Eusi Lana Lia esch äntli do!

[Timmy]

Geburt vo de Lana

Am Mäntig, 18.01.2010 han ich de Tim id Spielgruppe brocht und ben dänn zo de Kollegin go käfele. Sie hät en Neujahrs-Kafi-Rundi met es paar Kollgeinne gmacht. Han scho bizli Ruggeweh gha, aber suscht ischs mer guet gange. Am halbi 12i hani de Tim abgholt vo de Spielgruppe und dänn esch mis Mami eus go hole. Zäme met minerer Schwöschter und ihrere 5-Wuche alte Tochter send mer i es Italienischs Resti go z Mittag ässe. Han feini Spaghetti gässe. Dänn send mer go poschte und s Mami hät eus weder hei gfahre. Am 3 han ich dänn langsam Wehe übercho. De Tim hät ufem Sofa pfused und ich ben dänn au nochli anegläge. D Wehe send rächt liecht, aber scho regelmässig all 10 Minute cho. Min Maa esch am halbi 6i heicho und ich ben dänn id Badwanne, will ich han welle wüsse, eb d Wehe blibed. Sie send scho all6-7 Minute cho, aber emmerno sehr schwach, chuum schmerzhaft. I de Badwanne sinds dänn hüfiger cho, all 4-5 Minute. Dänn han ich beschlosse, de Tim im Mami z geh, damit mer ihn ned z Obig dänn müend wecke, wänns richtig los goht. S Mami hät deTim gholt. Er hät sich gfreut, will sie ihm versproche hät, dass er bi ihre dörf bädele. Min Maa hät dänn no öppis chlises z Nacht gässe...ich han ned möge. D Wehe sind immerno sehr regelmässig, aber schwach gsi. Also händ mer no „Alles was zählt“ und „GZSZ“ glueget. Dänn han ich aber s Gfühl gha, ich han chli Fruchtwasser verlore. Ben mer aber ned sicher gsi und han de Hebamme telefoniert. Sie hät gmeint, mer selled cho...wenn’s Fruchtwasser esch, müess ich sowieso blibe. Also send mer am halbi 9ni im Spital gsi. Ben dänn afeng 1cm offe gsi und d Wehe uf eimal weg! Han scho gmeint, jetzt muess ich weder hei! Aber de Fruchtwassertest isch positiv gsi, uff, zum Glück! Dänn gohts ja glich äntli los! Und dänn uf einisch send d Wehe weder do gsi. Und zwar ganz heftig! Ich han zo mim Maa gseit, dass ich mich ned chan erinnerer, dass die bim Tim so rasch so heftig gsi send. Ich han nur no gseit, dass ich das dänn ned 12 Stund ushalte! Am viertel vor 10ni esch dänn d Hebamme weder cho. Sie haät en Riise Stress gha, will grad no 2 anderi am Gebäre gsi send. Sie hät mich untersuecht und gseit, dass gli no en anderi Hebamme chunt. Sie hegi verstärchig gholt. Sie hät mich untersuecht und gmeint, es segi scho 5cm offe...s Baby chämi no vor Mitternacht. Ich han nor uf d Uhr glueget und de Chopf gschüttlet. Han mer ned chönne vorstelle, dass das so rasch goht. Und dänn esch die ander Hebamme cho und es isch dänn scho badl rächt heftig witergange. Ben froh gsi, han ich chönne umelaufe und mich bewege. Dänn send scho Presswehe cho. Da d Frcuhtblase nur obe neumet chli grisse gsi esch und unde no völlig intakt gsi esch, hät d Hebamme dänn d Blase no gsprängt und es ich uh rassig vorwärts gange. Gli scho hät d Hebamme gseit: „Tanja, jetzt muesch abelange, s Chöpfli chunt! Und s Baby hät ganz vil langi schwarzi Haar! Das esch sicher esMeitli!“ Wow, esch das es Gfühl gsi, s Chöpfli und d Höörli vo min Baby z gspühre und z wüsse, dass es nur no ganz churz goht, bis ich mis Baby s erscht mal dörf gseh, ghöre und hebe! Das hät mer Chraft geh für die letschte Minute! Und am 22.59 esch sie äntli do gsi, eusi chli Lana! Ich han chönne zueluege, wie min Maa d Nabelschnuer duregschnitte hät. Und ich han chönne lose, wie mis Baby brüelet! Sooo schön!
Eifach die blöd Näherei am Schluss hetti ned müesse si. Es isch uh schmerzhaft gsi und esch mega lang gange. Min Maa hät die Chli ganz lang dörfe hebe. Und dänn händs eusi Lana gmässe und gwoge: 51cm und 3490Gramm und 36cm Chuopfumfang und dänn agleit. Grad nach em Nähe händ mer müesse de Gebärsaal ruume. Es isch Action gsi uf de Geburtsabteilig! Mer send ines Zimmer cho. Min Maa esch dänn noch churz blibe und hät zueglueget, wie eusi Tochter scho ganz toll a de Bruscht trinkt. Und am Morge am eis esch er hei go pfuse. Er hät versproche am morge am 8i met em Tim verbi z cho, damit mer en ruhige Momänt z vierte händ, zum euses neue Familiemitglied kännezlerne. Ich han natürli die ganz Nacht ned chönne schlofe sonder han nur eusi schöni, gsundi Tochter chönne bestuune und han natürlich allne müesse SMS schribe zum die tolli Neuigkeit z berichte!

[schlupis]

I gratuliere ganz herzlech zu öiem Tochterli.
Dr gross Brüeder isch sicher ganz stolz.

Gniesset die schöne Momente z 4. es isch super schön.

Alles gueti für d Zuekunft u vorallem gueti Gsundheit

[sibey]

jööööööööööööööööööö!!!! so schön!!!! gratuliere hier nochmals

[Gschänkli]

Timmy: schüttel schüttel... es schüttelt mich grad - hast Du so gut geschrieben - dachte grad ich sitz neben Dir im Gebärsaal! Lana hatte es halt doch am Schluss eilig.. schön dass es so schnell schlussendlich vorwärtsging! Gesund und wunderschön ist sie - ich gratuliere Dir nochmals zu Deiner Prinzessin

[ensemen]

Jö, herzig! Sehr schön geschrieben! Jetzt habt ihr so ein herziges Päärchen zuhause wie wir! Freue mich mega für euch!

[gotti]

WOW, sooooo schöööööööööööööön!!!

[schlingel]

vielen Dank für den wunderschönen Bericht. Das ist ja super schnell gegangen. Wünsche euch von Herzen alles Gute und viel Spass mit der Tochter Lana

[schnuesibuesi]

Ha grad gseh, dass e Geburtsbricht dinne hesch, denn muess ich jo gar nümme nochfroge
Tönt aber nachere schöne schnälle Geburt! Freut mi!

Und sie isch e ganz e Härzigi!