Am Samschtig, 20.08.2011 bin i am Morge am Achti no bi minere Fraueärztin gsi i de Kontrolle und zum d'Akupunktur mache. Si het denn gseit, dass ihri Tochter dazmol wo si schwanger gsi isch en zackige Spaziergang gmacht het und denn hegend d'Wehe igsetzt, i söll da doch au emol probiere. Mier hets zwar gar nöd pressiert, bin au no gar nöd ungeduldig oder nervös gsi, wa d'Geburt abelangt, und trotzdem hani denkt jo i probiers doch mol us cha jo nöd schade. Immerhin isch de ET jo am 01.09. gsi, also han i no paar Täg Ziit gha...
Bi denn paar Täg spöter en zackige halbstündige Spaziergang mit mine Hünd go mache. Bim laufe hets recht geg abedruckt und im Buuch zoge. Dahei isch denn aber wider alles ruhig gsi...S'einzig wo denn gsi isch, vorem dusche isch mier zmol Wasser d'Bei abe gloffe, han gmeint d'Fruchtblose seg platzt. Es isch fascht farblos gsi und het nöd würkli noch Urin gschmöckt. Han denn im Spitol aglüte und es het gheisse i söll mi nomel 15 min bewege, wenns Fruchtwasser seg, denn chämis fortzue use. Isch denn aber nüt meh gsi und somit falsche Alarm...
Ha denn mim Schatz gseit, i würd gern nomel GV ha vor de Geburt, es isch doch scho e rechts Wili her gsi und noch de Geburt dörfmer/willmer jo lang nüme...
Usserdem hani wöle luege, öb da evtl. öpis bewirkt, do d'Spermie jo es Hormon drin hend wo Wehe chönd uslöse. Hend denn am 25.08. am Obig GV gha, und i han deno mini Bei a de Wand entlang id Höchi ufeghebt (en Tipp vo de Hebamm vom Geburtsvorbereitigskurs, dass de Muettermund chan i de Spermie bade 
) für öppe 5 Minute. Nochher hani öpe 2h lang chli Wehe gha, wo scho stärcher und regelmässiger gsi sind als die Vorwehene woni bis anhin amel gha han. Churz deno hani au vermehrt Schliim im Hösli gha, mit ganz chline Bluetchlümpli drin. Ha denn scho denkt, das chönt jo jetzt de Schliimpfropf si..Am nögschte Tag hani de ganz Tag dure chli Wehene gha, am Obig sinds denn stärcher worde. Am 10ni han i no im Swissmom gschribe gha, dass i Wehe heg und etz is Bett gang go en Horrorfilm (Dawn of the Dead) luege
Bi denn also im Bett gsi am Film luege, und die Wehene sind ufzmol immer stärcher worde. Han immer wider müese Pause drucke und ufs WC goh wenn e Wehe cho isch, han au Durchfall übercho. Han denn probiert chli ligge, bi so müed gsi, aber d'Wehe sind scho so starch gsi dass mi gweckt hend und i han nüme chöne ligge, bi mi afängs scho im Stoh am chrümme gsi..Denn hani mol de Hebamm aglüte, si het gseit i söll mol es Bad neh und luege wie d'Wehe denn sind. Da hani also gmacht, es isch genau glich gsi, vilicht es bitzli weniger schmerzhaft. Aber es sind nöd meh oder stärcheri Wehe i de Badwanne cho.
Bin denn nochere Virtelstund wider us de Wanne use und denn sind d'Wehe stärcher worde. Has denn probiert solang i cha uszhalte, do i jo weiss dass binere Erstgebärende lang goh cha, bis de Muettermund offe isch, und dass es ab und zue passiert dass mer vom Spitol wider heigschickt wird. Da hani uf kein Fall wöle.
