jetzt holi das noche wasi för diini beide chlinere Gschwüsteti scho lang gmacht ha!
Merke wie langsam d'Erinnerige weder ufe chömed. Wie jedes Jahr. Findi no spannend. Den das hani nome bi dir! Bi desne zwöi dünkts mi ned so extrem. Aber bi dir erinnere ich mich jedes Jahr emmer weder zrugg was vo x Jahre a dem Ziitpunkt grad abglaufe isch... 
Eis chani dir ziemlich sicher säge!
Vor genau 5 Johr sind de Papi ond ich i üsere Stube gsässe ond händ Teeli gschlürft! Ond Giotto gässe... njam... de Papi häd mich die ganz Ziit mit em Sprüchli "Und zu Teeeeeeeeeee" gnervt! 
Ergendwenn isch den üses Plauderstündli z'end gsi ond ich bin goh Zähndputze... i dem Moment mach ich nomal halt zo dim Papi ond säge, weisch was schön isch? I 2 Woche chönd mer vellecht scho üse Chenderwage bruche!!!
De Termin hani mit dir am 20.02.03 gha!Aber jetzte zo dim Bricht. Won ich öbrigens mal im 03 agfange gha han...
10. Februar 2003
23.00 Uhr oops im Mami isch glaubs grad d'Fruchtblose plazt! De Papi lihdd scho em Bett ond nimmt das ganze ned ganz so ernscht!
Ech glaube er häd ernschthaft s'Gfühl das esch än Scherz! Denn es esch ja nonig mal 2 Stund här das mer än gmüetliche Obe zäme gha händ ond gscherzt händ das mir i 2 Woche evt. sogar scho met em Kinderwage dörfed ome laufe...
Anschinend häsch du das sehr wörtlich gnoh... ond s'Gfühl gha du wellisch dich jetzt ofe Wäg mache! Aber zrugg zom aktuelle Gscheh... Do mech di Papi ned wirklich ernscht gnoh häd ond bereits wiiter pfuused häd, hani dänkt ich lüüte halt selber im Spital a!
d'Hebamme häd den gmeint mer seled das is Spital goh zeige mössed aber öberhaupt ned pressiere... Mer händ den abgmacht das mir ca am 2 wärded im Spital sy. Chorz druf abe beni zo dim Papi ond han ihm die Botschaft verkünded. Au döte häd er no ganz easy s'Gfühl gha er "chrösi" no äs Momäntli ond stöichi den uf!
Wie chan dä Mönsch nome a schlofe dänke??? Ich bin wie wild dür d'Wohnig ghezt ond han s'Gfühl gha jetzt mössi eifach no packe!! Wo di Papi gmerkt häd das ich miis "Köfferli" packe isch ehm glaub wirklich erscht bewusst worde WAS das passiert... den ofsmal isch er wach im Bett gläge ond häd mich ganz ungläubig aglueged... Er esch den trotzdem no äs bitzeli ligge blobe ond ich han dinere Tante aglüte wo zo dere Zit grad no gschaffed häd!
Wärend dere ganz Ziit hani sicher x Tüechli met Fruchtwasser besusslet... es häd nome no gutsched und gutsched wie verrockt! Ca am halbi zwöi isch es den losgange zom richtig Olte z'fahre. Em Auto send mer beid uh nervös gsi ond händs chum chönne glaube. Ich han so öberhaupt ned demit grächnet das es gliner chönt los goh!
Jetzt händ mer üs 9 Mönet of dich gfreut. Bereits mit dinere Akündigung häsch du üses Läbe ofe Chopf gstellt. 9 Mönet händ mer üs of diini Akunft vorbereited. 9 Mönet händ mer üs probiert äs Läbe mit dir vorzstelle... ond jetzt? Jetzt sells ofsmal so wiit sy?
Zom üsi Nervosität chli z'mindere... händ de Papi ond ich d'Fenster im Auto abegloh ond send z'Nacht am halbi 2 dür Basel düre gfahre ond händ ganz luut zur Musig mitgsunge!
