Juhu auch wir legen los- die Schwangeren

[Valea83]

Liebi Fraue,

Danke vil mal für eui liebi Wort und Gedanke!

Mir händ de erst Schock so langsam chli verdaut. Trurig ischs und blibts. Bsunders am morge und am abig, wenni schusch mim chnöpfli guete Morge und guet Nacht gseit han, mueni hin und wieder es Tränli wägwüsche.

Morn müesse mer nomal ins Spital und luege ob z hcg abe isch. Hoffe chume so um d OP ume. Bis jez hani de Eileiter no und glaube au, dases so blibt.

Ich hoffe, ihr verstönd dasi mi vorläufig chli zrugzieh. Werde natürlich no mitläse und fescht an eu dänke. Wünsche eu en wunderschöni ss und alles gsundi und munteri chnöpfli!

Lg valea

[alessa]

Schönä Guätä Morgä Mitänand

Sarenz: wiä isch din Polterabig gsi? Hesches guät überstandä?

Rafa: Mir händ en Zwergpinscher er isch jetzt 2 1/2

Wendy: wiä gahts dir? Isch alles wieder guät oder muäsch immerno schonä?

Deidelina: wiä hesch du din Friitig überläbt mit dr müädigkeit?

Valea: Freut mich das es langsam berg uf gaht. lah dir ziit und *lassdichdrücken*

Feriä: bin froh z'körä das ihr au no feriä plant händ trotz SS-Buuch, das beruhigt mich gad

überraschig: diä isch voll glungä mit em Video , es hets niämert erwartet ka nur mini Schwägeri het vermuätet ka das ich SS bin.

Wünschä üch en wunderschönä sunnigä tag!

[Deidelina]

@alessa
Frog nit, bi denn am Fritig mit dr Chleine am 20.30H ins Bett gange und ha duregschlofe bis am Samstig am 9i.
Es het ämel guet do, das isch doch d Hauptsach.

Freut mi das d Überraschig so guet glunge isch.

@Wendy
Wie gohts Dir?

@Sarenz
Hesch guet polteret?

Muess jetzt no bitz öbis schaffe denn chani pünktlich Füürobe mache und s Wetter no e bitz gniesse.

[Sarenz]

@polterobe
Han e super Poltertag-/obe gha! Isch ächt luschtig gsi und alli mini Fraue sind ihgweiht. Solidarisch, händ au sie ned vill trunke sie händ sich mega gfreut für eus!

@alessa
Hesches am WE de familie gseit? Mir au eusne Eltere und Grosseltere, sie freued sich soo! Mis Mami isch so usem hüsli und het gseit dasi ab jetzt wüchentlich es Gschänkli bechume, das heig sie sich vor langem vorgnoh, dass sie das macht wenn s 1. Enkelkind unterwegs isch. Bini jo gspannt, sie isch glehrti Schniderin.

@wendy
Wie gohts dir? Isch besser?

[Wendy]

@alessa
Schön isch dini Überraschig gelungen. Es freued sich hoffentli all mit eui.

@deidelina
Bisch jede Tag so müäd?

@sarenz
Cool isch de Poltertag guet gsi. Was hend ihr gmacht? Bi chli gwundrig....

@me
Mir gahts so wit guet. Kei Bluetig meh und muess mi au nüm gross schone. Hüt merk id zwar chli am zieh i de Lischte. Janu jetzt lieg i chli uf em Sofa...
S Chopfweh isch au wäg und susch han i kei Beschwerde.

Schöne Abig eui allne und gnüssed d Sunne morn

[Sarenz]

@wendy
Mir sind in Züri unterwegs gsi. Händ en Foxtrail gmacht und ich ha müese Süessigkeite verkaufe. Het sogar fürs znachtässe glängt. Denn simer gmüetlich go ässe is Movie. S tollschte isch gsi, dass alli cho sind!

[alessa]

Sarenz: schön hesch din Poltertag chönä gnüssä und das dini Frauä sich mit dir freued.
Mir händs miner und siner familiä gseit, mis Grossmami weiss es aber nonig sie erfahrts erst an Pfingstä dä gömmer sie go bsuächä. Mis mami isch au voll usem hüüsli, obwohl das ja z'zweiti Enkelchind isch unglaublich diä Grosselterä

Wendy: schön gahts dir sowit wieder besser.
Ja es händ sich alli meega gfreut, bin gad überrascht gsi das alli sooo reagiert händ, vorallem mini Elterä. Ich bin halt au s'einzigä meitli zwüsched zwei buäbä isch für mini elterä halt scho schön wän Tochter äs chind bechunt wo au nur 1 Strass entfernt wohnnt
Händs ihr au scho gseit?

