Liebi Neela, jetzt fascht eis Jahr nach dinere Geburt schaff ich’s au na, din Geburtsbricht z’schriebe. Mängisch hani s’Gfüehl es isch erscht gester gsii und doch wirsch du morn scho Jährig!
Am 29.12. hämmer einisch meh e reguläri Kontrolle im Spital gha.
(zum bessere Verständnis: mir sind im Schnitt 14täglich i de Kontrolle gsi, will d’Schwangerschaft eifach schwierig gsi isch und mir sehr vill Angst um dis und au mis Läbe gha händ 
)Also, simmer am 29.12. ebe einisch meh id Kontrolle.
D’Irena hät Dienst gha, hät mi gad gfreut. Isch sie doch als 2.Hebamme bi de Geburt vo dinere mittlere Schwöster debi gsi und kännt vo dem her eusi Gschicht. (ha det ebe e Uterusruptur gha under de Geburt…)Sie fröget mich wies gaht und wo ich säg die letschte zwei Nächt seg ich immer wieder ab Wehe verwachet luegt sie mich nu gross a. Ich weiss was sie dänkt, ich sött ja ufgrund vo de Ruptur bi de Jella ihrer Geburt kei Wehe ha. Aber ebe…Sie hänkt mich also grad emal as CTG wos au grad es paar Wehe ufzeichnet. Sie meint wo sies gseht, sie lüti jetzt gad mal am Dökti a und ich wüssi ja was das heissi. Das Chindli muess mer jetzt hole!
Da sind bi mir scho eimal meh Träne gloffe. Mir sind eigentli i die Kontrolle und händ eus nach villne Gspräch duregrunge zum de Termin für de KS nachli nach vorne z'verschiebe. D'Ärzt händ en immer chli frühner welle aber ich ha so Mueh gha und so hämmer dänn ebe erst ganz en spate Termin usgmacht gha. Aber i de letschte Täg isch mir immer mieser und mieser gange und ebe, ich ha immer wieder mal Wehe gah... De Dr. W. (en Ushilf us Dütschland über d’Festtäg )isch cho, hätt sich vorgstellt und gseit : Wänn hole mirs? Jetzt? Und ich nume so: Nei, hüt gat nöd. Mir hetted kein Babysitter für dini Schwöstere gha und es isch mir eifach z’schnäll gange.(und ich ha doch am Namittag na welle zum Coiffeur!
) Also, hani usghandlet das mir morn am Morge am 6 wieder da sind und namal dörfed hei gha. Wenn aber irgendöppis seg, müesse mir SOFORT cho! Das isch klar gsi. Dänn isch au na gad de Anästhesist cho fürs Infogspräch. Denn han ich grad vom Spital us na mit de X. telefoniert, sie hett schliessli au muesse iverstande sie und Ziit ha! X.isch nämli eusi (Beleg) Hebamme gsi wo eus au bim KS het welle begleite! Das isch für mich/eus uh wichtig gsi! Au das hät klapped. Guet, tüüf dure schnuufe! Dänn sind din Papi und dini Schwöstere wieder zrugg cho, de Hr. W. isch gad füregloffe und seit so i mini Richtig „bis morn morge“ und din Papi luegt mich nume na gross ah! Han ihm dänn schnell in Gheimsprach d’Sache erklärt, so dass dini Schwöstere nöd mitbecho händ. Für die wärs eifach z’vill gsi, sie händ i de SS scho so vill mitgmacht und au immer Angst gha das öppis passiert.
So simmer dänn hei, händ dis Grosi informiert wo na hät muesse ihri Arbetstäg abtusche und din Papi hät dini Schwöstere dänn zu ihre bracht. Mir sind det scho wieder d’Emotione höch cho und Träne gloffe. Ich han sooo Angst gha, bin glichzittig so erlichtered gsi, das mirs jetzt bald gschafft händ und au so voller Vorfreud uf dich!
Am Abig hätt dänn na es paar Mal s’Telefon gschället aber mir händ keis abgnah. Ich ha die Ziit bruucht und mir händ na in aller Rueh (wämmer dem Zustand so chan säge
) eusi Täsche packt etc. Und dänn isches morge am viertel vor Foifi gsi und mir sind ufgstande und händ eus parat gmacht. Ich han natürli einisch meh muesse erbreche (wie scho die ganz SS dur) und bin mit de Kotztüte im Auto ghockt. Es isch so unwirklich gsi für eus. Und ich, ich bin immer na völlig dur de Wind gsi. Aber trotzdem hani gspüert, das ich au immer bi dir ha chönne bliebe!! (das isch mir uh wichtig gsi, will bi de Geburt vo dinere ältiste Schwöster wo ime NF KS gendet hät, hani das eben öd chönne und alles isch uh schlimm gsi.)
In X. acho, hät eus d’M. begrüsst und eus is rote Geburtszimmer begleitet. Det sind scho wieder Träne gflosse und Erinnerige ufecho.
