D Geburt vo eusem Sunneschii Xenia

[Störchli]

D Geburt vo de Xenia

Aagfange het alles i de Nacht vom 22. uf de 23. Dezember. Ich han vom 2 bis am 3 im 7 min Takt Wehe gha, aber woni ufgstande bin willi ja au na min Schatz in St.Galle het sölle informiere, isch das ganze wieder verbii gsi. So bini wieder is Bett und am morge am 7ni bini erneut vonere Wehe gweckt worde di nächsti Wehe isch den erst am halbinüni wieder cho, so bini na seeleruhig id Migros woni mit em Mami und enere Bekannte abgmacht han wie jede Mittwuch. Im Verlauf vom Tag sind d abständ denn immer wie chürzer worde. Am Abig sinds den bi öppe 20 min gsi woni mi entschide han mit minere Familie uf Winterthur an Wiehnachtsmärt z gah. Während mer über de märt gschlenderet sind hani gmerkt wie d Abständ immer chürzer werded. Wo mer den na is alte Sulzerareal hend müesse was vo minere Schwöster go hole bini wider bi 7 min Abstand gsi und das isch de ganz Heiweg dure so blibe. Bis ich den diheime gsi bin hani scho fascht 2 Stund im 7 min Takt Wehe gha aso hani mi entschlosse mal min Schatz z informiere das ev. hüt na los gaht. Nach dem ich ihn den informiert han hani is Spital aaglüte und gseit dasi sit sit 2 Stund im 7 min Takt Wehe han unds etzt gad uf so 4-5 min abecho sind. D Hebamm am telefon het den gseit ich söll uf di halbizähni in Spital abecho. So hani min Papi informiert, dass er mich däf is Spital fahre wo zerscht e Konntrolle gmacht wird obs ned Fehlalarm isch. Im Spital aacho bini zerscht mal as CTG aaghänkt worde für fascht 45 min dete hani Wehe im 3 min Takt gha aber na guet ushaltbar. Nach em CTG het mich d Hebamm den na Vaginal undersuecht, het mer gseit das die Wehe woni bis etzt gha han scho was bewürkt hend ich segi "scho" 3 cm offe. Nach dem undersuech ischs den richtig los gange. Ich han ei Wehe um di ander gha, han mi nüme würklich chöne erhole und min Schatz isch nanig bi mir gsi. Min Papi isch uf St. Galle gfahre ihn go hole. Nach em Schichtwechsel vo de Hebamm het di neu entschide das si mer mal Wehehemmer git, damiti mal e Pause han. Wo si den churz vor Mitternacht namal Vaginal undersuecht het isch mer gseit worde sie sind scho ganz offe. Da hani e mega Krise becho und gseit, aber de Vater vom Baby muen bi de Geburt au da sii. Mis mami het mi den beruhigt und gseit das nümme lang gaht bis min Schtz chunt. Ich han den na bevor min Schatz da gsi isch nach de PDA verlangt willi die Schmerze eifacht nüme usghalte han. Den isch äntlich min Schatz cho und het mich eifacht id Arme gnah und mer Muet gmacht. Für mich ischs den na e ewigkeit gange bis de Arzt cho isch wo mer d PDA gstoche het. De Negativ Punkt woni het sölle ganz still hebe isch e Wehe cho und das trotz Wehehemmer und so bini zämezukt wo de Arzt gstoche het. D Folge devo sind gsi das d PDA nünt gnützt het und es zweits mal het müese gstoche werde. Di zweit PDA het den gnützt und ich han d Wehe nume na ahand vom Pressdrang woni sit Mitternacht gha han gmerkt. Bimene witer vaginale Undersuech het d Nachtärztin bi mir ir Scheide na es sogenants Septum enteckt und drum di diensthaben Oberärztin cho lah wo mi den au na Vaginal konntrolliert het, ob ich überhaupt natürlich chan gebäre. Sie het den gmeint das segi keis Problem, aso hani brav witer mitpresst wen wieder e Wehe cho isch. Irgend wenn i de Nacht kei ahnig um welli Ziit het mer d Hebamme den d Blase gsprengt und gmeint jetzt gahts sicher nümme so lang und ihres Chind isch uf de Wält. Ich han den denkt hoffentlich het si recht, aber es isch anders cho, ich han s Baby eifacht ned wieter abe bracht obwohl i immer schön mitpresst han. Da sind die Beide Ärztine wider cho hend mi namal undersuecht und den gseit das d Chefin vo de Oberärztin cho lönd das mer s Sptum vielicht müesed dureschnide, damit s Baby chan ufd Wält cho. Wo den die dritt Ärztin cho isch het si gseit si schnidi, nume het mir de schnitt wo sie gmacht het so weh ta trotz Pda und das si inere Wehe gschnitte het, dasi naher nume na am brüele gsi bin vor schmerze. Irgend wenn so um di 7ni am Morge isch d Oberärztin zu mir is Gebärzimmer cho und het gmeint das sies na mit de Sugglogge well probiere will mis Becki chli schmal segi, aber sie das erst machi wen dune de OP parat segi fals mer en Keiserschnitt mües mache. Es gächi aber na öppe e Viertelstund bis sie chan cho will si näbetra na e OP hegi wo zerscht muen beändet werde. Da hets wieder en Hebamme wechsel geh. Di neu Hebamm het mi den namal Vaginal undersuecht, aber au nume chöne feststelle das s Baby na zimlich höch isch. Und den isch plötzlich die Hebamm chli hektisch worde. Bi mir d finger id Scheide für en witere Undersuech glichziitig lueget si ufs CTG weg de Herztön vom Baby und den rüeft si ich bruche sofort e Ärztin. Mim Schatz wird d Suurstoffmaske id Hand druckt ung gseit er söll si mer ufs Gsicht hebe und mir ich sölli ganz ruhig schnufe damit s Baby gnueg Suurstoff bechämi. I dem moment hani mega Angst becho was los segi und au gfraget, d antwort isch den nume gsi schnufed si ganz ruhig und ghöred si s herzli schlaht wieder. den hends es Bett inegschobe ich han müese wechsle und bin öppe am 7.40 uhr in OP abecho, bin dete na fürd Vollnarkose vorbereitet worde und 7.53 isch s Baby uf de Wält gsi. Ich han den mis chline Christchindli erst öppe 2.5 Stund später s erstemal na ganz verschwomme gseh. Woni den s erste Wort usebracht han ischs nume gsi Hoi Muus. Min Schatz het den gseit das es Meitli seg, ich han aber na bis am Mittag brucht zum richtig wach werde und den zu mim Mami z sege ich möchti d Xenia mal hebe,aber sie müesi nebet mim bett blibe fals si mer us de Arme rutschi. Ich bin aber trotz Blitz-Keiserschnitt froh das mit de Xenia alles guet isch und si dank dere schnelle Reaktion kei Schäde wege Suurstoffmangel becho het. Mis gröste Wiehnachtsgschänk hani mer am Morge vom 24. Dezember gad selber gmacht.

