Schon vor einiger Zeit hab ich aufgeschrieben wie unser kleines Wunder zu uns kam. Wusste aber nicht recht was damit machen. Hab mich nun doch entschieden den Geburtsbericht hier reinzustellen, gerade auch weil mir das Forum in der ganzen Kinderwunschzeit und Schwangerschaft sehr geholfen hat. Oft bekam ich hier liebe Worte und Unterstützung die mich immer wieder sehr berührt hat.
An dieser Stelle allen ein riesen DANKESCHÖN!!!
Den Bericht hab ich in Mundart verfasst, ging mir einfach ringer zum schreiben. Da er sehr lange ist hab ich die Zeit davor und die Zeit danach in ein Spoiler verpackt, so kann jeder lesen was er mag.
Euses chline, grosse Wunder – 13.2.2011
Spoiler:
De Weg zu dir:Am 13. Februar 2011 het sich min grösste Wunsch endlich erfüllt. Du, mini chli Tochter bisch zu eus cho. Bevor ich vo dim Weg uf die Welt schribe, mues ich echli ushole.
Scho vor über 3 Jahr isch bi dim Papi und mir de Wunsch nach eme Baby ufcho. Leider hemer im Verlauf müsse merke das das wohl ned so eifach wird werde. Nach vielne Arztbsüech, immer wieder Hoffnig, denn wieder en Rückschlag isch klar gsi das es ohni medizinischi Hilf ned wird gah. Mir sind uf en ICSI agwiese. Es isch en herte Brocke gsi das z’verdaue, aber mer hend eus ned underkriege lah und für euse Wunsch afa kämpfe. Afangs 2010 hemer denn endlich chönne is Projekt Wunschbaby starte. Leider isch ned alles so gloffe wie mer eus das gwünscht hend und so hemer im Feburar 2010 euses erste Baby scho nach wenige Täg müesse lah zieh. En riese Tüfschlag und im Moment hemer nüm gwüsst wie witer. Aber mer hend kämpft und im Mai 2010 hemer die letscht Hoffnig gschöpft und alles uf ei Charte gsetzt.
Und s’Wunder isch passiert, DU bisch zu eus cho. Am 3. Juni 2010 hemer tatsächlich en positive Schwangerschaftstest i de Händ gha. D’Freud isch riese gross gsi. Mit dere Freud isch aber au d’Angst cho das s’gliche nomal passiert wie im Februar. Leider hani au churz durf abe Bluetige gha und mer hend Angst gha das euses grosse Glück scho wieder zerstört wird. Aber du hesch Kämpft. Du hesch zu eus welle und bisch bi eus bliebe. Mer sind überglücklich und dankbar gsi. Mit jedem Ultraschall womer dich gseh hend hemer euses Glück meh und meh chönne fasse. Mer chömed tatsächlich es Baby über.
Die ganz Schwangerschaft isch immer wieder chli prägt gsi vo minere Angst um dich. Irgnedwie hani das Glück das du unterwegs bisch eifach ned recht chönne fasse. Das wo mer eus soo lang gwünscht hend sell endlich in Erfüllig gah?! Am 15. September han ich dich denn s’erste Mal gspührt. Und churz spöter het au din Papi Bewegige chönne wahrnäh. Jetzt isch es immer realer worde und au vo usse het mer guet gseh das mer gli z’dritte werded sii. Womer erfahre hend das du es chlises Meiteli setsch werde simer überglücklich gsi, mis Gfühl woni am Afang gha han het also gstumme.
Ich han während de ganze Schwangerschaft immer wieder Angst gha um dich und alwäg au wege dem scho früh Vorwehe gha und mich müsse schone. Aber dank viele liebe Lüt, hüfige Kontrolle und Ultraschall hani die Ziit doch au chönne gnüsse und bi jede Tag dankbar gsi das ich es chlises Wunder under mim Herz döf träge. Dini Tritt hani wahnsinnig gnosse, au wenns am Schluss würklich weh gamcht het da du immer gäg d’Rippe ginget hesch und ich det en Zerrig übercho han. Aber das hani gern in Chauf gno.
