Dr Kinderarzt het üse chlii Phelan vo A-Z düre d'checket und het weder ä Verdacht no schüsch öpis chönne bestätige wo die Ärztin vom Spital het use gloh. So öpis vo unsensibel und unprofessionel wie si üs das denn mitteilt het und üs het im lääre loh hocke... das chani hütt no nid begriife. Jetzt wei mer de luege was dr regulär Kontrolltermin bim Kinderarzt ergitt wenn är 4 Wuche aut isch.
Üse chlii Schatz dr Phelan entwicklet sech prächtig und bringt üs viu Freud ou wenn är nid immer wie äs Ängeli schlooft und lächlet
Ädu mi lieb Schatz - i wüsst nid wie i ohni Di die erschti strängi und ungwüssi Ziit hätti söue überstoh. Du hesch mir so viu Chraft gä, bir Geburt und nächänä dehei und mir viu abgnoh - grad denn wos mir gar nid guet gange isch. Du bisch mi Sunne, mi Chraft und mis Läbeselixier - i cha nümm ohni Di läbe! I liebe Di über aues und freue mi mit Dir und üsem Sohnemann d's Läbe d's teile und d's entdecke.