Dänn isch dänn au gad X. cho. Das hät so guet tah und ich ha gwüsst, jetzt cha eus nüdt meh passiere! Mir händ gwüsst, sie wird eus begleite, dich in Empfang näh und sie kännt eus und eusi Wünsch. Sie hät mich dänn namal as CTG ghänkt und mir händ grad na mitübercho wie näbedra es Baby gebore isch! Dänn isch au d’Frau K., d’Chefärztin na schnell cho inegügsle und hät gseit sie gsäch eus dänn d’obe im OPS wieder. X. hät mir dänn na schnell Stützstrümpf agleit und dänn hämmer au scho ufe chönne. X. und din Papi händs Bett gstosse und ich bin i de Strümpf und em Spitalnachthemd selber ufegloffe. D’obe hani dänn grad chöne uf de OPS Tisch liegge und sie händ mich i warmi Tüecher ipackt. X. und din Papi sind sich schnäll ga umzieh und i dere Ziit händs mir welle d’Infusion und de Spinalaästhesie legge. Nun ja, das schneller gseit als gmacht, bi dene Vene wo ich ha! De Anästhesist und die Anästhesiepflegendi händ sage und schreibe 55 Min gha bis nur emal en Venflon gleit gsi isch. Die Pflegendi hät wie es Mantra immer s’glieche gseit: „Ohni Venflon chömmer kei Narkose mache, ohni Venflon chömer kei Narkose mache“. Das isch mir als Pflegefachfrau durchus klar gsi und ich ha ihre zwei oder drümal gseit, sie sölled eifach probiere, es gäch dänn scho irgendwo. Ich han trotz allem chönne ruhig bliebe und bin i Gedanke immer bi dir gsi und han mit dir gredt! Wo dänn de Venflon äntli (amme saudumme Ort, im Ellboge) gleit gsi isch, und die Spinali im erste Alauf gsässe hät isch dänn au din Papi wieder zu eus gstosse. X. hät mir dänn na schnäll, wie ich’s gwünscht ha, erst nach de Anästhesie de DK gleit. Und dänn mit übere Stund Verspätig isch es äntli los gange. Ich bin wiiter eifach immer bi dir gsi, han nüdt gseit und bi eifach dankbar gsi, das ich bi dem KS nüdt gspürt ha.. Und dänn isch es sowiit gsi: Mir händ din erste Schrei ghört! De Herr W. hät dich de X.ghä, sie hät dich eus ganz schnell zeiget und isch dänn mit dir und dim Papi na schnell in Egge wo sie dich husch husch schnell aglueget hät und schwupp di wupp bisch du scho bi mir uf de Brust gsi! Ja, i dem Moment isch für mich scho alles vergässe gsi, du häsch mich aglueget mit dine runde, grosse blaue Auge und ich bin eifach nume glücklich gsi!Sie händ mich dänn na wieder zämegflickt und du bisch immer bi mir gsi. Erscht nach einige Minute hanich mal din Papi gföget wer du überhaupt bisch. Und wo er mir gseit hät, das du euses dritte Meiteli bisch, bini uh glücklich gsi. (wäri genau glich au gsi, wenn du en Bueb gsi wärsch…
)Dänn händs mich dänn umbettet und ich ha dich grad wieder zrugg i mini Arme übercho und gad na schnell echli Schmerzmittel id Infusion… So simmer dänn zrugg is Gebärzimmer gfahre worde vo de X. und dim Papi. Det hät eus X. dänn ghulfe dich s’erscht mal ad Brust z’tue und ich han dich eifach immer muesse aluege. Es isch so wunderschön gsi und du bisch nackt, i warme Tuecher bis am Namittag uf mir gsi! Die tolli ersti Ziit hät mich und sicher au dich für vieles entschädigt!
Ja, Neela mir händ würkli Glück gha. D’Gebärmuetter isch scho wieder chli grisse gsi und es isch höchsti Isebahn gsi, das du uf d’Wält cho bisch. Ich und din Papi, mir sind voller Dankbarkeit und Demut das mir zweimal sooo viel Glück gha händ und mir alli gsund und munter sind!! Mir wüssed das das nöd selbstverständlich isch!
Du bisch euse Sunneschii, du häsch euses Glück komplett gmacht und mir und dini Schwöstere liebed dich über alles! Ja, und morn fiirsch du scho din erste Geburtstag!! Unglaublich, es isch es tolls Jahr gsi und ich/mir händ äntli wieder richtig chönne läbe!!
) Ja du, häsch es prima gmacht und häsch Freud gha. Jetzt dörfsch du au entlich id SG gah. I die SG wo dir dini Schwöstere scho so viel drüber verzellt händ, und wo du sit einige Wuche immer scho devo redsch. Chlini grossi Muus, ich ha dich soooooo fest lieb. Bis zum Mond und wieder zrugg....<3