Deidelina: Mir gaht im Moment au so mit dr Müädigkeit, nur chan ich nöd duräschlafä verwachä immer wieder und beweg mich au sehr viel.

Chliini: wiä gahts dir? Scho lang nütmeh kört.

Gnüssed d'sunnä

[chliini22]

Mooorgä

Sorry.. bi chli im Schuss.. Endspurt vor dä Ferie und na jensti Sache zum erledige..
Es gaht solala.. eigentlich chani mi nöd beklage.. halt müedigkeit wo immer na nöd besser isch und dezue ane han ich e extremi polleallergie wo mich im Moment gad ziemli schliesst.. ohni antiallergikum isch es gad e riisä challenge.. bi nudel fertig.. :-S aber nur na paar tage dä chani 2 wuche am Meer erhole..

ha am mäntig na de ss-diabetes-test und undersuech..bi dän i dä 25ssw. ziiit lauft und lauft..

wie gahts eu allne sooo??

lg

[Carina16]

Hoi metenand

Ech be im Tessin am Sonne gniesse ond ha drom ändlech weder mol Ziit, mech chli usfüehrlecher be euich z'mälde. Hoffe, es god euich allne guet?

@chlinii: Oh, schön stönd dini Ferie bevor! Ech hoffe, das helft der gäge Polle ond chasch dini Müedigkeit au chli usläbe

@alessa: Schön hend sech alli so gfreut för euich! Wie gods dinere Müedigkeit?

@Wendy: Wie gods der eso? Alles weder beruihgt?

@Sarenz: Schön hesch en tolle Poltertag gha ond dini Fröndinnne hend sech chli met der solidarisiert Gschadet heds jo secher niemerem, hihi! Wie gods der met de Öbelkeit?

@valea: Vellecht lesisch jo chli met...? Ech hoffe, es god au üch einigermasse. Was esch im Spital usecho? Dänke fescht a dech ond hoffe, du hesch s'Schlemmschte bald öberstande.

@me: Vell gloffe be mer i de letschte Woche! Am Zischtig hemmer weder döffe zom FA go... Es esch alles guet: s'Härzli hed pöpperlet wie verrockt ond üses Wörmli esch scho 2,5cm gross. Drom esch au no de ET korrigiert worde; dä esch ez am 12.12.15. Das heisst, ech be ez scho i de 10. SSW. Ond ganz ehrlech, ech merkes! Mer gods tuusig Mol besser als die letschte paar Woche. Nor no sporadisch chli schlächt ond eifach en Bärehonger! Aber es esch en Wohltat, wenns eim chli besser god! Be sehr, sehr froh.
Mer hend am Zischtig nochem Termin mini Elter igweiht. Ech hane s'US-Föteli ine Rahme ineto metere Sprächblose "Hallo Grossmami, hallo Grosspapi. Ech freu mech, euich im Dezämber kennezlere!" Mis Mami esch fascht usgflippet vor Freuid, esch mega härzig gsi! Au mi Papi freut sech scho ond hed sech scho Gedanke gmacht, öb är de Vaterschaftsurlaub wos be ehm noni gäh hed, chönti röckwerkend als Grosspapi-Urlaub ifordere
Lange Rede kurzer Sinn: Mer gods grad herrvorragend ond ech be super glöcklech ond cha s'erscht Mol mini SS gniesse! Hoffemer es bliibt so. Am 5. Juni esch de grossi Ondersuech ond denn düemers de au im Räschte vo de Wält verzelle

Wönsche euich allne es wonderbars Wochenändi!

