So mi Termin isch gsi.
Auso wo fahni ah:
Dass me falls d EL-Durchlässigkeit nicht gäh isch öpis cha dran mache, sig es Märli, das isch mau Punkt eis. Auso wes nid guet isch, chönt me nüt mache, auso müesst me diräkt künstlech befruchte, aus angere würd i däm Fau ke Sinn mache.
Aber, d Ärztin gloubt, dass d Durchlässigkeit bi mir gar nid igschränkt isch, sondern, dasses e Momäntufnahm gsi isch bzw. dass mes bi mir mitem US gar nid gseht. Wüu, si fingt, es gäbi irgendwie keni Hiwise druf, dass bi mir e Störig vor EL-Durchlässigkeit chönt vorlige. Und dr Polyp wo "villech" da isch, het ou ke Ifluss, wüu wener da isch, wird dä sowieso so chli si, dass es mi kes bitzeli are SS hinderet. D Spermie chöme sowieso düre, und wener grösser wär, würd är z Ei höchstens ar Inischtig hindere. Aber das sig bi mir uf ke Fall möglech, wüu we dr FA no nid mau sicher sig gsi, cha dä unmöglech so gross si, dasser dert woner isch würd störe.
Das bringt mi zu Punkt 2: mir wärde das am Mäntig nomau teste und zwar anstatt mit US mau mit Röntge. Ou das bringt nid sicher es Ergäbnis, cha aber, wemes gseht und we d Durchlässigkeit doch guet isch, zmingscht entwarnig gäh und wenn nid, wirdi glich wyt si wi vorhär.
E Buchspiegelig macht därum ou nid unbedingt Sinn, wüu si cha z Problem nid behäbe, sondern isch nur e no besseri Methode zum z Problem i däm Fau erkenne. Vilech weni de verzwifle, wüui nie e Antwort bechume, chas si, dassi das irgendwenn verlange. Im Momänt wirds aber grad nüm Thema si.
Fakt isch, d KiWuKlinik wird mi aktuell NID behandle. Grund: i ha viu es z höchs Gwicht und si wei nid e SS häufe herbizfüehre bire Frou wos zu grosse Risike ir SS cha cho.
Das heisst: ig muess zersch abnäh und wüui wahrschinlech ke Chance ha i so churzer Zyt, wenn überhoupt, das ellei z schaffe, wird ig mi iz mitem Thema Mage-Verchlinerigs-OP oder Mage-Bypass-OP müesse beschäftige. Wüu de hani e reali Chance im ne Jahr es Gwicht z ha, wo z Risiko nüm so höch isch und ig när uf natürlechem Wäg oder mit Hilf vor KiWu-Klinik cha/darf SS wärde.
Zum jetzige Zytpunkt rate si mr vore SS ab, das heisst nid, dassigs nid doch wirde versueche.
I verstah das aues, aber bi glich grad chli gschocket, ha das haut nid wöue köre... Puh. Es wirft mi irgendwie ir Planig es Jahr zrug und ig ha unheimlech Angst.
- wär seit mr, dass es när guet chunt?Dr Einzig Liechtblick isch, dassi irgendwie mi fröie, vilech ändlech mau mis Gwichts-Problem wäg z becho... Hoffentlech, villech... ach weiss nid, i gloube ou nüm a Wunder.
05/2018 & Doppelpack 10/2022
Ah ha d Frag no nid beantwortet gloub. Bi ZT 17 und ES müesst i de nächste 3-10 Tage si. Ha mim GG gseit, dass mr iz doch no das Jahr chöi e positive Test ha, de müesse mr haut iz de wider brav "üebe"