Die letschte Wuche bini denn immer ungeduldiger worde. Hani doch soo lang müsse Geduld ha, so isch mer sie i de letschte Wuche und Täg eifach usgange. Ich han dich endlich welle kennelere. Dezue sind grad i de letschte Täg wieder die Ängst cho woni eifach ned han chönne abbaue. Ich han hüfig id Kontrolle döffe und dir isch es immer super gange. CTG sind perfekt gsi, nur vo Wehe wiit und breit kei Spur. Ich bi fasch verzwieflet und ha irgendwie eifach ned gwüsst wie mit dem umgah. Drü Täg vo em Termin bini i de Akupunktur gsi und ha mi bi de Hebamme so richtig chönne ushüle. Sie het mer gseit ich müssi chöne loslah susch gäbis kei Wehe. Nur wie macht mer das? Irgendwie hani das eifach ned chönne. A dim Termin, am 11. Februar, hani denn plötzlich echli resigniert und drum alwäg au chönne loslah. Ich han gwüsst das es jetzt sicher nüme lang chan gah.
Geburt Ja und am 12. Februar hesch du denn entschiede das du wetsch zu eus cho. Es het aber nomal en riese Portion Geduld brucht für de Weg.
Am Samstig Morge am sächsi bin mit Wehe verwachet. Bi zersch chli skeptisch gsi wasi devo sell halte, ha de aber gli müsse afa mitschnuffe und das all 5-7 Minute. Also isch es glich öpis. So isch das 2h gange und am achti hani denn mal es Bad gno. Det sind die Wehe schwächer und unregelmässiger worde. Mer hend denn mal z’Morge gässe und es isch so witer gange. Immer wieder en Wehe, aber unregelmässig. Au nach eme Spaziergang isch es immer no so gsi. Langsam hanis chli frustrierend gfunde und am vieri hemer eus denn mal im Spital agmäldet. Ich bin aber überzoge gsi das mer nur für en Kontrolle gönd und de nomal heichönd. Aber ich han eifach mal welle wüsse wora dasi bi und öbs dir no guet gaht. Im CTG het mer denn doch die eint oder ander Wehe gseh und de Befund isch guet gsi. Dir isch es tip top gange und das isch ja d’Hauptsach gsi. Wäge mine hoche Bluetdrück het mer no müsse Bluet näh aber det isch au alles guet gsi. Mer hend denn nomal heidöffe aber d’Hebamme het scho gmeint es chönni sii das es würklich gli losgat. Ich bi aber immer nonig so devo überzoge gsi und ha denn au no en Termin für de Sunntig becho.
Dehei hend din Papi und ich denn no öpis z’Nacht gässe und nachher hani dänkt ich gane mal is Bett. Bi efang ziemlich müäd gsi nach eme Tag Wehe. Mit Schlafe isch denn aber nüt gsi. So ab em zäni sind d’Wehe denn würklich stärcher worde und regelmässig. Nach 2h hemer eus im Spital agmäldet und dasmal isch klar gsi das mer z’Zweite werded gah aber z’Dritte werded heicho.
Am Sunntig am halbi eis i de Nacht simer denn im Spital acho. Ich bin as CTG agschlosse worde und mer het schöni Wehe gseh und de Befund isch guet gsi. D’Hebamma het gseit „hüt chunt das Baby“. Da hani nume dänkt das de Tag ja no 23,5h het und sich das Baby hoffetlich ned grad soviel Ziit lat.