[Rafa]

Hallo zämä

So bin au wieder mal da

@sarenz
uiuiui polterabig ohni kein schluck alkohol isch ja klar häsch dini fründinnä müässä/därfä i euiäs wunderschönä gheimniss iiweihä! und umso schöner sinds so solidarisch gsi mit dir und händ nöd übertriebä...das sind ebä no fründinnä tönt würklich cool euiä abig...foxtrail isch immer lässig. han dä au mal in bern amnä polterweekend därfä machä...isch würklich luschtig gsi!
oooh da wirsch, oder besser gseit dis würmli sicher gaaaanz lässigi sachä vo dim mami übercho...so cool und dänn erscht no eimalig und öpis sehr bsundrigs wänn sie's selber macht!

@alessa
das glaubi dir dass eui überraschig iigschlagä hät wiä ä bombä so schön! isch immer schön wänn sich alli mit eim mit freuiäd!
weiss genau was du meinsch...bin au s'einzigä meitli zwüschäd zwei buäbä und mis mami hät sich soooo gfreut über ihräs erstä enkelchind...au uf dä siitä vom GG isch euisäs töchterli s'erschtä enkelchind gsi...isch halt scho öpis ganz bsundrigs! Aber sie freued sich natürlich jetzt au riesig übers zweitä

@deidelina
wiä gahts dir? isch besser mit dä müädigkeit?

@wendy
schön hät sich alles wieder beruhigt und dis würmli isch wohluf!

@valea
hoffä dir gahts dä umständ entsprechend einigermassä guät...dänkä viel a dich!

@chliini
schöni feriä und ich hoffä du häsch gli ruhä vo dänä doofä pollä

@carina
jeeeheee...han ja gseit äs wird besser äs freut mich sehr gahts dir besser und chasch dini SS endlich ächli gnüssä! und hey...herzlichi gratulation zum schlagendä herzli!

[Rafa]

oooh mich hani no vergässä

mir gahts tip top...dä buuch wachst und wachst...hoff dä stoppäd dänn scho mal mis würmli gschpür ich scho ganz guät und au vo ussä chan mer tritt scho äs bitzeli gschpürä. freu mich sehr uf dä gross ultraschall (organscreening) am 26.5 und hoff natürlich dass alles guät isch...bin gspannä obs sich dänn au schön outet...sägs eui dänn

trotz rägä äs schöns tägli....liäbs grüässli rafa

[Sarenz]

Kurzer Egopost: mer händ s wild schlagende Härzli gseh hüt! Oh es isch soo schön! Am 5.6. hani de nöcht Termin, d grössi stimmt bis jetzt aber exakt! Villicht hätts no en Zwilling geh, en 2. chlineri Blotere isch no ume, wo aber sicher nüt meh git.

@chlini
Schöni Ferie! Gnüsseds..

[Deidelina]

Hallo Zämme

Jetzt chumi au wieder emol drzue mich zmälde.

@Wendy
Nei bi nit jede Tag eso müed.
Es isch meistens, wenn ich im Gschäft nit eso viel ztue ha, das ich denn zObe unglaublich müed bi und scho am 19H chönt go schlofe.
Wenn ich aber viel ztue ha, denn isch es komischerwies nit eso.

@chlini
Schöni Ferie!

@Rafa
Jo d Müedigkeit isch je nach dem scho dütlich besser.
Und d Übelkeit het sich jetzt ganz verabschiedet.
Bi ämel nit trurig drum.

@Valea
Wie gohts Dir? Dänk ganz fest an Dich!

@carina
Gratulation zum schlagende Härzli.
Hoff Du chasch jetzt d ss gniesse.

@me
Ha grad nüt neus zum verzelle.
S Büüchli isch am wachse und ich ha wieder dunkli Hoor am Buuch becho, genau glich wie bi dr chleine damals.

[Rafa]

@sarenz
gratuliiiiiiiiiiiärä so schön!!!!!

[alessa]

Guätä Morgä Mitänand

...isch so ruhig da, alles ok bi üch?

Chliini: gnüss dini Feriä!!!

Carina: mini Müädigkeit isch immer no da, aber nüm so schlimm und wiä gahts dir?

Rafa: ja dä verstahsch mich ja

Me: han gester FA-Termin ka, alles tiptop bin aber luut berechnig gester bi 11+0 gsi eigentlich wäri ja erst bi 10+2
nimmt mi dä wunder was z'nächstmal usä chunt, dänn hani ETT am 10.06.2015

Lg

[Carina16]

Grüezi metenand

@alessa: Oh wie schön! Ech ha mech au gfreut wo ech no paar Täg gäge ufe korrigiert worde be Wie wenn das en Ondersched wörd mache öber die ganzi SS

@Deidelina: Donkli Hoor am Buch? Ehrlech? Hani no nie ghört! De gez vellecht no es zwöits Prinzässli

@Sarnez: Schön, gratuliere zom pöpperlende Härzli! Esch es mega schöns Gfühl gäll? De hed mer för ei Momänt d'Secherheit, dass alles in Ordnig esch...

