Agfangä het aues mitere richtige Biuderbuechschwangerschaft, i ha mi geng mega gfröit weni di wider ha dörfä ufem Ultraschall gseh wi du di bewegsch u dis Härzli pöperlet, i ha mit dir nie Problem gha u du hesch di richtig guet entwicklet. Vo Mau zu Mau hetme geng wi meh gseh u mit dr Zyt bisch du richtig ä zapplegi wordä, du hesch mi mängisch id Rüppi gstüpft u trotz däm dases nid grad sehr agnähm isch gsi hani irgendwie fröid gha wüu so hani geng gwüsst dases dir guet geit.
När wos umä Ändspurt isch gangä bini mit dim Papi zämä no mau zu üsere Ärztin, das isch am 19.Januar gsi u si het mitem Ultraschall nomau gluegt wis dir geit u wi schwär das du öpä bisch, när het si gseit gha dass du äs rächt grosses Bébé bisch u drum d Geburt am 21.Januar muess igleität wärdä und mä nid bis zum Geburtstermin cha wartä wo am 27.Januar wär gsi. Dis Mami isch zersch nid so begeisteret gsi aber äbä wes besser isch de isches haut so.
Ja när wi das so isch hani nachem Ungersuech relativ starchi Schmärzä übercho wüu d Ärztin no het gluegt obsech scho öppis het ta . u so si dr ÜPapi u ig hei gangä ohni grossi Hingergedankä . I ha di Schmärzä geng no gha aber i has uf di Ungersuechig abgschobä wüui das scho bim letschtä Mau so ha gha, aber wos när geng heftiger isch wordä bini scho afa chli iz Grüblä cho, mir sie grad am „Gute Zeiten schlechte Zeiten“ luege gsi, aber hami gar nid chönne konzentriere i bi dür di ganzi Wohig gloffä dases wenigstens chli erträglecher isch wordä. I ha när beschlossä mau äs Bad z nä zum luege obs verbi geit oder obs blibt u mi het dünkt gha äs sig chli besser wordä aber zur Sicherheit hani nach langem Hin u Här glich mau iz Spitau aglütä u ha gfragt ob mir söuä verbi ga oder nid u si het gmeint i söu doch wes stercher wird no mau äs Bad nä u wes nüd nützt söui verbicho. Auso hani no mau wöuä äs Bad nä, aber wi das so isch wemä öpis sött oder wett, de geits nid u i ha müesse fescht steuä das ke warm Wasser me chunnt
, hingerdrii chani drüber lachä aber denn i derä Situation häti d Wänd ufä chönnä... Auso hei di Papi u ig beschlossä di haubstündegi Fahrt richtig Spitau azträtä u womer ca. Am zähni am Abä dert si acho heisi üs oscho grad ines Zimmer ta wosi dini Härztöndli u mini Wehä hei ufzeichnet, i ha zwar dänkt si schickenis eh umä Hei da i no sehr unregumässegi Wehä ha gha aber si hei du z Gfüu gha dasmer söuä blibä wüu dr Muettermund scho 3 cm offä isch gsi und heinis d Geburtswannä vorbereitet dasimi chli iz Wasser ha chönnä ga entspannä. U wüu dis Mami chli ä wehlidegi isch hetsi mau no äs Zäpfli gägä d Schmärzä verlangt aber leider het das genau nüd gnützt u drum heisimer när no öpis gsprützt, aber leider het o das nüd gnützt. Mittlerwilä isches öpä am morgä am Eis gsi u d Hebammä het beschlossä ä PDA z legä wüumä Wehevörderigsmittu muess gä da dr Muettermund trotz Wehe im 5min. Tackt no nid witer uf isch. Während däm das i Wehe für Wehe ha übermi la erga het di Papi ufem Sofa im Gebärzimmer pfuset da mir doch scho rächt lang si uf gsi, das isch äbä typisch Päpu
. Ja u när nach 3 Stung ufä Anästhesist wartä ischer am vieri am Morgä äntlech cho u het mir die PDA gleit, aber o da het d Muetter bau wöuä schlapp machä, mi Bluetdruck isch i Chäuer gheit u mir isches mega eländ gsi aber wosimer öpis gsprützt hei wonä wider id Höchi jagt isches umä gangä u när hani kener Schmärzä meh gha u hami o chli chönnä erholä. Üsi Hebammä isch öpä so uf di füfi no mau cho ä Ungersuech machä u het när festgsteut das eifach geng no nüd vorwärts geit u het mit üs z witere Vorgehe besprochä, si het vorgschlagä dasmä chönnt d Fruchtblasä uftue u luege ob dis Chöpfli dür das witerabe rütscht oder Kaiserschnitt, si het när mit dr Ärztin rücksprach gno u am sächsi sisi du no mau cho luege wis üs so geit u de hetmä müesse feschtsteuä das dini Härztöndli nüm guet si du hesch nämmlech mega viu Stress gha u dis Härzli het mit 175 pöperlet. Drum hetmä beschlossä dasmer di per Kaiserschnitt düe vo dine Strapazä erlösä u chum heimer das so abgmacht isch o grad no d Fruchtblasä platzt u dert hetmä gseh das z Fruchtwasser grüen isch gsi. När isch aues ganz schnäu gangä si si mit üs dür d Gäng gfahrä und grad i Operationssau, auso i muess sägä sischmer scho chli komisch gangä i weis nid obs wäg däm plämpläm Mitteli isch gsi oder wäg was, i bi ömu so chlatsch gsi dasi nid mau di Papi i denä grüene Chleider ha erkennt 
. Ja u när wosi agfangä hei ischsmer geng schlechter gangä u mi Bluetdruck isch geng töifer abä so das dr Anästhesist mir geng wider het Züg müesse sprützä daser umä chli ufä geit aber irgendwie het das nid so wöuä klappä u plötzlech hani nüd meh tschegget u bi ersch umä im Überwachigsrum erwachet, leider ohni di i mire Nechi. Du bisch am 20.Januar 06.34 Uhr mit 52cm u 4000gr. uf d Wäut cho u hesch scho di ersti grossi Hürdä müessä meisterä, du hesch nämmlech dür dä ganz Stress nid richtig chönnä schnufä u mä het zersch no gmeint mä müess miter id Speziauklinik. Mi het dä Gedankä fasch verrissä dasi nid ha gwüsst wi schlimm dases isch u wie dases dir geit u dasi di nid ha chönnä gseh u i dire Nechi si. Wär gärn i denä schwärä Stunde bider gsi. Aber i ha o gwüsst dass das ganz gueti Dökter si u die guet zueder wärdä luege. Di Papi het när ömu sofort äs paar Föteli vo dir gschossä damiter mir die cha zeigä u i muess sägä du bisch auso äso äs wunderschöns Bébé gsi. Ja u när ir Nacht hani du äntlech Mau zueder dörfä u di z erstä Mau live gseh, zersch numä dür d Schibä da du ja ir Isolette bisch gsi aber när hani di dörfä gspürä, das het so guet ta u wosi di mir uf d Brust gleit hei bisch du grad mega zfridä gsi u hesches gnossä, dä Momänt isch so wunderschön gsi u wirdi nie vergässä! Am nächstä Morgä heisi di när zu mir iz Zimmer bracht u ja sit denn si mir zwöi äs unzertrennleches Team
. Gäu Lynni? Dr Papi u ig si mega stouz uf di, dass du so äs starchs Meitli bisch u mir hei mega fröid a dir!
Dicke Muntsch
Ech wönsche der viel viel Freud met euchere Meite 