Es isch mer zu dem Ziitpunkt aber no recht guet gange, ich han d’Wehe, wo all 5 Minute cho sind, guet chönne verschnufe und din Papi het mer immer wieder mal öpis z’trinke und en chalte Wäschlumpe gäh. Zwüschinne isch er aber wegdöst, isch ja schliesslich z‘mits i de Nacht gsi. Nach ere Stund hani denn plötzlich en deftigie Wehe gha und es Knacke spührt. Denn isch es warm worde zwüsche de Bei; dini Fruchtblase isch platz. Ab da sind jetzt d’Wehe richtig heftig gsi und hend au viiel meh weh gmacht. Ich han ziitewiis nüme gwüsst wie schnufe weli so überrollt worde bin vo de Schmerze, bi denn froh gsi um es Schmerzmittel. D’Hebamme isch fasch immer bi eus gsi und het mir ghulfe jedi Wehe z’verschnufe. Öpe am drü han ich denn mal id Badwanne welle i de Hoffnig das es det besser isch. Leider isch das ned de Fall gsi, au det sind d’Wehe heftig gsi und zudem ischs mer no schlächt worde. D’Wehe sind oft und heftig gsi und ich han chum Pause gha.
Also bini gli wieder ufs Bett, det hani wenigestens i de churze Wehepause chönne döse. Zwüschinne het mich d’Hebamme mal katheterisiert well ich nüme han chönne bisle. Das isch mer i dem Moment total egal gsi. De Muettermund isch zu dem Ziitpunkt bi ca. 2cm gsi. Solangsam bini chli verzwiflet welli de Idruck gha han es gaht no ewigs. D’Schmerzmittel hend ned würklich gholfe und ich han um en PDA gfehlt. D’Hebamme het mi no welle überzüge das es sicher jetzt schneller gaht aber ich bin stur blibe. Es isch halbi foifi gsi, de Muettermund bi 4cm. Nach es paar Telefon isch es zackig gange und um die Foifi isch d’Narkoseärztin da gsi. Es isch alles parat gsi, d’Nadel het sie i de Hand gha und nur no ei Wehe welle abwarte zum stäche. Da hani plötzlich Pressdrang gha und de Muettermund isch tatsächlich voll offe gsi, nur no en chline Saum. Also het mer die ganz PDA Gschicht abblase. Ha mi de scho es bitz gfreut und ha dänkt gli bisch bi eus.
Aber es het denn nomal en riese Chraftakt brucht bis du de Weg gfunde hesch. D’Wehe sind eifach sehr churz gsi und es het mer amigs grad mal gläget zum eimal presse. Leider sind au Pause sehr churz gsi sodasi mi würklich nüme han chänne erhole. So isch es es Wiili gange… D’Wehe sind einfach ned sehr effektiv gsi und trotz allem presse isch ned viel passiert. Ich han denn Wehemittel becho, woruf d’Wehe zwar chli stärcher gsi sind aber immer no churz. Min Chräft sind langsam am Endi gsi und ich han chum meh möge mithelfe. I dere ganze Ziit hani au immer müsse d’Lag wächsle damit du de Weg besser findsch. Irgendwenn hani nume no brüelet und gfleht sie selled doch öpis mache. Mer het denn s’Wehemittel für en Moment abgstellt, was aber ned die gwünscht Erholig bracht het well s’Wehe halt immer no sehr hüfig cho sind.