Irgendwenn hanis denn aber nüme usghalte, ha denn wider de Hebamm aglüte und si het gseit i söll doch mol verbi cho. S'Gotti vo mim Schatz het üs denn ufegfahre, im Auto han i gar kei schmerzhafti Wehe meh gha luschtigerwiis. Am halb Drüü i de Nacht simer denn im Spitol gsi. Bin untersuecht worde, de Muettermund isch erscht 1-2 cm offe gsi, s'CTG het scho rechti Wehe ufzeichnet. D'Hebamm het denn gseit i chön nomel heigoh, und i han gseit i gang uf kein Fall meh hei, i seg jo in Spitol cho wil i d'Schmerze nüme usghalte han dihei. Si het denn gseit mier söllend e Stund go spaziere goh, aber es het agfange regne und isch chüehl gsi und i han nur es T-Shirt agha und han kuum chöne laufe, d'Wehe sind so regelmässig und schmerzhaft gsi. Sind denn wider inegange und hend dörfe s'Zimmer bezieh. Han zerscht no gfroget ab wenn i chönt e PDA ha (bi immer dagege gsi aber es het scho so weh tue, dass i scho mol Infos igholt han) und si het gseit die chöni scho etz ha wenn i will. Han aber verneint wil i d'Wehe solang wie möglich han wöle ushalte.. Im Gebärsaal han i scho eini ghört stöhne, ha mim Schatz gseit so wiit will is denn nöd cho loh..
Also sind mier denn im Zimmer gsi und i han so Schmerze gha, han denn bevor i e PDA nimm wöle öpis anders usprobiere. Also han i e "Entspannigssprütze" übercho, die het mi echli schummrig im Chopf gmacht und dass i s'Ganze entspannter cha neh. Bis d'Hebamm mier die Sprütze aber cho isch go geh isch au wider fascht e halb Stund vergange, währenddem i nüme gwüsst ha wie mit dene Wehe umgoh.. Nochem sprütze isches mier denn aber besser gange, d'Wehe hend au nüme so weh tue. Irgendwenn het d'Wirkig aber noloh und d'Wehe hend mi fascht überrollt...De Schatz isch währenddem ufeme Stuehl am schlofe gsi, und i bi mi vor Schmerze am chrümme gsi und han nüme chöne ligge, es het so weh tue, i chas gar nöd beschribe.
Hend denn d'Hebamm gruefe, sind wider füre in Gebärsaal. Ufem Weg döt ane hani öpe 5 Wehe gha und han mi a de Wand müese alehne, ha kuum chöne laufe. Schlussendlich hemers aber in Saal gschafft, bi denn wider untersuecht worde, da isch zwüsche halb Sechsi und Sechsi gsi. S'Untersueche het au nur mit Müeh und Not klappet, han nüme chöne ufem Rugge ligge, han müese chnüüle.. De Muettermund isch denn scho 10 cm offe gsi! Und denn bini au scho kurz drufab i de Presswehene glege...
Jo und denn isch de schlimmschte Teil losgange.. Het nie denkt, dass es no schmerzhafter cha werde als die Wehe voni vorher stundelang gha han. Ha denn e PDA wöle, aber nüme übercho, do i scho 10 cm offe gsi bin. Jo und denn di nögschte zwei Stunde bini wie i Trance gsi. Am Schreie, am Jommere, am Stöhne und Brüele. D'Wehe sind immer wider abklunge, han Nasespray und spöter no en Wehetropf übercho dass fürschi goht. De Nasespray hani denn bim dritte Mol geh nurno vo mim Schatz akzeptiert, i ha eifach nüme möge, d'Hebamme hetmi nurno gnervt.. Han au mol in Vierfüessler ufde Bode abe müese, ha mi kuum chöne bewege vor Schmerze. Döt ischs mier denn no schlechter gange, denn bini wider zrugg ufs Bett. Ufem Bett het mi d'Hebamme au immer wider "zwunge" zum d'Position ändere, si hend eifach alles wöle probiere dass di Chlii endlich chunt...