Em Spital send mer dene vo 2 Hebammene empfange worde. Die hend den us erscht eifach mal welle wüsse öbs wirklich Fruchtwasser isch wo do uslauft!
Sie händ den ziemlich schnell gmerkt dass das nome chan Fruchtwasser sy! Nochher send mer den is Vorbereitigszimmer brocht worde wo sie üs beid Untersuecht händ ond en Anamnese gmacht händ. Diini Härztöndli send super gsi ond au mir isch es no super guet gange...
Wahrschinlich fascht z'guet! Obwohl ich eigentlich sett em losfahre zemlich regelmässigi Wehe gha han. Wo ich zwar han mösse verathme aber ech guet ha möge verlide!De Muettermund isch scho bi 2.5 cm gsi ond de Buchumfang häd genau 100cm gmässe. Dozumal isch mer das riesig vorcho...
Noch 2 wiitere Chend weissi höt dass das "nüd" gsi isch... Aber das sell ja jetzt au ned s'Thema sy! d'Hebamme händ üs den vor d'Wahl gstellt nomal hei z'goh... oder z'blibe. Do mer ned händ welle zrugg of Basel fahre zom grad wieder z'umkehre. Geschweige den bim Arbetsverkehr mösse do häre z'fahre. d'Hebamme händ das us guet befunde ond mer händ dörfe im Vorbereitigsrüümli blibe. Noch äs paar letschte Föteli vom Buuch mit dir Inside häd den de Papi chli probiert z'chröse.
De Papi häd än bequemi Liege gha... ond ich, ich bin chli ome glaufe...well ich onterkeine omständ han chönne pfuuse! Mir händ die Wehe vell z'fescht z'schaffe gmacht!
Ofsmal gäge Morge händ den allerdings d'Wehe ufghört... ond d'Hebamme händ met em Dokter Scott beschlosse mit Zäpfli izleite! Tja nochereStond händ die den zom "Glück" agfange wirke!
Naja under wirke verstohni das es Schlag uf Schlag häd afoh HÖLLISCH Weh mache... aber nochere chorze Schockpause hani den de Rank gfunde ond die ziemlich guet gschaffed z'verschnufe!
Zom d'Wehe no meh azrege send mer öfters use goh spaziere! Was ziemlich eklig gsi isch well ich nämlich vor luuter "stress" miini Winterjacke vergässe han!!! Super!
Äs isch ISIG Chalt gsi verosse... 
Gäge am Obe am 5i isch den no schnell diini Tante verbi cho wo emmer no gschaffed häd. De Papi esch den schnell met ehre mit chli früschi Loft goh schnappe. s'Mami isch ehrlich gseid i dem Moment froh gsi den vor luuter Schmärze häd sie sich nöme of die zwöi chönne konzentriere ond es isch ihre eifach z'vell los gsi!
Wo de Papi zrugg cho isch bin ich bereits ir Entspannigswanne gläge! Das häd uh cheibe guet do! Ech han d'Wehe guet möge verschnufe ond bin wirklich entspannt gsi. Allerdings häd das nome chorz aghebed... d'Wehe händ mi emmer meh afoh öberrolle ond öberrolle... ich han gmerkt wie ich eifach kei Chraft meh han... aber han mer immer dänkt das äs öpis bringt ond so ischs mer guet gange.
d'Hebamme häd den leider ofsmal s'Gfühl gha ich selli us dere Badwanne use cho... was mi so öpis vo ufgregt häd!!!
SIE häd s'Gfühl gha mer tüegi laufe sicher guet! Also send mer us dr Wanne... im Schnäcketempo! Wehe verathme. Ufstah. Wehe verathme. Eis Bei ofe Wannerand. Wehe verarhme. s'Bei drüber ie s'andere Bei lüpfe. Wehe verathme. s'andere Bei doch no öber d'Wanne ieneh. Wehe verathme. Ond so wiiter ond so fort. Bis mer bim Bett gsi sind. Än Wäg vo ca 2 Meter! Ofem Bett isch mer gar ned wohl gsi... ich han ned welle ligge ond i 4 Füessler scho gar ned... ich han nöme möge ond han nome no id Wanne welle! Aber die Madame häd s'Gfühl gha mer selled jetzte laufe... 