So würklich es Ziitgfühl hani nüme gha aber es mues gäg die siebni gsi si wo denn d’Oberärztin cho isch. Und ich cha mich no gnau a mini Wort erinnere won ich ere gseit han. „möched eifach öpis, holed das Chind use, obe oder unde, es isch mer egal aber möched öpis“. Sie het sich aber no bitz Ziit glah und gmeint ich selli mal no probiere ufstah damit mer d’Schwerchraft no chönd nütze. Uh ich het sie chönne…Ha mi denn aber glich us em Bett usequält und has probiert. Mit Müh und Not hani mi chönne uf de Bei halte und es paar Wehe lang presst. Gnützt hets ned würklich viel, usser dasi nomeh gschafft gsi bin. Trotz sehr viel Wehemittel han ich immer no sehr churzi und ned sehr effektive Wehe gha. Min Gebärmuetter het alwäg nach bald 3 Stund Presswehe einfach nüme möge. Irgendwenn isch denn klar gsi das es ohni Hilf ned gat. Mer isch das völlig egal gsi, ich han eifach welle das du endlich usechunsch.Mer het alles installiert und denn s’Vacuum agsetzt. Es isch denn au no enDammschnitt gmacht worde. Endlich isch es in Endspurt gange. Da ich chum gmerkt han wenn ich en Wehe han het mer das d’Hebamme immer gseit. Ich han nomal all mini Chräft, woher dasi sie gno han weissi au ned, zämegno und jewils ufs Kommando presst. Nach eme Willi (kei Ahnig wie lang aber einige Presswehe spöter) isch din Chopf fasch dagsi . Das isch de schlimmst Moment gsi, es het eifach wahnsinnig wehtah und ich ha müsse uf die nächst Wehe warte. Endlich isch bi dere denn din Chof da gsi. Und denn nomal presse (oder zweimal?) und du bisch da gsi. ENDLICH
Wow, das Gfühl isch eifach unbeschrieblich gsi, ich find kei Wort für das. Plötzlich isch all mini Müedigkeit wegblase gsi, ich han kei Schmerze gspührt eifach nur unglaublichi Freud und Dankbarkeit. Du bisch zwüsche mine Bei gläge und hesch mit riese Auge umegluegt, völlig z’friede. Wos dich bitz abgsoge hend und stimuliert hesch denn es bitz afa meckere. Nach wenige Sekunde bisch de denn uf minere Brust gläge und Träne sind bi mir nume no gloffe. Aber nach all dene Träne us Angst um dich sinds jetzt eifach nume Träne us Froid und Dankbarkeit gsi.
Ich has chum chönne fasse das du endlich nach dene vielne Stunde i mine Ärm bisch.
Du hesch umegluegt und bisch völlig z’friede gsi. Im Nachhinein hani erfahre das es dir während de ganze Geburt immer guet gange isch. Bis uf wenigi Minute hesch du immer perfekti Herztönli gha und dich ned lah stresse vo de ganze Situatuion. Du bisch und blibsch en chlini Kämpferin.
Es git kei Wort wo das Glück chönd beschriebe womer sit dem Moment jede Tag, jedi Stund, jedi Minute und jedi Sekunde met dir erläbid.
Chlini Bohne – 13.2.2011 7:51 Uhr – 3570 gramm und 50 cm
Spoiler:
Ziit dena:
Jetzt het mer selle meine das es gnueg Strapaze gsi sind und mer dich chönd gnüsse. Leider isch es aber andersch cho. Mer hend uf dini Nachgeburt gwartet wo aber eifach ned het welle cho. Trotz Medikament und uf em Buuch umedrucke s‘ het alles nüt gnützt. Usser en riese Schwall Bluet isch leider nüt cho. Nach ere Stund het mer entschiede das mer jetzt Plazenta mues hole.
Du hesch mit dim Papi is Chinderzimmer döffe, bisch den badet und vermässe worde und hesch dich denn mit em Papi zäme chli chönne erhole.
Ich han i dere Ziit den Spinal-Narkose becho und mer het dini Nachgeburt operativ gholt und denn au no gnäht. Das Ganze isch ned so schlimm gsi, aber ich han dich ganz fest vermisst i dere Ziit.
Nach ere guete Stund isch denn alles verbi gsi und du bisch mit em Papi zrugg cho. Ich wird sis Gsicht ned vergässe, de Stolz i dene Auge isch eifach unbeschrieblich gsi!
Nach ere chline Chatzewösch hani denn chönne is Bett zügle und endlich bisch du wieder zu mir cho. Mer hend enand ganz fescht chönne gnüsse! Vo Trinke hesch no nüt welle wüsse, du hesch lieber gschlafe. Das han ich denn au gmacht nachdemi öpis feins z’ässe becho han.
Am Namitag bisch du denn vo de Oberärztin no untersuecht worde; es gsunds chlises Meiteli, was für en Froid!