@Raf: Be gspannt, öb mer gsed wases ged be der nöchscht Woche! Ond jo, ech be froh, dass du scho Rächt bhalte hesch, dasses ergendwenn besser werd! Danke förs Ufmontere! Be sehr froh, dassi nömme so muess liide... Ond mi GG au, hihi.

@me: Alles in Ordnig. Fühl mech wörkli om Wälte besser als no vor zwöi Woche! Ech muess eifach wörkli extrem vell ässe; ond das gsed mer aso sehr, sehr guet! Ha paar Chleidigsstöck wo ech bes jetzt emmer paar Kilo guet ha chönne verstecke, aber ez esch de definitiv fertig! Ond Buuch izieh esch scho lang nömme erfolgriich! Naja, i zwöi Woche döfemer zom grosse US ond de hoff ech, dass alles, alles guet esch ond mer ändli chönd reine Tesch mache. Geschter hemmer nomol e ganze Obe mini Schwegis agflonkeret, wo be euis zom Znacht gsi send: Ech ke Alkohol, ke Bönderfleisch im Salat, fascht igschlofe am Tesch am 8ti... Ond das Weekend gömmer metemene Kollegepäärli fort, wo mer eigentlech emmer schön chli Aperöled ond Wiiled... Ech dänke, spötischtens höt Obig wössids zwe Lüüt meh

Ech wönsche euich allne au es tolls Wochenändi ond paar beschwärdefreii Stonde!

[Rafa]

hallo zusammen

ja es isch würklich ruhig wordä....hoffe natürlich auch dass es allnä guät gaht!

@deidelina
bin also au immer viel müäder am abig wänn mir im gschäft nöd so viel z'tuä händ...isch glaub normal...mer wird so letargisch.

@alessa
schön isch alles tip top mit dim würmli...ohh bisch scho wiiter als du dänkt häsch...cool ich bin bi beidnä SS jewils zrugggstuft wordä!
machsch i däm fall dä ETT? also nackäfaltä messä und s'bluet?

@carina
ja gäll diä GG sind namigs scho au chli arm dra! aber ebä, supi gahts dir guät...wänn mer so voll drin steckt hätmer echt s'gfühl das segi jetzt diä nächschtä nün mönät so, also ich zumindest aber umso schöner wirds dänn würklich je länger je besser!
ja gäll das ewigä versteckspiel das han ich bi beidnä SS so mühäsam gfundä und bim aperölä wirds würklich immer sehr schwierig...aber wänns guäti kollegä sind isch ja nöd so schlimm wänns äs dänn wüssäd, bisch ja doch scho i dä 10. wuchä! händ ihr eui jetzt eigentlich chönä einigä was öb ihr dä ETT machäd oder eifach nur d'nachkäfaltä mässäd?

@me
mir gahts immer no tip top...han mit mim mami und mim töchterli paar täg im appezell verbracht...isch uuh schön gsi...und scho glii gömer id wärmi go bädelä....freui mich ja sooooo! aber z'erscht staht ja no dä gross US bevor am zieschtig...hoffä natürlich isch alles guät!

wünsch eui äs schöns langs weeekend

[alessa]

Guätä Morgä mitänand

Carina: Gell mä isch halt gad äs paar täg nöcher am ET
Händs ihr no niemertem gseit?

Rafa: Mich hets voll überrascht das ich gad 5 Täg fürähgstuft wordä bi mal luägä was Sie z'nächstmal meint.
Mir mached dr Nackäfaltätest und dr Bluättest aber nöd usserd es würdi gad öpis mega uffälligs si bi dr Nackäfaltä usw. wüssti jedoch eh nöd was machä wänn mir au bim Bluättest kei guäti nachricht überchämtet, ich chöntis glaub nöd abtribä vorallem jetzt wo mir im letztä Ultraschall gseh händ wiäs scho we äs Menschli uusgseht. Mir sind optimistisch und glaubed das alles guät isch

[Carina16]

@Rafa: Jo mi GG hed sech ständig Sorge gmacht om mech ond hed au deheime alles müesse eleige mache, vor allem ichaufe ond choche hani es Wiili gar nömme chönne! Das esch schöscht mi Part im Hushalt... Ond är hed rechtig metglette ond hed sech grusig Sorge gmacht om mech ond üses Schätzeli.

