Aus 2-3 Tagen wurden 6h

[happyhappy]

(leider in schweizerdeutsch geschrieben)

Liebste Aaron
I dem bricht versuch ich nomal de schönsti Augeblick i mim Lebe z beschriebe und ufs Blatt z bringe.
Mir hend ä nöd ganz unkomplizierti Schwangerschaft gha. Mir isch sehr viel schlecht xi über die ganz Schwangerschaft und am afang hani au bluetige gha und mir hend lang nöd gwüsst öb du bi eus bliebsch oder nöd. Jedes mal bim arzt wo ich dis Herzli xe han schla bini überglücklich xi und hans chum chöne erwarte dich z xe. Am 17.10 hend din papi und ich beschlossen o es bitzli gah laufe z gah die hoffnig das d wehe chli regelmässiger werdet da ich die letzte 2 tag immer mal wieder wenigi gha han wo aber nüt bracht hend. Also bin ich is badzimmer mich ga parat mache und plötzlich hets afange tropfe. Ich han zerscht gar nüt denkt han denn aber schnell d hose abezoge und glueget öb das würklich tropft oder ich mir das ibilde… und tatsächlich isch alles nass xi und ganz rosa. ich bin denn ufs wc ufegrennt und han nur no grüeft: „schatz mini fruchtblase isch glaub platzt“ din papi het glaub grad kurz panik becho und isch grad z renne cho. Da aber nöd me passiert isch simer denn glich no ga laufe, leider ohni erfolg. Ich han mit de Eva (Doula) telefoniert und mir hend beschlosse das ich nomal gahn ga schlafe und luege öb d wehe isetzed. Am nächste morge, nachere suuper guete nacht bini verwachet immer no ohni wehe. Es isch klar xi das mer hüt sicher mal münd in spital gah abkläre öb das au würklich fruc htwasser xi isch wo abgange isch. Will denn müsst mer ja öpis underne. Also isch am 9ni d eva vebi cho und mir hend verschiedenes unterno das d wehe isetztet und tatsächlich hani nach 1h scho rechti wehe gha. Also simer uf die 1 is spital gange. Det hemer denn de niederschmetterndi befund becho das de muttermund no total zue und hert und überhaupt nöd z abtaste isch da er sowit hine isch. Das chönti no 2-3 tag gah isch de kommentar vo de ärztin xi. da hani scho e halbi krise becho und mich uf laaangi täg igstellt. Mir sind denn aber trotzdem gah spaziere und sind vom spital obe an bahnhof glofe und wieder zrugg. Denn sind d wehe plötzlich stärker worde und han sie richtig müsse verschnuffe. Am 10ni nomal en untersuch. Muttermund immer no genau glich. Nöd tastbar, steihärt und absolut dicht. Also hemer eus entschiede en stop z mache. Ich han din papi hei gschickt gah schlafe und ich han es schmerzzäpfli übercho und eis an muttermund ane wo denn chli sött weich mache… (es chönt au bis zu 3 zäpfli bruche bis es würkt). Ich han denn 1 ½h chli chöne schlafe ime nebetzimmer und gege die morge am 1 sind d wehe heftiger worde und han witer müsse verschnuffe. E anderi hebamme isch denn cho und het gfunde sie untersuchi mich nomal. Hani total sinnlos gfunde da ich ja erst vor 2h es zäpfli becho han aber ebe… sie isch d hebamme also dümer folge. Sie het versproche guet ufzpasse da die untersuchig immer soooo schmerzhaft xi isch. Sie isch denn würklich au super fiin xi und het mich mit grosse auge agluegt und xeit: „oh da isch aber öpis gange. Sie sind 1cm offe und muttermund isch butterweich.“ Da bini scho chli erstuunt xi aber was isch scho 1cm. Am 3 bini denn zrugg is geburtszimmer und bin bis am 5i id badwanne. Det isch es so schön xi das sich min wunsch dich die wanne z gebäre no verstärkt het. Ich wer am liebste grad sitze bliebe. Das warme wasser het so guet ta. Nacher bini usse und sie het nomal kontrolliert: „ui das gaht aber vorwärts, sie sind scho 4cm offe. Sie söttet langsam ihrem maa alüte, de chli isch bis am 9ni sicher da.