Ich bi immer no sehr müäd und schwach gsi, keis Wunder bi dem riese Bluetverlust (um die 1,5l). Han denn, nach dem mer de Bluetwert kontrolliert het und de ziemlich tüüf gsi isch, no en Iseinfusion becho und gäg de spöter Namitag simer denn i euses Zimmer cho.
Ich bi sehr schwach gsi und ha ned mal Chraft gha zum dich us dim Bettli useznäh, das het mer scho chli Müh und au chli truurig gmach. Es sind aber ganz viel liebi Lüt umegsi wo dir und mir sehr guet gluegt hend. I de erste Täg hanis amigs nur grad bis ufs WC gschafft und wieder zrugg. Au das het mer Müh gmacht, hett ich dich doch so gern sälber versorgt. Aber din Papi het das au sehr guet gmacht!
Am Zweite Tag denn het mer bi mir nomal Bluet abgnoh und gseh das min Bluetwert nomeh gsunke isch. Tja, und denn isch das cho woni nie han welle entscheide. Ich han Bluet brucht. Vom Verstand her isch es klar gsi das es die einzig richtig Entscheidig isch, aber emotionl hets scho es bitz überwindig bruch. Ich han mir den aber en Ruck gäh, weli gwüsst han das es für dich und mich wichtig isch, und am gliche Tag hani denn no 2 Bütel Bluet übercho. Es isch di absolut richtig Entscheidig gsi. So han ich denn endlich es paar Meter witer als bis zum WC chönne laufe und am Abig simer zäme is Chinderzimmer wo du bädelt worde bisch; vom Papi natürlich.
Am nächste Morge hani denn grad no en 3. Bütel Bluet becho und ab denn isch es würklich nomeh berguf gange. Bi froh hani mi defür entschiede. So hani dich au richtig chönne gnüsse und endlich au Chraft gha zu dich selber chönne versorge.
Mer hend die letschte Täg im Spital no richtig gnosse und eus lah verwöhne. Stille isch eigetlich immer guet gange und en wahri Freud gsi. Min Ufsteller i de ganze Ziit, du hesch das eifach prima gmacht.
Dank vielne Gspröch und liebe Lüt han ich scho im Spital das Ganze chli chönne verarbeite. Ich bi froh han ich so es guets Team um mich ume gha und Lüt wo eus kennt hend. So han ich mich die ganzi Ziit sicher gfühlt und ich has gschätz das ich dich ned ha müsse in fremdi Händ gäh. Jetzt bisch du sächs Wuche alt und mer hend jede Tag riese Freud a dir. Es isch einfach es unglaublichs Gschenk das mer dich döfed bi eus ha. Dis Lache entschädiget für de ganzi Weg und die ganze Strapaze wos brucht het für das Glück.
Es git kei Wort wo eusi Dankbarkeit chönd beschriebe!!!
Zuletzt geändert von Epic am Fr 30. Nov 2012, 13:38, insgesamt 1-mal geändert.
Din Bricht isch so schöö gschriebe.... was hemer doch erst no zeme biberet dass mer üsi Chind doch endlich i üsne Arme chönd schlüsse und jetzt ischs scho wieder 8 Wuche her....
Dini Geburt het mich au chli a mini erinneret... üsi Tochter isch ja au mit Hilf vo Vakuum uf dWelt cho, will sie bi de letzte Presswehe nüme recht mitgmacht het...
Ich wünsch Eu e ganz gueti und schööni Ziiet mit Eurer Eileen....
ein wunderschöner geburtsbericht - herzliche gratulation zu eurem meiteli! da hattest du es ja nicht einfach, zuerst die mühen bis du ss warst, dann die angst du könntest es wieder verlieren, und dann noch diese happige geburt! geniesst nun die zeit zu dritt, in aller ruhe
p.s. hab übrigens auch am 13. februar geburtstag, tolles datum!
@Jeana
Jöö danke Ja gäll, cha mi no guet Erinnere wie ich am Schluss es richtigs "Nervefrack" gsi bin.
