Der Geburtsbricht ha ni eigentlich scho lang welle schriebe aber ig han irgendwie nie so Zyt gfunde.
Der ET wär erscht am 19. Auguscht gsi..der Siro hett aber frühcher welle uf Welt cho. Also alles vo Afang a..da, ig scho vor der Schwangerschaft immer gern i Akupunktur bin gange ha ni das au i de letschte vier Wuche welle mache zur Geburtsvorbereitig und so bini am 28. Juli i Akupunktur 2. mal und Nachtschwöschter isch extra am Nomitag cho dermit si sicher Zyt hett für mi. Wär hätt jo denkt dass ig i der Nacht scho wieder chume..Ig han extra no gfrogt gelled si der Buch isch no dobe und si hett das bejaht..tja, han mi druf igstellt das es 2-3 Wuche got. Aber das isch jo alles anders worde.
Deheime ha ni mit mim Maa e gmüetliche Obig gnosse..es feins esse und ig han sogar gluscht gha ufnes Gläsli Wy. Ig han während der ganze SS nämlich fascht nüt trunke. Am elfi bini de müed is Bett min Maa hett no öppis am PC gschaffet. 1 h spöter bini im halbschlaf ufs WC und han gmerkt das mini Fruchtblase tröpfelet. Min Maa hett meint ig träume, da er überhaupt nid dermit grechnet hett das es scho chönnt losgoh. Ig han de sofort is Spital aglütet und si hett gmeint mir söllet gmüetlich fertig packe und de cho. Am Morge am 1 si mir im Spital gsi und ig han scho langsam e härte Buch übercho aber absolut no erträglich. Im Spital händs mi as CTG ghänkt und es hett scho regelmässigi Wehe azeigt gha und der Muttermund isch 1cm offe gsi. Mir händ de is Gebärzimmer gwechslet und Wehe sind regelmässig cho. Ig bi immer uf de Bei gsi so isch es mir am wöhlschte gsi. Min Maa hett nebedra sicher no e gueti Stund gschlofe. Da, er no nid im Bett gsi isch er natürlich total müed gsi. Ig komischerweis überhaupt nid obwohl ich jo au nume 1 h gschlofe han. Nach 2 h isch der Muttermund mit dehne uf 3 cm offe gsi und so ha ni der Wunsch g'äusseret i Badwanne z'go. Am vieri bi ni de i Badwanne dört sind Wehe sehr sehr heftig worde und ig han nach Schmerzmittel verlangt wo si mir intravenös gsprützt händ aber leider nid gnützt hei da es vorwärts gange isch. E halb Stund spöter bi ni scho wieder us der Badwanne. D'Hebamme hett de gmeint si göi schnell use und kei Minute spöter hani scho die erschti Presswehe gha und mir si ellei gsi. Ig han de zu mim Maa gseit das chönni doch fascht nid si und han mi nid getraut zum presse und scho isch die zwöit wieder cho und ig bi immer no gstande. D'Hebamme isch de zum Glück wieder cho und hett mi untersucht und gmeint das got jo rassig..in 45min 6cm. Es isch au während de Presswehe nie hektisch wurde und e halb Stund spöter isch der Siro do gsi mit eme stolze Gwicht vo 3470 gr. und 50 cm lang.
Alles in allem sind für mi würklich 2 h heavy gsi vo der Geburt s'andere isch guet erträglich gsi und has guet chönne verschnufe.
Da, alles so schnell gange isch ha ni viel Blut verlore und bin no 5 h im Gebärsaal bliebe. Die erschte 24 h bi ni ziemlich wacklig uf de Bei gsi und han e Infusion brucht. Spitalzyt ha ni in schlechter Erinnerig und dört wirdi sicher keis 2. Mol gebäre. Am Afang ha ni ziemliche Babyblues verwütscht und ig bi überzügt inere andere Umgebig wär vieles anders gloffe.
Kurze und schnelle Geburt von Siro 29. Juli
Moderator: Phönix