Drum häd sie Vorgschlage i ander Gebärsaal übere z'goh wo d'Badwanne drine sigi. Also send mer die goh aluege... ich han sie agluegt dri gluegt ond i dem Moment hani eifach dänkt... (sorry dä usdruck) läck mer am arsch ich wott jetzt än PDA! Ich han nöme möge... mer isch schlächt gsi ond so oder so hani s'Gfühl gha ich chöingi nöme of mi Körper lose! d'Hebamme häd mer d'PDA welle usrede ond s'Gfühl gha mer laufed no chli ome!
Sie häds wohl nie gschnalled! Of all Fäll händ mer dusse ofem Gang! Esch öbrigens ganz toll met emne Spitalhömli wo hinde offe isch ond Netzonterhösli ofem Spitalgang ome z'laufe. Mi Arzt atroffe. De häd mi gseh & ich han gseid PDA ond scho isch er mi Fründ gsi... Er häd nämlich eifach gseid er lüüti grad am Anästesist alüte! Bin ich froh gsi!!! Leider isch äs dene no äs Ziitli gange bi de cho isch... ich han mi irgendwie düre gmogled! Ond gschnuffed wie ich han möge. Am 20.00 am Obe hani den das ganze prozedere gha met zämechruggle ofem Bett ond mir d'PDA loh steche loh. Cheibe schwierig wenn mer ei Wehe noch dr andere häd. Die ganz Ziit wo ich so do gläge gsi bin hani immer Angst gha ich chöingi ned säge wenn än Wehe chond.
Ergendwie händ mers den gschafft ond die PDA isch gsezt gsi ond häd gwirkt. Mer ischs so guet gange!!! Poah häd das guet do! Noch em setze vor PDA isch dene de Muettermond zom 1. mal!!! Sett dr Entscheidig vom Ileite kontrolliert worde!!! sage und schreibe 8 Stond spöter! Ond siehe do! Äs isch bereits 9cm offe gsi! i dem Moment häd mi das ned gschockt! Aber im nochhinein hani die awesende Medizinischepersone ver***** welli eifach s'Gfühl gha han mer hät doch mal vorher chönne luege? Irgendwie hani die ganz Ziit nie s'Gfühl becho vo dere Hebamme das ich wirklich nöchstens gebäre. Sondern ich bin irgendwie dür de Spital düre "ghezt" worde. Ond ben mer die ganz Ziit nöme bewosst gsi das du mi lieb Alessio bald wirsch of d'Wält cho... jetzt wo ich das schribe hani än riese Wuet i mir inne... obwohl ich weiss das es eigentlich doof isch! Aber jetzt bini halt au "schläuer" als vor 5 Johr. Naja glich... ich han denn ca 1 Stond oder 45 Minute d'Rueh vor PDA gnosse. Bis sie nomal gmesse händ ond festgstellt händ das es bereits komplett eröffnet gsi isch. Ich han mi den entschlosse d'PDA abzstelle do ich eigentlich gärn ohni PDA han welle gebäre.
De Arzt häd mir abgrote. d'Hebamme häd mi unterstüzt. d'Wehe hani den ziemlich schnell weder gmerkt. Aber ich han kei Presswehe chönne usmache! Eifach nüd!!! De Arzt häd mer zwar azeigt wo düre ich muen presse. Aber ich han das irgendwie voll ned im Griff gha... ond äs isch eifach nüd gange... han immer ofs CTG gschiled i dr Hoffnig das ich merke wenn ich am beschte muen presse aber das isch irgendwie ned gange! Of all Fälle häds wie än Geburtsstillstand gäh... ond wos den 12. Februar 00.00 gsi isch händ sich selbscht d'Hebamme ond de FA mösse igestoh das du chline Alessio nöme wie vo ihne vorus gseid am 11. Februar of d'Wält chonsch! Noch 2 Stond ond 45 Minute "Pressphase" was au immer das heisst...
