Juhu auch wir legen los- die Schwangeren

[JeyJey]

@lifa: So schön! Ich ha die Vorwehe/Senkwehe no 'gern' gha, sie stimmed eim langsam uf dGeburt ii und mer setzt sich mitem Gedanke usenand, 'loszlah' und sich druf z'freue, sin Körper wieder für sich z'haa. Wünsch der jetz scho mal alles Gueti für dGeburt!!

[natchen86]

Hoi zäme

Lang isches här voni mi gmäudet ha... Mir hei chli ä turbulänti ziit hinger üs

Am 2.7 (39+6) isch üse sohn, nachere heftige und sehr schwäre Geburt zur wäut cho. Leider het är dermasse stress und schwirikeite gha daser nid gad het gschnuufet... Dür das heter ä schlächte PH wärt gha und de heisi ne gad uf d Neo due. Är isch am afang so schwach gsi daser ä Magesonde het brucht und ä kompleti überwachig (ekg, suurstoffghaut etc) ä tag spöter isch no uscho daser ä infekt het ufgläse u de heisi no antibiotika über ä infusion müesse gä... Für üs isches dr absolut horror gsi ihn müesse dert z lo... Är het immer wider surstoffsättigungs abfäu gha und nach eländ lange 2 wuche heimer de ändlech üse schatz chönne heinä är isch ä sone goldschatz und verwöhnt üs mit ruhige nächt. Vo afang a düregschlofe (7-8) stung
Leider heimer letscht wuche di nöchscht hiobsbotschaft bercho: sehrwahrschindlech heter ä milcheiweissallergie... Jetz berchunnter spezialpulver und so langsam bessere d symtom...

I hoffe öich aune geits guet (ha leider no nid aues chönne nocheläse...)

Bis gli u schöne obe auersits

[lifa2016]

Jöööö natchen! Ich gratuliere euch ganz herzlich!!! Da händer aber würkli en sehr turbulänti zit hinder eu! Milcheiwiissallergie, de nimmi a dörfsch gar nid stille? Vilicht e blödi frag, aber känne mi da überhaupt nid us... Uf jede Fall, schön isch de chli maa jetzt mi eu dihei und laht eu sogar durepfuse <3

@me: ich muess gad mal chli jammere, drum es grosses SORRY vorneweg! Di Nacht öppe 3h gschlafe... Zwar "erst" wuche 35 aber ich weiss nümm wie ligge ohni das entweder d bei weh möched oder d ärm nid ischlafet. Oder es isch em chline maa nid wohl... Denn stahni uf und tiggere durch d whg, min gg wird wach und mir sieched beid nur so irgendwie durch de tag. Me sött dänke, gueti Vorbereitig für nachane, aber es staht ja no genurt bevor und wenns so witergaht, frögi mi woher mir d energie sölled nä. Becki tuet au immer meh weh... Und di stützstrümpf sind ja soooo mega bequem ... Aso ihr gsehnd, ich freu mi bald scho wieder min körper für mich z ha und natürlich de chlii maa känne z lerne. So fertig gjammeret, schliessli simmer sowit alli gsund

Wünsch eu e schöns und nid z heisses tägli

Lg valea

[JeyJey]

@natchen: Gratuliere vo Herze! Oh jesses, das isch wörkli en turbulente Start! Wie händer das usegfunde weg de Allergie? Ich frög mich bi eusere Chliine ebe scho lang, öb sie en Allergie het, well sie so vill chötzlet...

@valea: Ohjeh du Armi, ich kenne das. Ich ha die letschte 2 1/2 Mönet immer nor 3-4 Stund chönne schlafe und bi die halb Nacht umetigeret oder go näihe... und denn isch das Schreibaby cho, de Horror. Aber irgendwie isches im Fall gliich gange. Ich drück der alli Düüme fürt Geburt und die erschti Ziit denaa. Es chunnt sicher guet, heb nochli dure!!

[lifa2016]

Huhu zäme

@jeyjey: Kollegin vo mir hät au es Baby gha wo chli vil gchötzlet hät. Sie hät aber kei Allergie. Vo dem her, chasch glaubs nid da druf ga. Aber han da nonig so vil erfahrig , da gits sicher lüt wo da besser qualifiziert sind
Gäll di chline gäbed eim de sooo vil zrugg und sie möcheds ja nid extra, eus wachhalte . Ich freu mi scho uf de momänt wo eus de chli de zum erste mal bewusst agrinst <3

@lisettli: Wiä gahts eu so?