@ETT: Aso mer send euis einige, dass mer secher d'Nackefaltig möchid. De Räscht diskutiered mer no Ech wörd eigentlech gärn de ETT mache, be doch au nömme die Jöngschti... Aber ech ha au no Müeh wie d'alessa, mer vorzstelle was esch wenn öbbis uffälligs usechond... Aso wend Nackefaltig öbbis zeigt, de wörd ech secher welle wiiterteschte. Aber ech glaube ech chönt nömme abtriiebe (falls es "nor" Trisomi 21 esch zomendescht!)! Ech ha set einere Woche es Föteli vo mim Baby ofem Nachtteschli ond ech ha scho so vell döregmacht ond mer hend euis das Chend so gwönscht... Glaub wördes nömme öbers Härz brenge! Aber ech wär halt scho gärn druf vorbereitet, falls d'Chance bestod dasses ned gsond esch, damet mer au rechtig cha reagiere be de Gebort. Aber äbe... Mer diskutierid ond ech fendes e sehr e schwerigi Sach!

@säge: Aso ech ha am Tag vom positive Tescht e gueti Kollegin informiert, eifach well echs öbberem ha MÜESSE säge Mini Eltere hemmer letscht Woche igweiht, wellmer paar Täg met ehne i de Ferie gsi send ond das esch ned möglech gsi zom Gheimbhalte. Ond en Arbetskolleg vo mer weisses au, well ech einisch hei ha müesse well mer sooooooooooo schlächt gsi esch! Söscht weisses niemmer ond mer wärded au erscht enformiere, wenn bem nöchschte Ondersuech alles guet esch. Ech wett mech ehrlech gseid ned i de halbe Wält müesse go erkläre! Ond do ech am Afang so Komplikatione gha ha, hemmer au müesse demet rächne, dass echs verlüüre. Drom hemmer sowieso entschede, bes zor 13. SSW niemer z'informiere (aber äbe, ganz esches de halt gliich ned möglech gsi)... Ech wörds au s'nöchscht Mol genau weder so mache, för üs esches ok. Ond ech werde eh ned öbber sii, wo das do a die gross Glogge hängt. Die wo frogid wellsis gsänd oder merkid, die bechömid de aber e ehrlechi Antwort Ond d'Familie öberraschemer de natürli scho rechtig

Sorry, esch en Roman worde... Verabschede mech ez weder! Tschüssi

[Sarenz]

Hoi zäme

@carina
Schön gohts der besser! Jo es schlagends Härzli isch soo schön! Es beruhigt sehr, aber jetzt hoffi soo dases bim nöchte Termin immerno schloht!

@ETT
Mir mached nume d Nackefaltemässig. Händ niemer ide Familie und bi jo au no unter 30gi. Abtribe chönnti sowieso ned..

@säge
Bi eus wüsses scho es paar. Vorallem Familie und gueti Fründe. Die Wuche hani meteme Arbetskolleg gred und de heter mir gseit, dass sini Frau die Wuche positiv testet het. Ich ha soo freud gha und hanems au grad müese säge!

@me
Hallo Schwangerschaft! Mir isch de ganz Tag schlecht, chönnt au de ganz Tag schlofe und de heisshunger... Zerst hani lust uf das..denn 5min spöter doch lieber das..etc! Irgendwie hani au s Gfühl, dasi langsam es Büchli bechume, vorallem Znacht weni im Bett ligge wölbt sich langsam öbbis..ide 8. Wuche?? Isch das möglich?
Na, mir händ jetzt 2 Wuche Ferie und ich bin froh drum! Die Wuche bini halt eifach chli chränkelig gsi, aber länger hätti das ned chönne durezieh! Vorallem isch min Arbetskolleg us de Ferie zrugg wo nach eim Tag scho gmerkt het, dass do öbbis ned stimmt!

Wünsch euch es ganz schööns verlängerts Wucheend.