Häd den de FA gmeint er chöingi nöme länger warte ond nähmi jetzt s'Vakuum zur hilf! Vo dem hani irgendwie gar nöme sone gnaui erinnerig! Isch viellecht au besser so... eis weissi liebe Alessio mit Hilf vor Suugglocke... ond wahrschinlich au mit hilf vo mir, obwohl ich mich a das au nöme mag erinnere. Ich weiss nome no wie üse Dokter emmer weder gseid häd, "Jetzt muesch Presse Frau ******, jetzt muesch!!!" Esch ergendeinisch di Chopf gebore gsi... du häsch sofort met eim Aug offe, ond s'andere zue d'Wält aglueged. Obwohl du no gar ned rechtig gebore worde bisch. Diini Stirn isch i Falte gleid gsi... ond s'erschte woni dänkt han isch gsi... "Läck das gsehd us wie de Bruno!!! " Den ischs nöme lang gsi ond schwuuuups bisch du of dr Wält gsi! Gsond ond Monter bi mir ofem Buch gläge... onbeschrieblich die Gfühl wo do of eim zuechömed... Lang händ mer dech eifach bestuunt! Ich weiss no wie de Bruno mir is Ohr gflüschtered häd, "Däs isch ja vell schöner wie ich dänkt han..... Log mal die schöne Ohre a! Ond die velle Hoor". Mer händs chuum chönne fasse. Nach äs paar Minute esch den üse Arzt ganz ongeduldig worde ond häd ganz "fräch" gfröged öb mer den jetzt om Himmelswille emmer nonig welled wüsse was äs gihd! Er häds üs nämlich die ganz SS emmer weder gärn verrote... Jä ond do ischs klar gsi liebe Alessio. Das du de Alessio wirsch! Leider isch äs nochher nöme so rund glaufe... d'Hebammene händ dich wäg gnoh well du met de Naseflügel zittered häsch... Anschinend irgend äs "Zeiche" das met em schnufe öpis ned stimmt?
Ond ich han höllisch afoh blüete.... ich mage mich nome no dra erinnere das ich s'Gfühl gha han wie de Dokter wiissi Tüecher a mich häre gha häd ond teils i mich ie do häd... ond dene äs paar Sekunde spöter weder Bluet durtränkt weg gnoh häd! Anschinend isch irgend äs Bluetgfäs plazt ond er häds mösse näihe. Mer isch nome no trüümlig ond ganz neblig worde. Ond ich han gar nüd meh wirklich met becho... De Bruno häd chum no gwüsst wo stoh. Öb jetzt bim Alessio wos beobachted händ wie sich das met em schnufe entwickled oder bi mir... 
Ergendwenn isch den die ganz Situation weder onder Kontrolle gsi das Bluetgfäs isch gnäiht gsi... ond mir isch eifach no komisch gsi. Mer händ denne dich ändlich wieder zo üs zrugg becho... ond händ dich dörfe bestuune ond schätze... Mein Gott wenn ich das so schribe liebe Alessio gsehn ich dich vor mir... wie du bi mir i de arme lihsch ond s'erscht mal vor Brust tronke häsch! Äs wonder, wonder schöns Gfühl. Mit eim Schlag send all die Gfühl weder do. Ond das obwohls bereits 5 Johr här isch. Liebe Alessio du bisch öpis ganz bsondrigs. Du besch üses unplante Wunschchend. Üses Chend wo üs so vell zeiged häd im Läbe. Wie händ mer üs nome verändered. Met dir ond wäge dir! Mer send öberglücklich dich bi üs z'ha. Öberglücklich das Glück mit dir dörfe z'erlebe... sigsch du momentan no so mängisch schwierig. No so mängisch kompliziert. Ond gohd au no so mängs noch DIM CHOPF ond ned noch üsem. So esch äs s'schönste wenn du mir seisch Mami, ich liebe dech...
Ich dich nämlich au mi chli Mocke!!!
-----------------------------------------------------------------------------------
Alessio Nicolas 12. Feburar 2003 00:28 Uhr
52 Centimeter & 3490 Gramm
. Me gspürt richtig, wiä du dini familiä liebsch.