@me: hüt hämer wieder Kontrolle im Spital gha . Huiiii isch de chli maa gwachse! Mir händ di 3kg Gränze scho knackt. Wehe hani keini gha in dere halb Stund am CTG aber defür die Nacht emal eini woni au sehr dütlich gmerkt han. hihi bin gad chli verschrocke . In zwei wuche hämer dr nöchst Termin, falls de chlii bis denn nid cho isch. Find das no en uuuuu spezielli situation gad. So de Gedanke, dases jetzt jedi Minute chönnt losgah und au d Hebammene und d Ärzt wo eim jedes mal wieder säged, vilicht bis bald... Bin sooo gspannt uf d Geburt! Und obwohl dasi weiss, dases wahrschinli en uuuu huere chrampf wird si und ich mir d schmerze no gad gar nid vorstelle chan, freui mi druf, wenns ändlich sowit isch und ich em gg chan alüte oder säge "Auto packe und ab" . In dr Famili sind au alli scho ganz chribbelig

So gnueg träumt . Wünsch eu es schöns Weekend. Gnüssed das toll Wätter

LG
Valea

[JeyJey]

@valea: Schön freusch di so uf dGeburt! Ja gäll, me fangt aa jedes Zieh gnau z'beobachte und frögt sich amig, öb das jetz ächt sStartzeiche isch mir sind 3 Woche or ET im Kino gsii und ich ha all 10min Wehe gha, det hani mi scho gseh is Spital fahre... dehei bim Dusche isch denn alles wieder ruhig gsii. Losgange isches denn erscht 9 Tag spöter Wegem Lächle: Zerscht wirsch vo euchem Chliine denn 'nor' mitem Engelslächle bim Ischlafe/Verwache beschänkt. Bewusst lächle wird er wohl ersch 4-8 Woche noch de Geburt. Aber es isch denn definitiv en tolle Moment!

[natchen86]

Hoi zäme

Mercii vou mou

Allergie: i ha bim wickle chli bluet im stuhl gseh und de bini gad zum Kinderarzt... Da är ä entzündig oder infekt usgschlosse het, heter üs die diagnose gä. Leider gits kei Tescht wo üs das zu 100% bestätigt, da aber innerhaub vo paar tag nachem pulverwächsu kei bluet me isch din gsi und är viu weniger Blähige het gha, geit dr Doc vo däm us...

Häbet es schöns Weekend

[lifa2016]

Öööööööööhhhhm fraue, ich ha gester de schlimpfropf verlore wehe no keini und au kei Fruchtwasserabgang... Trotzdem chunnt mer gad no chli früeh vor. Wär scho no schön, wenn sich de chli maa no zwei oder vilicht sogar 3 wuche zit lah würd

D hebis sind no all ganz entspannt, nur ich bin chli am hypere und analysiere gad jedes ziepe und stäche

Sorry für de egopost

[JeyJey]

@valea: Denn gahts jetz ab i die heiss Phase! ... freue mi uf Babynews!!

[lifa2016]

Guguuus

Sind no am warte aber Wehe händ dütlich zuegno. Ab hüt simmer offiziell es Terminbaby Juheeee

Wie gahts euch so? Mich tunkt es isch u mega still worde im Forum (nöd nur in dem Chat)...

LG
Valea

[JeyJey]

Jupi Valea! Bi ja gspannt...

Ja gäll, isch wörkli allgemein ruhig worde

[lisettli]

Hoi zämme

Lang lang ist her... ha mi schon lang nüm gmäldet, aber immer wieder mol churz inegüggslet

@Natchen: Jö, ganz ganz herzlichi Gratulation!!

@Valea: Hui das tönt jo wirklich als giengs nüm lang

@jeyjey: ui schön het sich das mit dim Töchterli langsam beruhigt.