@choccolait
Danke dir, finde das Datum also au schön
@methi
Danke
Chlini Muus, du wirsch jede Tag grösser und schenksch mir so vieli schöni Stunde! Ich wett kein Moment meh misse und es Läbe ohni dich isch unvorstellbar. Ich liebe dich über alles!
@sarunette
ich weiss scho, werom dis chline wunder nöd erscht am 14. cho isch. dasch en tag, wo so viel lüüt fiired - und ihre geburtstag het sie nöd welle teile. super gmacht chlini dame!!
han ich dir eigentli scho mol gseit, dass ich am 13. februrar min hürotsatrag becho han?!?
freu mi uf de mäntig! äntli hämmer beid eusi mädels i de arme...
es liebs grüessli a dich und dini süess muus!!
@Binibini
Mini Bohne het doch eifach dinere welle nahdopple mit em 40+2
Aber finds au besser het sie ned am Valentinstag Geburi, drum hesch doch du denn de Atrag becho (hani nonig gwüsst). Din Schatz het doch au gfunde ned ame 0815 Tag
Finde hüt no das sie sich en suuuper Tag usgseucht het (au weni sie ja eigetlich frühner ha welle). En Sunntig und kein Mensch (also usser d'Hebamme) het gmerkt womer is Spital cho sind (was ja bi eus no wichtig gsi isch)
Min chline Schatz,
hüt bisch du bereits drü Mönet bi eus. Wahnsinn wie die Ziit lauf.
Wenn ich zabig a dim Bettli staht und du scho friedlich schlafsch bin ich einfach nur überglücklich das du bi eus bisch. Es chunt mir immer no wie en Traum vor das ich döf Mami sii. Aber es isch kein Traum es isch Würklichkeit. Und für das bin ich eifach nur unendlich dankbar.
Wenn du mich am Morge astrahlsch gat mis Herz uf. Es git nüt schöners als jede Tag mit der z'verbringe. Dich z'beobachte wie du jede Tag öpis Neus lernsch und dich entwicklisch. Ich bin stolz uf dich!!!
Ich liebe dich ganz fescht chlini Muus! Schön das es dich git!!!
Hüt isch wieder en spezielle Tag Genau vor eme Jahr hemer am Morge früh en positive SS-Test i de Hand gha. Mit dem chline Strichli hemer vo dir erfahre. Nie hetti dänkt was das für es spannends und intensivs Jahr wird werde. Wenn ich dich aluege und du mich astrahlsch chömed mir mängschi immer no Träne vor Glück. Wenn du a mich kuscheled schlafsch isch dini chli Welt in Ornig Du machsch mis Glück perfekt chlini Muus!!! DANKE FÜR ALL DINI LIEBE WO DU EUS JEDE TAG SCHENKSCH
Ich han richtig Träne ide Augä vor luuter Rüerig. Mer chan dini Liebi und dis Glück richtig usegspüre! De nöd ganz eifachi Wäg hät sich richtig glohnt. Gnüss dis Töchterli!!!
Akrobatin ♥ März 2011 Schauspielerin ♥ Mai 2013
Bald bisch du 6 Monet alt. D'Ziit lauft so schnell, mängisch fasch z'schnell.
Ich gnüsse aber jede Tag in volle Züg mit dir und es isch eifach nume wunderschön Mami z'sii.
Zwar hesch im Moment würklich en astrengedi Phase und mängmol chumi chli a mini Grenze, aber wenn ich denn wieder a all die Strapaze denke wos bruch het das du zu eus chunsch isch das de nur no halbso schlimm.
Ich bi immer wieder beidruckt was du für Fortschritt machsch. Sit eme Wili scho chasch hocke und dreie tuesch die wie verruckt i all Richtige. Jetzt woni das schribe liesch nebe mir uf em Bode und versuechsch dahi z'chrüche was der sicher au bald glingt. S'Mami isch einfach nur ganz fescht stolz uf dich chline Chäfer.