[schlingel]

Uii das isch ja nomol guet gange. Ich bin echt froh, dass du sone kompetänti Hebamme gha häsch. Weisch eigetli was passiert isch, dass es zume Notfallkaiserschnitt cho isch? Händs öpis gseit, dass du snöchschte Chind nomol normal chasch probiere, oder isch dis Becki zäng?
Ich wünsch dir uf alli Fäll allles Liebi und Gueti und hoffe du chasch dis Wiehnachtsgschänk i volle Züge gnüsse.

[Fuffi]

Gratuliere dir zu deinem Christkindli Xenia
Ui, das tönt nach einer happigen Geburt. Zum Glück hattest du am Schluss so eine gute Hebi, die sofort gehandelt hat, damit alles gut kam.
Geniesse dein Schätzeli

[Morenita8]

Liebs störchli

i gratuliere dir ganz härzlech zu dim christchindli!

Bi grad erliechtetet gsi am schluss z läse das doch no alles guet cho isch!

Wünsche öich e gueti zit!

Liebi grüess

[Störchli]

@schlingel: obs becki au bimene 2. Chind z äng weri weissi ned, den min FA he immer gseit das es mit mim Becki gaht es segi ned zu eng.

@fuffi: ja zum glück isch am schluss so schnell ghandlet worde, au wenni leider Volnarkose becho gha han.

@morenita8: merci für dini glückwünsch

[pfusi08]

herzliche gratulationa zur geburt von xenia.
klingt nach einer strengen geburt.

alles gute für eure zukunft

[skorpion82]

@Störchli
E schöne Geburtsbricht und au total hektisch. Wie's bi üs au gsi isch. I bi froh, sind ihr au so guet ufghobä gsi.
i weiss du dänksch jetz sicher, wer isch das denn?? I bi s'Cousinli vom Papi vo dr Xenia

[Störchli]

@skorpion82: Ja hektisch ischs gsi, aber i bi so froh das alles guet cho isch und d Xeni gsund isch

[skorpion82]

@Störchil
Das glaub i dir sofort. Ha jo leider au scho s'andere müesse erläbe und wünsch's echt niemerem!! Gisch mim coucousinli e küssli? Isch echt e härzigi muus

[Störchli]

@skorpion82: ja das machi, aber d Xenia ischs cucusindli vo dine chind... Han das gad hüt na mit em mami diskutiert gha

[skorpion82]

@Störchli
Isch jo schlussendlich glich *lach*

[Störchli]

ja da hesch au recht

[Chilipepper]

Wow jo du hesches jo würkli au nid eifach gha!
Ich find diä Lüüt im Spital hend super reagiert, so wie ich das so vom Bricht beurteile chan!
Zum Glück isch schlussendlich alles guet choh!
Ich hoffe, dass du wenn du mol wieder ne Geburt erläbe wirsch, dass es denn viel ruhiger und entspannter zue und her goht.
Schön dass Ihr wohluf sind.

[Störchli]

Ja das hoffi au! Ich möchti gern mal na e spontangeburt erläbe