VoLkI-ChIcKs - freued sich uf di neue Volki-Babies...

[Simbat]

@Lile: Oooh, ich han jetzt irgendwie grad vergässe, dass dis 2. ja es Meitli sich
Ich han ebe glaubs öppe 300 Artikel gha oder so, isch mega vill gsi zum aschribe, händ en ganze (Touran)-Kofferrum voll gha.
Dänn wünschi dir ganz vill Erfolg am Samstig und evtl. gseht mer sich ja.

@Okto: Isch schön gsi dich gseh z'ha hüt Morge!

[LiLe]

@simbat/börse: Isch leider gar nöd guet gloffe Aber "chlini" Kleider siged dasmal generell nöd eso gfröget gsi. Also falls öper interesse het a Buebe-Summerkleider Gr. 74 - 92 (allefalls stella_21 oder bella_stella) ich han no einiges

@simbat/spielgruppe: Bisch du mal go schnuppere?

[Simbat]

@Lile: Oh neeei, so schaad Ich frög mal no Kollegin ev. kännsch si (Claudia mit de Chiara), si hät no en Bueb wo jetzt genau die Grössi hät.
Ich han si eifach so mal agmälded, hät gheisse wänn öpper gaht chan si unterem Jahr mal inerutsche und susch dänn uf de Herbst. Bin dänn eifach sponti mal es Bsüechli go mache am Mo Nami, isch mega lässig, Lia hät grad wele bliibe und die wos am Mäntig Nami macht (Erika Weibel heisst si) hät gfröged ob ich si grad de Rest vom Nami well det lah. Voll sponti und nett, die isch mir meeega sympa gsi!

[LiLe]

@simbat: Wär natürlich super, wenn öper kennsch, wo d'Kleider no chönt bruche.

[Simbat]

@Lile: Ich gib ihre Dini Nr. ok?

[LiLe]

@simbat: ok

[okto]

@simbat: chume wie die alti fasnacht has au schön gfunde, dich resp. eu mal wieder zgseh! wo sind ihr denn schlussendlich go bade gange? hey, übernächscht wuche chann mer wieder go d saisoncharte vo de badi poste zu reduziertem pries!


schöne sunntig no!

lg
okto

[Arwen]

okto
Saisonkarte zu reduziertem Priis? Wo was wenn wer?

[okto]

@arwen:

Vorverkauf 2013: Montag 6. Mai 2013 – Samstag 11. Mai 2013 (kein Vorverkauf ist an Auffahrt 9. Mai 2013)

Saisoneröffnung 2013: Samstag, 11. Mai 2013

[Simbat]

@okto: Mir sind gar nöd im Hallebad glanded...

@Badi: Ich mag irgendwie gar nöd a Badi dänke bi dem Wätter *brrrr* aber frög mi ob sich de Stress lohnt, es gaht glaubs um 5.-- wo's billiger isch, oder?

[okto]

@simbat: warum stress!? mer hät doch während 1 ganze wuche ziit zum s abo poste! ja, gaht um fr. 5.- reduktion pro charte. aber, wänn wie mir, insgesamt 4 saisoncharte bruchsch, dänn lohnt sich das definitiv!

[Simbat]

@Okto: Ja logisch, bi eu lohnt sichs. Bi mir für 1 Charte weniger, ussert ich wär eh grad det obe...

[Simbat]

Hello Ladies

List da überhaupt no öpper mit?

Falls ja... machemer mal es Baditräffe de Summer?

Liebs Grüessli

[okto]

Guguus

Also ich luege da scho ab und zue ine.. Nume isch meischtens nüt neus zum läse da!

@Simbat: bisch scho i de Badi gsi? Mir händ d Saison gester offiziell eröffnet! Han scho am Do-Namittag welle ga, aber mini Jungs händ alli 3 mit Fründe welle abmache... Und spöter händs Training gha... Am Fritig simer bi de Kollegin gsi, die händ sit ca 1 Monet en eigene Pool im Garte - isch natürlich au nöd z verachte gsi! Hihi... Und gester häts dänn endlich klapped. Ha zwar am Vormittag no is Hallebad uf Uster müesse, will euse jüngsti Schwümmkurs gha hät. Und so simmer am Morge im Hallebad gsi go schwümme und am Namittag i de Badi obe!

