äs bizeli mami, äs bizeli papi und ganz viel wunder...

[chlini-79]

für üse chli käfer Eline Finja

i ha ä super schwangerschaft mit dir gha. zwor isch mer uh lang schlecht gsi, aber für dich min schatz hani da ohni z'reklamiere über mich ergoh loh.

scho frühe häts gheisse gha, dass mer dich zu 80% per kaiserschnitt hole wird. uf di eint siite bini sehr entüscht gsi, aber uf di ander siite irgendwiä au froh, dass i mit dir nöd das gliche erlebe werde wiä mit dinere grosse schwöster.... denn isch dä tag cho wo mer din geburtstermin hend törfe uswähle. dä papi und ich hend üs für dä 31.3.10 entschiede. 2 täg vor dim errechneti geburtstermin. han äbä doch no hoffnig gha, dass du vorher vo allei chunsch.

täg sind verstriche und dis datum isch immer nöcher cho. ha mich steche loh, ha diä gruusige tee trunke, üebige gmacht, dwohnig bestimmt 100x vo obe bis unde putzt.. doch nüt isch passiert. du häsch nöd uf natürlichem weg welle cho.

am morge vom 31.3 hemmer denn scho am 6i am morge mösse im spitol si. nervös simmer vorem kreissaal gstande und hend uf hebamme gwartet. Endlich isch sie cho, hät mich denn ufs zimmer brocht, bluet abgnoh und infusion gleit... i has gfühl gha mis herz platzt gad vor nervosität. kurz druf hends mich den in OP brocht. ganz gspannt hend i und dä papi gwartet bis mer din erste schrei ghöred...

um 8.18 isches denn sowiit gsi. äs hät en ruck tue und kurz druf häsch du din erste schrei abloh. schatz, du häsch ä wunderschöni, kräftigi stimm! i und ä papi sind so froh gsi und üs beidne sind tränli über backe grollt. ha dich kurz törfe gseh und än kuss geh, bevor hebamme und dä papi mit dir verschwunde sind. diä 30 minute uffm OP-tisch sind mer dänoch wiä ä ewigkeit vorcho. und endlich bini den zu eu uffebrocht worde. endlich hani dich törfe aluege, dich streiche und dich i mini arme schlüsse...

mer sind überglücklich und so dankbar, dass du gsund bisch, dass du so perfekt bisch und das du bi üs bisch. Eline, mer liebed dich so sehr! Danke dass es dich git!!

natürlich au äs riese dankeschön a das ganze spitol-team und au a din Papi. Merci viel mol!

[schlingel]

Vielen Dank für deinen Bericht. Ich wünsche euch von Herzen alles Liebe und Gute und geniesst es einfach

[ainis]

jööö chlini, da hesch herzig gschriebe!

[Knadja]

Genau an unserem Hochzytsdaag Alles Liebi Nomol...

[rondor]

Jöööööööö Chlini

So en schönä Brecht. Alles Gueti no einisch.

Härzlichä Gruäss, rondor

[CoolBlue]

ganz schö gschriebe!

da händer ganz guet gmacht! nomol alles gueti!

lg CB

[moni77]

dä bspruch händ mir bim geburtskärtli vo euisere yael druffe gha, won am 15.12.09 uf dwelt cho isch.

han grad riesig freuid gha wonen gläse han

[Luckystar]

chlini-79 din Geburtsbricht hät mir grad sehr Muet gmacht. Au i han kei schöni 1. Geburt gha und wirdä mis zweitä Chind müäsä mit Kaiserschnitt uf d Wält bringä. Es macht mich immer no sehr trurig wänn ich dra dänkä. Dankä für din schönä Geburtsbricht.