ET wär am 18.07.08 gsi. Ich ha aber scho sit de 24. Wuche emmer Vorwehe gha. Ide 30. Wuche han i sogar in Spital müesse go ligge, anere Infusion. Het aber gar nüt brocht. Also ben i weder hei, und be denn det witer gläge. Ide 36. Wuche het denn min FA gmeint, jetzt gächs aber wörkli nöm lang. Ich ha ghofft das er rächt het, ha nämli langsam nöme möge. Emmer nor ligge. Gli druf abe ben i denn au no chrank worde. Ha e Gripp becho wo eifach ned weg het welle, also ben i zwoi Wuche spöter ame Dunnstig weder zum FA und ha gseit, ich will iileite, er het denn de Termin uf de nächst Zistig de 08.07 gmacht. Ich ha mi so gfreut, be aber wie scho sit ere Wuche trotzdem jede Obig go spaziere, das es velecht vo elei los goht. Am Samstig ben i denn so öppe am zwölfi is Bett, und ha wie emmer das Zie im Buuch gha, aber plötzli no regelmässiger. Ha denn chli gschlofe und be am drü ide Nacht weder ufgwacht, ha all 8 Minute es Zie gha und en Druck geg abe, schlofe han i nöm chöne, ha aber au ned sGfühl gha das es los goht, da ich das jo scho kännt ha. Ha denn chli gläse bes am morge am sibni, und denn han i mol min Schatz gweckt, und ha gseit, ich lüt jetzt trotzdem mol in Spital aa. Die händ gmeint ich chas jo mol cho zeige. Also hämer eus parat gmacht, no de Familie es SMS gschrebe, das mer ine Kontrolle gönd, das es aber ziemli sicher nonig los goht. Im Spital simer am achti aacho denn as CTG cho, paar Weheli hets aazeigt, im chind eschs super gange. MuMu 2 cm offe. Dhebamme het gmeint, mer selet jetzt no e Stund go spaziere, und wenn das kei witeri Uswürkige uf Wehe oder MuMu het, denn chömer weder hei, also höt gächs warschienli nonig los. Mer sind denn gmüetlich chli go laufe, und ich ha gmerkt wie d'Schmerze emmer stärcher werdet. Bald han i mi scho müesse noimet fescht hebe, und wo die Stund ume gsi esch, sind d'Wehe scho so heftig gsi, das i be jedere ha müesse erbräche vor luuter Schmerz. DHebamme het denn gmeint, höt göch ich doch nöm hei. Ha denn es Schmerzmittel becho, was absolut nüt gnützt het, also hämer denn mol Badwanne usprobiert. Das het för en churze Momänt wörkli gholfe, leider ned lang und ich ha scho weder erbroche, also han i nach ere PDA gfroget, dere esch au sofort zuegstumme worde, da ich de Hebamme au langsam leid to ha. Badwanne het aber glich öppis gnützt, MuMu esch 6 cm offe gsi. Ha absolut kes Ziitgfühl me gha, d'Wehe sind emmer heftiger cho, und ehrlich gseit han i gmeint ich stirb, ha dänkt, das haltet min Körper ned us. Uf PDA han i denn no gueti zwoi Stund müesse warte. Min Schatz esch i dere ganze Ziit taper a minere Siite gstande, und het mer ächt gholfe, ha mich so guet ufghobe gfühlt, und absolut ned elei. Mer händ nüt mitenand gredet, da ich ned ha chöne, und ich ha au oft d'Auge zue gha, aber ich ha emmer gwösst er esch do. Wo denn die PDA ändlich cho esch, han i au mis Lache weder gfunde, es esch soooo schön gsi, nor no en liechte Druck. Juhuu
Ca e Stund spöter ben i weder untersuecht worde, het grad no Schichtwächsel gä, MuMu vollständig offe. Also han i feng döfe liecht afo met prässe be de Wehe. Das han i fascht e knappi Stund so gmacht, bes es denn richtig los gange esch, und ich richtig ha döfe prässe. PDA het noche glo, und ich ha weder Schmerze gha. Ich ha dänkt es verrisst mi, ha genau gspürt wie sich euses Chind mm för mm dur mich dure geg use bewegt. Es esch mörderisch gsi. Bald het mer s'Chöpfli scho chli gse und min Schatz het döfe füre go luege. Und ich has döfe aalange. Es het Hoor gha, juhuu, das hämer eus gwünscht
Und d'Herztön sind mit jedere Prässwehe besser worde, das Chind het sich richtig gfreut uf d'Wält zcho
Min FA esch denn au langsam dezue cho, und denn händs gseit, sie machet jetzt en Dammschnitt, ha das gar ned met becho. Uf jede Fall het d'Hebamme gmeint, ich müessi denn glich no paar mol prässe. Sie het denn gschnitte, und schwupps esch euses Chind use cho, sie hets fascht ned chöne uffange, das esch sogar för sie zschnell gange. Und und min Schatz händ eus no ganz erstuunt aagluegt. Er het denn döfe dNabelschnuer dure schniide, und scho han ich euse Sohn ufem Arm gha. Er het gar ned brüelet und d'Auge wiit offe gha und umenand glueget, d'hebamme het gseit, das het sie sälte erläbt, sones wachs und zfriednigs Chind. Er het sich uf Aahieb wohl be eus gfühlt. Mer sind riesig stolz gsi. Er esch denn gmässe worde und min Schatz het ehn denn no döfe aalegge, unterdesse sind au eusi Familiene iitroffe zum sneue Familiemitglied willkomme heisse. Es esch de absoluti Wahnsinn gsi. So schmerzhaft wies gsi esch, so schön esch es au gsi. Und scho ide erste Nacht het mich euse Sunneschii zum erste Mol aagrinset, för de Momänt het i die Strapaze ohni zöberlegge grad nomol dure gmacht.
Höt esch er 6 Wuche und ein Tag alt, und esch euse ganzi Stolz. Und min Schatz esch sit de erste Sekunde de beschti Papi wo mer sich öberhaupt nor cha vorstelle. Ohni ehn hätt ich die Geburt nie so guet öberstande, er esch zu 100 % presänt gsi und ich be stolz sonen Maa a minere Siite zha und freu mich das er sonen tolle Papi för euse chli Schatz esch.
Euse Diego esch am 06.07.08 met 49 cm und 3180 g uf d'Wält cho.