“ Ohalätz ja also jetzt bini chli sprachlos xi und han denn dim papi aglütet. Er het sich sofort uf de weg gmacht (er het sogar die kleider gschlafe damit er schneller isch). Am 6i isch er denn da xi und öpe am halbi 7ni sind d wehe richtig heftig worde und s verschnuffe isch immer schwieriger worde. Am 7ni nomal untersuch: „ sie sind komplett offe, es chan losgah“ i dem moment isch mer alles chli zu schnell gange und d schmerze sind sehr schnell sehr heftig worde. (han e überreaktion gha uf das zäpfli) ich han bi jedere wehe so starki schmerze gha dasi nach jedere wehe xeit han: „ich chan nümme, ich bin so müed, ich schaff das nöd.“ Aber din papi isch dagstande und het immer xeit: doch du schaffsch das. Du bisch stark. Ich bin da“ und denn het er immer schön mit mir d wehe verschnuffet. Irgendwenn hanis nümme gschafft und ich han nur no gschroue und brüelet. Denn het d hebamme plötzlich es ganz ernsts gsicht gmacht und het d ärtzin gholt. Dini herztön sind vo 160 uf 60 abegeheit und nümme gstige. „sie münd richtig schnuffe!!“ het d hebamme immer grüeft und ich han mir so müeh geh aber es het eifach nümme recht welle funktioniere. Ich han denn gfrögt öbi chan id wanne. Aber da dini herztön so schlecht xi sind isch es nöd möglich xi und das isch de punkt xi wo ich nümme han welle und nümme han chöne. Ich han denn müsse position wechsle in vierfüssler und han suurstoff becho i de hoffnig das es für dich so liechter isch. Denn sind scho d presswehe cho und ich han nüt me um mich ume mitübercho. D wehe sind im abstand vo 30sekunde cho und ich han immer weniger möge. Irgendwenn het din papi grüeft: „ ich xehn de kopf und haar“ denn hani mer nomal richtig müeh geh und so fest presst wieni ha chöne. „de kopf isch da“ het din papi grüeft und i dem moment isch de schmerz wie weg xi. ich han no eimal presst und du bisch am 8.22 uf d welt cho . Aaron-Tyler David, 2950gramm und 48cm purs glück. Us dene 2-3 tag sind grad mal 6h worde und du bisch bi eus xi. Dim papi und mir sind träne abeglofe und ich han uf din erste schrei gwartet wo aber nöd cho isch. Da ich ja im vierfüsslerstand xi bin hani di au nöd xe und ich han nöd gwüsst was los isch mit dir und han immer gfrögt wieso du nöd schreisch. Ich han mich denn uf de rugge dreht und da isch er xi. din erste schrei. Ach ich bin so glücklich xi. sie hend mir dich uf brust gleit und du hesch mich mit grosse auge agluegt und nur ganz kurz brüelet und denn hesch uf mini stimm gloset und bisch ganz ruhig worde. Ich han denn erfahre das s fruchtwasser ganz grün xi isch und du ziemlich was gschluckt hesch vo dem aber gottseidank hend sich dini herztön rapide verbesseret wo da xi bisch und mir hend dich chöne i volle züüg gnüsse. Du bisch s schönste wo eus je passiert isch und ich han mich i de erste sekunde wo ich i dini auge gluegt han mich total verliebt i dich. Mir sind überglücklich dini eltere dörfe zi und dich dur dis lebe z begleite. Mir liebed dich über alles euse schatz und freued eus uf jede einzeln tag mit dir.
In liebi dis mami

[kätzli]

ganz schön gschriebe und mit soviel liebi

[schlingel]

Danke für dä schöni Geburtsbricht. Ich wünsche euch vo Härze alles Liebi und Gueti und eifach viel Spass mitänand. Super schöne Name händ ihr gnooo

[dragonfly]

Es isch en würkli schöne Bricht wo du da verfasst häsch und vorallem so gfühlsvoll, dass mer grad Träne abechugelet.

I wünsch eu Drüne alles Gueti für d' Zuekunft und e wunderschöne Kennelernzyt.