D'Hebamm het vo Afang ah gseit mer gseht scho s'Chöpfli, es gäng nöd emol e Stund...Nur leider isch de Chopf nur bi de Wehe und em Presse amel füre cho, und da nur millimeterwiis. I bin am Presse gsi so fescht i han chöne, kei Ahnig woher i die Chraft gnoh ha zum zwei Stunde lang presse... Irgendwenn inere Wehe woni presst han isch d'Fruchtblose platzt, en riise Chlapf hets tue und s'Wasser isch wiit füregsprützt, grad ad Hebamme ane, und min Schatz hets au no fascht troffe währenddem er mier es Glas Wasser gholt het. Het i nöd so wahnsinnigi Schmerze gha het i müese lache
Jo und denn hani presst und presst und irgendwenn sinds zwei Hebammene gsi, di eint hetmer vo obe uf de Buuch druckt zums Baby abedrucke. Denn isch eini links und eini rechts vo mine Bei gstande, und i han müese d'Füess bi ihne a de Hüfte dagege drucke, i bi denn so gspreizt gsi und ha müese presse und es het so weh tue, und denn wo de Chopf cho isch han i gmeint i stirb, i cha da gar nöd beschriibe... Zum Glück sind a de Decki so Tüecher agmacht gsi, i han di ganz Ziit drah grisse, so fescht i han chöne, mit aller Kraft...Han denn sogar paar Täg spöter dihei no Muskelkater i de Oberärm gha
Während em presse het denn d'Hebamme au gseit de Chopf seg etz dusse, und het mini Hand abegfüehrt und i han s'Chöpfli chöne alange. Da het mier denn no zuesätzlich di letscht Kraft geh zum alles geh. Denn nomel paarmol presse und denn han i nurno dörfe schnuufe und flutsch hets gmacht und üses Baby isch do gsi. Da isch sone befreiends Gfühl gsi, woni gspürt ha wie di Chli usechunt..Si het denn au grad gschraue und zu mier uf Bruscht dörfe. Grad inere nögschte Wehe isch denn au scho Plazenta cho.
Min Schatz het Träne i de Auge gha und i han nöd glachet, nöd brüelet, bin eifach nur überglücklich gsi sind die Schmerze endlich verbi gsi und dass üsi Ayana Linya gsund und munter gsi isch. D'Nabelschnur hemer denn uspulsiere loh und denn het de Schatz üseri Verbindig trennt.
Di Chli het e rechti Büüle am Chöpfli vorne gha, do si als Sternguckerli ufd Welt cho isch. Trotzdem isch si wunderschöö gsi. D'Hebamme hend mier gseit, normalerwiis müesmer d'Sternguckerli mite Suugglocke hole und i heg da super gmacht, füre Erstgebärendi und denn no es Sternguckerli. I heg anschinend es super Becki zum Gebäre
Bi denn no ca. e halb Stund gneiht worde, do mier d'Scheide innedrah grisse isch. De Damm isch fascht heil blibe, heg nur en ganz chline Riss geh, hend d'Hebamme gseit. Si hend mi denn globt dass i so guet vorbereitet han, denn hani ihne gseit i heg gar nüt gmacht, d'Dammmassage sowie s'Epi-No segend mier recht unsympathisch gsi
Währenddem i gneiht worde bin het di Chli s'erschte Mol a de Bruscht trunke und si hets vo Afang ah uh guet gmacht. De Schatz het üs leider während em Neihe scho müese verloh, wil er unbedingt no id Apothek het müese. Er isch denn aber am Nomittag wider zu üs zrugg cho.Di Chlii isch denn no gfötelet, gwoge und gmesse worde, de APGAR Tescht isch au super gsi (9/10/10) trotz dere lange, schwirige Geburt. Nocher het d'Hebamm si nebe mier bädelet und nocher han i no im Bett zmörgelet und dörfe go dusche, bevor i denn mit de Chliine zäme zrugg is Zimmer bin, wo mier denn bis am Mittwoch Mittag, 31.08., blibe sind.
D'Ayana Linya isch am Samschtig, 27.08.2011 am Morge am 09.08 Uhr ufd Welt cho, si isch 50 cm gross gsi, het 3370 Gramm gwoge und ihren Chopfumfang isch 36 cm gsi.
mir isches bim erschte dazumal ähnlich gangä! Gnüss ziit mit dinere tochter und dim schatz!
♥♥
♥♥
