A alles mag ich mich nüme erinnere. Ich han eifach versuecht z gebäre und drum alli Energie uf das bündlet. Nämlich zwei Täg bevor mer de Linus id Arme schlüsse händ dörfe, hät d Fruchtblase äs Leck gha. Wills Abig gsy isch und ich gwüsst han, dass ich kei Streptokokke han, hämmer no dihei übernachtet und erscht am nöchschte Tag simmer im Spital iigruckt. D Wehe händ nid welle choo und drum han i gwüsst, dass no vor em Mittag iigleitet wärde mues. Ich han Akupunktur, Homöopathie und Wehetee überchoo, aber d Wehe händ nid vomelei welle starte. Dänn isch mit emene Zäpfli iigleitet worde und mer sind nochli go spaziere und dänn dusse ad Sunne gsässe. D Wärmi hät mir so guet tah, dass i nie meh vo deht wäg han welle. Doch wo d Wehe dänn zümpftig choo sind, han i doch gfunde, es segi Ziit für retour. So eifach isch das nüme gsy mit retour. D Wehe händ mich scho ordli plaget. Es hät immer meh gwehet. Ich bin gar kän Badwannefän, aber dezwüsched id Gebärwanne isch eifach wunderschön gsy. Grad dänn isch au no de Znacht choo. Sie händ mir d Spaghetti verschnitte und uf emene Tischli näbed ane gstellt. Aber Hunger han i kei meh gha. Mini Energie han i zum Veratme bruucht. Tüüf Luft holle und langsam usschnuufe. Das isch s einzige, wo näbed de Musik-CD zum sich druf z konzentriere ghulfe hät. Leider han i also vill länger ghaa als für ein cm ei Stund Wehe. Eigentli isch es ussert Wehe nid würkli fürschi gange. Und ich han gschaffet und gschaffet und gschaffet. Irgenwänn häts gheisse, ich müesi chly so ligge - uf d Syte. Wieso han i nid mit überchoo. De Befund isch immer no wiit wäg vom Gebäre gsy und schliesslich ich mir am spötere Abig e PDA aabotte worde. Ich han gfunde: nei. 5 min spöter han i gfunde: ja! Hei, isch das e gueti Erfindig. Ich han grad echly chönne schlafe. Irgendwänn han i dänn alles verschaffet ghaa, aber es isch nid wiiter gange. Und mer hät mir erchlärt, ich hegi äs Stärnguckerli, wos nid durs Becki schaffi. Es gäbi en KS. Ich han gseit, aber ich welli kein KS! Han dänn aber gmärkt, dass ich chan welle, was i will. Mir isch d PDA drum abghänkt worde und prompt isch en Notfall ine choo. Ich han drüü Stund lang ei Wehe nach de andere gha und müese warte, bis ich im OP draa chum. Min Maa hät mir nüme vo de Syte dörfe wiiche, au wo d Hebamme gfunde hät, er bruuchi jetzt sicher en Kafi. Sie hät ihm dänn sälber eine bracht. Das lange Warte isch nid schön gsy. Ich han au gmärkt, wie ich langsam nüme mag und wänn i hett chönne, dänn het ich mich spontan zumene Läbe ohni Chind entschiede. Und dänn bin i ändli draa choo. Wo d Teilnarkose gwürkt hät han i wie 1000 Ängel ghöre singe. Uf ein Tätsch kei Wehe meh und ich bin iigschlafe. Ich han grad no realisiert, wo s Baby am Morge am föifi (zwei Täg nach em Leck i de Fruchtblase) dänn ändlich uf d Wält cho isch - au erschöpft wie ich. So wunderschön mit villne schwarze krüselte Höörli. Jöö! Und anstatt 3kg wie errächnet über 4kg. Ich han grad chly müese brüele, wills nüt Schöners git und dänn wiiter gschlafe. Min Maa hät drum zerscht mal müese min Job übernäh. Aber gly druf bin ich mit em Bett au wieder is Gebärzimmer gschobe worde und mer händs chöne gnüsse und euses Baby bewundere. Wow
.Das alles isch jetzt es Jahr her. Ich han no lang dänkt, dass Fraue, wo das nomal über sich ergah lönd, irgendwie völlig crazy sind und allne nume chöne säge, das segi mis Einzelchind. Aber jetzt nachemene Jahr gseht doch scho vieles wieder andersch uus. Ich glaube, wänn d Sehnsucht nachemene Chind da isch, dänn nimmt mer das uf sich, wills sich lohnt. Ich weiss aber nid, eb ich mit mim Becki nomal e spontani Geburt wage würdi oder grad en KS. Aber das Problem lös i dänn, wänn i mues.
Isch fasch glich abgloffe.. 
ganz toll gmacht!Alles gueti