@me:Es lauft unheimlich viel im Moment... Si no in de Ferie gsi e Wuche, in London, es isch mega schön gsi aber eifach mega heiss in dr Stadt, ich verträg die Hitz nüm so
Gest hani sit längerem wieder mol e Kontrolle gha, da mir i de Ferie gsi sind und d Hebamme au no 3 Wuche wäg gsi isch. Alles tip top, de oder die chlei wachst guet und turnt flissig i mim buch ume Bin jetzt in dr 17. Wuche und ha bis jetzt 3kg zuegno... mit ritte vo mim chline Rössli isch daher erscht mol sense... bi langsam zschwer für sie.
Abr han jetzt wirklich e mega tolli Hebamme gfunde. Sie erklärt eim alles mega guet und entscheidet au nit über mi kopf hinweg si erklärt mr bi allem vor- und Nochteil und lost mi denn abr wirklich bi allem sälber entscheide.
Jo und denn hani no es grössers Projekt näbezue am laufe, woni wirklich noni gnau weiss wie und wo ich das söll apacke... Mini Familieverhältnis si nit ganz eifach. Mini Eltere hei ufem Land imene grosse Huus mit Umschwung gwohnt, mini Mam isch aber vor 4 Joor uszoge und mi Vater isch biz en Sammler... Cheut euch vorstelle wies dört jetzt usgseht, mini mam het das immer rächt guet im Griff gha mit mim Vater aber er elei... Bin hüt churz dobe gsi will ich ihm wött hälfe dört uszzieh, das Huus isch scho so alt und Baufällig, ich wart scho fascht druf bis i s telefon bechum d Hütte seig zämegheit... Es sind wirklich keini Zueständ, abr mi Vater brucht bi allem leider 3 Tritt in Hinter bis mol was goht. us eigener Kraft schafft er das nit und jetzt hani gfunde ich hilf em, bevor euses Kindli chunnt, abr ebe es sind Messi zueständ dört hinde, im wie ums Huus, es het mi wirklich fascht zruggschlage... und denn wär do no mini schöster wo zwar 24 isch abr ihres Läbe au nit so ganz im Griff het... sit dr Lehr arbetslos und hockt mim vater uf dr täsche, spielt nur internetspieli und het s geistige Alter vo öbe 15ni... Ihre versuechi zhälfe dass sie mol sozialhilf bechunnt und ändlich mol lernt verantwortig für ihres läbe z überneh. Ich weiss echt nit woni bi dem Berg söll afange...

[lifa2016]

Hoi zäme

@lisettli: das freut mi händer e gueti Hebamme gfunde wo eu passt . Git es vil bessers gfühl. Huiii das klingt nach zwei grosse Megaprojekt wo da am laufe häsch. Tuet mer leid! Ich hoffe, dass das alles guet klappt no vor dr geburt. Dörfi fröge: Wott dini Schwöster kei Stell finde oder suecht si und findet keini. Sind schwierigi Situatione so.

@me: Sorry fraue, muess mi gad mal richtig uschotze. Ich mag nüüüüüümmmmmmm Han hüt so richtig de Schwangerschaftskoller. Fühl mi erstens wiä en Walfisch ohni Wasser, zweitens chani kum meh schlafe, drittens hät das h*** Karpaltunneldings agfange. Wenni amigs in dr nacht wäge mine WC gäng verwache, tuet de eint arm so höllisch weh, dass an schlafe nümm z dänke isch, denn blibt das Taubheitsgfühl de ganz Tag, denn die doofe Sänkwehe (wenns doch nur richtigi wäred). Und zu allem überdruss hani jez no z gfühl ich werdi chrank. Han so blödi aphte uf de zunge und fühl mi wiä am afang vonere verchältig... Judihui! Und debi simmer no nid mal überfällig. Ich hoff, ich überträg nid no am schluss. So fertig gjammeret. Sorry für mis jammere... hans mal müässe loswerde

So wünsch eu e schöne Sunntig und löhnds eu guet ga

[lisettli]

Hallo Zämme

Das weiss i au nit so gnau, i ha chli de idruck mi Schwöster het eifach zwenig Ehrgitz und sie gseht kei Handligsbedarf. Hotel Papa isch jo gemütlich.
Das ganze isch mittlerwile mol agloffe, de ersti schritt isch gmacht und ich ha, nachdem i zerscht mol e schock gha han über die Zueständ, langsam Hoffnig dass mr das cheu schaffe, irgendwie. S isch zwar immerno en Bärg und ich wär echt verlore, hätt ich nit mi schatz im Rugge wo mi immerwieder stützt. Ich hoff eifach mi Schöwster und mi Vater packe das und bliebe dra. Muess zwar im Moment no recht hindedra stoh aber es goht mol öbis.

@lifa: oje... jo das tönt nit luschtig. Wie gohts dr?

[lifa2016]

huhuu zäme

@lisettli: Freut mi gaht öppis a dere front . Isch d schwöster jünger oder älter? Isch halt sonen sach, wenns gmüätlich isch, gseht ebe nid jede handligsbedarf, leider . Hoffe es chunnt bald guet. Wie gahts dir mit dr ss? Sind eigentlich nur mir beidi aktiv da inne?

@me: Sind immer no am warte... am weekend mal churz e chline Fehlalarm gha, womer gmeint händ es göch los. Wehe sind in dr Badwanne stärcher worde aber plötzlich wieder weg gsi und in 2 stund bini 24h wehenlos blibt spannend

Wünsch eu en guete Wuchestart

[lisettli]

Hey lifa

jo es isch sehr ruhig do inne... Isch überhaupt no öber schwangers ume?
Also euches chrümeli machts jo wirklich spannend wie gohts dir suscht so?

Mini schwöster isch 2joor jünger... Abr ebe, ihre isch s schaffe nit in d wiege gleit worde...

