Ganz heimlich häsch du din wäg zu eus gfunde, häsch dich ihgnischtet und super guet versteckt.
Am 27. August 2009 han ich bestätigt becho was ich sit es paar Täg vermuetet han, aber nöd han chöne verstah. Ich bin schwanger – und das bereits ihr 27./28. Wuche. Wie söll ich das blos de Lüt erchläre?
Dspirale wo ich im Dezember ihsetze lah han, hät sich wohl während dene Bluetige am Ahfang verabschidet – und ich han d’Nachkontrolle vergässe. Aber da währsch du eh scho underwägs gsi – mer hettet nur chli früehner vo dir erfahre!
Din Papi hät churz 2mal läär gschluckt, aber grad gfunde das schaffemer au no und hät sich sofort uf dich gfreut! Mer händ grad sofort eusi planti Hochzitsreis storniert, wo grad während dim errechnete Geburtstermin stattgfunde hett und händ ahgfange vorbereite.
Ich han ja riese Bammel gha zum das de Familie mitzteile – glücklicherwis händ sich all grad gfreut, und vo dem Zitpunkt ah wos alli gwüsst händ han ich mich au sälber so richtig chöne uf Dich – eusi chicca – freue! Wie wänn du uf das gwartet hetsch, isch min Buch ich de nögschte Täg richtig explodiert… es paar Täg später hät mir scho fascht niemert meh chöne glaube das ich erscht sit es „paar Täg“ schwanger bin!
De Herbscht isch cho, und es isch November worde… Da mir ja din Entbindigstermin nid soooo gnau händ chöne usrächne, isch de eifach uf de 23. November gsetzt worde.
De Termin isch eifach so verbi, ich han no nid die gringschte Ahzeiche gha das du dich bald uf de Wäg würsch mache, Am 30. November häts am morge früeh ahgfange schneie – und wie… am morge am 7ni sind d’strasse scho schnee bedeckt gsi. Und prombt sind dänn die erschte Wehe uftaucht… da ich ah dem Tag sowieso en Kontrolltermin im Spital gha han, hämmer de eifach chli früehner wahrgnoh… Leider hät üs das russische Ärzteduo (duo infernale wies din Papi gnännt hät) d’Hoffnig gnoh das du gli chämsch… bitz deprimiert simmer dänn wieder usem Spital use… und händ ALLES undernoh zum d’Wehe uf natürlichem Wäg ahrege… sind an Christchindlimärt go en Glüehwi trinke und spaziere, händ eh riiiese Packig Zimtsterndli kauft, es Weheöl gmischt becho und no en Spagyrik Spray vor Drogerie. Das alles zäme hät Wehe im 5min Takt bracht, aber ich han naning in Spital welle, damit mer mich nid namal chan heischicke… aber mir händ gwüsst, wänns so fescht schneit, dänn gits hüt nacht es Baby! Dänn es hät scho bir Geburt vo dim grosse Brüeder gschneit
Z’abig bin ich mit mine liechte Wehe ufem grosse Chüssi ghockt und han chli TV gluegt, din Papi isch am z’Nachtässe parat mache gsi… hmm… es feins Tatar hät er zur Fiir vom Tag gmacht! 22:07 häts ih mir inne Knacks gmacht, ich bin ufgsprunge und grad ufs WC grännt, mini Fruchtblase isch platzt – ich dem Moment wo din Papi de z’Nacht uf de Tisch gstellt hät…
Mer händ dänn mit Müeh und Not no chli versuecht z’Nachtässe und i han es paar Biss vo dem Tatar abegwürgt… Nach 5 Biss hämmer aber gfunde mer gönd lieber jetzt scho los… dänn sit em Morge häts non stop gschneit, und es hät würklich viel Schnee uf de Strass gha. Ich glaub mer händ no nie so lang gha für die 5min Weg. Aber pfade isch da in Bäretswil es Fremdwort und din Papi hät sich äxtra Müeh geh ganz fiin z'fahre.
Im Spital ahcho simmer öppe am viertel vor 11fi, da isch alles schön gmüetlich vorah gange… am Ahfang ischs no „luschtig“ gsi, din Papi und ich händ no chöne Witzli risse, händ gmüetlich chöne mitem Handy s’Facebook voll spame… d’Wehe im 5min takt sind dänn aber immer stärker worde, d’Abständ immer chliner… bis mich abem halbi 1 dänn all Minute brutal starchi Wehe überrollt händ… de Weheblocker wo mir immer wieder gsprützt worde isch, damits mal eh Pause git, hät leider nüt gnützt. Au d’Schmerzmittel händ nüt bracht. Min Wunsch no ihd Wanne z’därfe isch au ermöglicht worde… nach 1.5h schwaddere bin i aber so ufgweicht gsi das ich freiwillig wieder us de Wanne gstige bin.
Es isch defür zackig vorwärts gange, de Mumu isch schnäll komplet göffnet gsi, und am 6si händ d’Presswehe ihgsetzt und d’Fraueärztin isch cho go luege und hät gseit jetzt hegemers fascht gschaft, jetzt gäbs dänn grad es Baby für eus… Presswehe um Presswehe all Minute aber nüt isch passiert…
2h später han ich langsam absolut nümm möge, und het am liebschte irgendöppert am chrage phackt und ahbrüllt! Da hät d’Hebamme au no Schichtwächsel gha… au wänns üs bis jetzt ganz eh netti Hebamme betreut gha hät, isch die neu würklich super gsi. Sie isch is Zimmer inecho und hät gseit „so jetzt beändemer das, jetzt bringemer das Baby mitenand uf d’Wält“
Sie hät d’Ärztin grüeft – hui bin ich froh gsi hät d’Russin vom Mäntig morge kei Dienscht gha. Jedi hät 1 Bei ghebt, din Papi hät mir nach jeder Wehe müesse z’trinke geh und de Wöschlumpe uf d’Stirn trucke… langsam bin ich so kaputt gsi das ich alles nur no ime Näbel wargnoh han… 08:29, am 1. Dezember 2009 bisch du da gsi! Du häsch grad sofort los gschroe! Und din Papi hät mich ahr schultere packt und gseit „Schatz lug Baby!!!“
Dini Nabelschnur isch es bitzeli z’kurz gsi und drum am Schluss chli ahgrisse, was dich grad mal in bluet badet hät so hät s’abnable ganz schnäll müesse passiere… darum hämmer au sooo lang gha, aber du häsch immer super mitgmacht! Du bisch mir nachane uf de nackti Buch gleit und warm zuedeckt worde. Mini 4 Näht (Dammriss 3. Grad, 1 Labieriss und 2 Vaginalriss) sind gnäiht worde und du bisch die ganze 2h bi mir gsi. Erscht nachdem das alles fertig gsi isch, isch die erschti Kontrolle bi dir gmacht worde! D’Hebamme hät dich gwoge und gmässe, 3300g und 48cm
Liebi Amber Soraya, eusi wunderschöni Chicca. Du häsch dir eh wunderschöni verschneiti Nacht usgsuecht, Herzlich Willkomme in eusere Familie.
]
udn sehr hübsch esch si au!