@Arwen: Halli-Hallo! Scho lang nümm gseh....! Gahts eu guet? Du, dini grossi Prinzässin chunnt doch jetzt in Kiga, gäll!? Zu wem chunnt sie?



So, bruche nomal en Kafi! Schöne Sunntig eu allne.

LG
okto

[Arwen]

@Simbat
Also grundsätzlich wäri scho mal debi. Ich ha eifach immer so än Komplex wege minere nöd vorhandene Bikini Figur....

@okto
ja säg nüt, Dini Jungs gsehni zwar öppe mal wenn's vo dä Schuel hei chömed und mir grad uf eim vo dene Spielpis bi eu une sind. Mir sind jetzt aber au 2 Wuche i dä Ferie gsi.
Ja genau, di Gross chunt jetzt dänn scho in Chindsgi.... unglaublich. Si chunt zu dä Fabienne Hofer.
Eigene Pool tönt super. Mir sind au scho lang am dra ume studiere. Aber mir händ ja äs grosses Trampolin, da hämmer dä Garte nöd no wele miteme Pool vollstelle. Andrersits wär's halt scho no läss.... Händ ihr dä eifach is Gras gstellt oder uf öppis druf?

[okto]

@Arwen: Missverständnis mir händ kein Pool i eusem Garte. Sondern ä Kollegin vo mir! Und die händ so en richtige Pool mit allem Drum & Dra. Dh. sie händ es Ushueb mache la, denn isch betoniert worde, d Poolwanne inecho, usw. Also es grosses Teil mit Stäge zum inelaufe, Gägestrom-Alag. Voll cool - aber ich würdi keine welle. De Ufwand isch ebe au no rächt gross.
I dem Fall isch sie nöd i de gliiche Gruppe wie de Len! Aber ich dänke, mir gsehnd eus am Schnuppermorge!?

LG
okto

[Arwen]

@okto
Achso, jetzt hani dänkt ihr heged so was ufgstellt wie ja fascht i jedem dritte Garte staht. Aber bi Kollege mitnutze isch natürli no besser.
Oh schad, i welere Gruppe isch dänn dä Len? Weiss gar nöd wie viel Gruppe das es git.
Ja, am Schnuppermorge gsemer eus sicher. 24. Juni gell?

[okto]

@Arwen: 2 Chindergärtnerinne - 2 Gruppe! Jewiils gmischt mit 1. und 2. Chindergärtner. Genau, 24.6.

[Simbat]

@Okto: Leeeeiiider nein Wär sooo gern gester id Badi! Aber mis Grosi isch gester uf ZH cho (vo Bern) mit minere Cousine und die hät uuunbedingt welle in Zoo gah. Han vo Afang a gseit, mir werded sterbe vor Hitz und Gelatsche aber hät niemert welä uf mich lose... Zzzzz...
Ich hoffe druf, dass ich's am Do id Badi schaff und s'Wätter mitspillt.
Han hüt Abig 2 vo dine Jungs gseh! Mir sind e Wohnig vo usse go aluege (i de Nöchi vo eu), Besichtigung isch leider erst am Do, aber das wär meeega! Dänn hetted mir au en grosse Garte und au ändli Platz für e sones grosses Trampolin!

@Arwen: Ach, gaht doch allne glich mit de Bikinifigur, dur das lahni mir d'Badifreude aber nöd näh! Also los, gib der en Schupf!

@us: Mir händ grad 1 Wuche Ferie gha, leider vill z'churz! Bin 3 Täg älläi in Mallorca gsi, hät sooo guet ta, imene Hotel wo Chind nöd erlaubt sind Tja und de Rest vo de Ferie isch ebe z'churz gsi zum all das mache und erledige wo mer i de Ferie immerno sött und wett... und i de Nacht uf hüt häts mi au no flachgläit mit Halsweh, Schnuderi etc... pünktlich uf de 1. Arbedstag morn :-/ Aber immerno besser als chrank si i de Ferie

[okto]

@Simbat: PN!!!