Mir gohts eigentlich rächt guet, mis chrütz gspüri ame biz, und i fühl mi langsam nüm so liechtfüessig wie früehner . De buuch isch in letschter zit au ziemli gwachse und chunnt mr ame scho biz in wäg bi jetzt afangs 19. Wuche, sit 1 wuche gspüri ganz fiini bewegige vom chline zit lauft momentan u schnell.

[lifa2016]

Hey lisettli

Ich glaub sind würkli nur no mir beidi! Huuuiiii hoffentlich überchunsch bald verstärchig usem Hibbelthread! Ich druck dume

Jööö scho 19. Wuche! Di Zit rast würkli nur so! Di erste Bewegige hani soooo faszinierend gfunde. Gar nid gnueg übercho. Und hüt machts amigs richtig weh, wenn de mössiö mal wieder Party macht Freut mi aber gahts dr schusch so guet , hoffe das blibt so.

Ja euse chli machts scho chli spannend. Hüt sind mal wieder es paar Wehe cho und sit de letschte Wehe vor öppe 2h chani kum meh laufe vor luter Schmerze in dr liste und im Becki. Hoffe fest, dass das es guets Zeiche isch. Het nüt degäge wenns hinicht losgaht au wenns mer denn leid tuet, dass di einzig im ss-thread bisch. Schribsch no nöimed andersch mit?

Händ ihr z gschlächt vom chline eigentlich welle wüsse oder nid? *Gwundernase*

LG
Lifa

[lisettli]

Hey lifa

Jetzt tönts abr langsam wirklich drnoch als würds nüm lang go I druck dr d duume das alles guet chunnt! Wo söll s chline denn uf d wält cho?
I hoff au biz dass usm hibbelthread de eint odr ander no nocherütscht i schrieb suscht niene meh mit, ich lies bi de Februarkrümelis ame chli mit abr das si mr fascht zviel mit guet 30 stück i dem Thread...

Nei, mir möchte is bezüglich gschlächt gärn überrasche lo mis gfühl tendiert zumene Bueb obwohl ich eigentlich scho lieber es Meitli hät aber ich nimm natürlich au gärn es Büebli

[lifa2016]

Hoi lisettli

Hauptsach gsund . Mir händ am afang mega dänkt mir überchömed es Meitli, aber denn ischs rasch seeeeehr eidütig gsi dases es Büäbli wird . Freued eus natürlich genauso, aber händs doch gad müässe istecke, dass mer mit eusem Gfühl sooo falsch gläge sind. Händ scho de name und di erste pinkige Söckli glismet gha hehe da hät mi di wiiblich Intuition zimli im stich glah.

Han damals no bi de septemberlis mitgschribe, aber det lauft überhaupt nüt, wil glaubs all uf fb sind. Au jetzt wo sicherlich scho de eint oder ander pfüdi da isch, schribt da niemert. Drum bini froh bisch du nahgrutscht... hehe schusch wäri ja au elei in dem Thread gsi

Hüt isch bi eus wieder mal wehetechnisch tote Hose Het aso nid dänkt, dass di letschte Wuche soooo an de nerve zehre chönd. Fascht wieder wiä wome ghibblet hät und jedes piekse und zieh im UL gad go google isch in dr utopische Hoffnig das eim Dr. Google doch genau säge chan, wenn dases losgaht Naja, mir wartet witer

De chli sött im Kantonsspital in Winti uf d wält cho. Wohned gad mal 10 min vo da ewäg, drum mega praktisch . Du, häsch dr scho chli Gedanke über d Geburt gmacht?

[lisettli]

Hoi Lifa

Das isch so jo.
ui, jo guet emene Büebli steu viellicht au pinkigi Söggli
I bi jedefalls mega gspannt was es de git, mol luege ob i richtig ligge

dr Dr. Google, de gueti alti kolleg

In Winti? De wohnsch du jo in dr gliche Gegend wie mim Schatz sini Familie, ihm sie schwöster het meinti au vor emene joor in Winti entbunde
10 Minute isch natürlich mega praktisch. Mir hei is für es Geburtshuus entschiede, das isch so ziemlich s erste gsi woni agfange han sueche, mir seit die Atmosphäre vomene spital eifach nit zue. S Geburtshuus ligt zwar 30 Min. Autofahrt entfernt (sofern euses Krümeli nit grad zur Rush-Hour vor het sich uf de Wäg zmache), abr s isch mega schön dört und es isch nur 15 Minute vom Spital Olte entfernt, also wenns müesst si, wäre mr schnäll dört. Ich hoffs allerdings nid. Mi wunsch wär scho e natürlichi Geburt.
Hesch du e Geburtsvorbereitigskurs gmacht? Was chunnt do so uf eim zue in somene Kurs? Cha mr das irgendwie nit so recht vorstelle