Dä Lenja ihri wunderschöni und schnälli Wassergeburt

[Turbohuän]

Idä Nacht vom 8. uf dä 9. Mai han ich komischerwiis vill weniger müese ufs WC wie die vergangene Nächt.
Wo dänn din Papi am 1:30 Uhr ufs WC isch hani gfunde, ich göngi au grad - wänni ja scho wach segi.
Woni han welle ufstah hani gmerkt, dass mir öppis s’Bei ablauft. Zerscht hani churz Angscht gha äs segi wieder Bluet, doch dänn hani grad a Fruchtwasser dänkt und han dim Papi gseit, er sölli mir äs Nastüechli gäh. Ich bin dänn ufgstande und is Badzimmer gschlurft und han debii immer wieder müese lache. Äs isch äs komisches Gfühl gsi das warme Wasser s’Bei ablaufe zgspüre!
Dä Papi isch dänn natürli au ufgstande und hät grad welle los fahre in Spital. Ich hanen dänn chli müese brämse und säge, dass mir jetzt eis nachem andere mached. Ich bin also ufem WC gsässe und han Awiisige gäh: s’Telefon hani müese ha zum im Gebärsaal euisi Akunft azkündige, dänn hämmer dim Brüeder Kimi müese bscheid gäh dasses los gaht, die letschte paar Sache händ no id Spitaltäsche müese und dä Nachber hät müese informiert werde, damit er hät chöne uf dä Kimi ufpasse.
So simmer ca. am 2:15 Uhr abgfahre in Spital. Deht acho hät mich grad d’Hebamme äs erschts Mal untersuecht mit Ultraschall zum din Zuestand und s’Fruchtwasser züberprüefe, abtaschte vo dä Gebärmuetter und dänn bini scho as CTG aghänkt worde. Dir isches tiptop gange, aber Wehe häts chum ufzeichnet. Das isch aber gliichziitig euises Glück gsi! Da ich i dä Schwangerschaft uf Streptokokke positiv teschtet worde bin, händs mir im Spital müese Antibiotika gäh und die händ 4 Stund bruucht bis zu dä volle Würkig. So hani am 2:45 Uhr die erschti Dosis übercho. Leider hät d’Hebammeschüelerin mini Vene nöd guet verwütscht und sie isch ihre wäg grollt. Aua, das hät dänn weh gmacht! Dä zweiti Versuech hät dänn die erfahreni Hebamme gmacht und das isch tiptop gange. Wos Antibiotika dine gsi isch und dini Herztöndli nomal per CTG überprüeft worde sind, hät d’Hebamme und d’Ärztin gmeint, mir sölled die nächschte vier Stund nochli versueche zschlafe und dänn chöm ich dänn nomal Antibiotika über und öppis wo d’Wehe sötti arege.
Also hät sich dä Papi ufs Ohr ghaue und hät gschlafe wie en Steiesel 
Ich bin natürli hellwach gsi, bin ich doch rächt ufgregt gsi, dass du bald bi euis sii wirsch!
Am 6:30 Uhr sind euis d’Hebamme und d’Ärztin wieder go wecke und ich han äs chliises Bächerli mit Wehetröpfli übercho und 6:45 Uhr die 2. Dosis Antibiotika. Zu däm Ziitpunkt hani aso doch scho chli Wehe gha – die Tröpfli händ aso igschlage wie ä Bombe!
7:15 Uhr häts no en Hebammewächsel gäh und ich han wieder ä Hebammeschüelerin zueteilt übercho. Wo die „Neue“ in Gebärsaal cho sind, hani scho ganz starchi Wehe gha woni scho uh fescht han müese verschnufe. Und sie sind au i ganz churze Abständ cho!
Wo mich also d’Hebamme frögt, ob ich jetzt id Badwanne welli hani gseit, das chöni jetzt nüme. Doch i dä nächschte Wehepause hämmers also gschafft is Wasser zwächsle. Äs isch ä riese Erliechterig gsi und das warme Wasser hät so guet tah!
Dä Papi isch dänn aso die ganz Ziit am Wannerand gsässe und hät mini Hand ghebed, wo ich bi jedere Wehe fescht han chöne drucke.
Am 7:30 Uhr hani dänn no rascht hei aglüüte zum mit em Kimi rede – d’Wehepause hät grad für äs paar churzi Sätz glanged. Er hät dänn no gfröged, was mir dänn so lang machedi und wieso du noni uf dä Wält segisch 
Nachher isches Schlag uf Schlag wiiter gange! Hebamme hät mich undersuecht und gseit, ich segi bereits 7cm offe. Da hämmer ali schön gstuunet. Zwei heftigi Wehe spöter hät sie mich aglueged und gfröged, ob ich dä Drang zum Prässe hegi. Ich han bejaht und so hät sie nomal en Undersuech gmacht – und dä Muettermund isch aso scho die ganze 10cm offe gsi! Also hani ab dä nächschte Wehe dörfe prässe. Nach 5 wiitere Wehe hät d’Hebamme gseit, s’Chöpfli segi scho fascht dusse, etz müesi nomal alles gäh. Dä Papi hät dini viele schwarze Höörli also au scho gseh!
Ei Wehe spöter isch dis Chöpfli gebore gsi und nach ere wiitere Wehe bisch du durs Wasser uf d’Wält gschwumme!
Äs isch äs unbeschrieblich schöns Gfühl gsi und wos dich mir uf dä Buuch gleit händ isch d’Wält für mich still gstande! Du häsch so wunderschön usgseh mit all dere Chässchmieri am Körper, häsch so fein gschmöckt und din warme Körper hät sich eifach perfäkt agfühlt!
Mir sind Träne abegloffe und dä Papi isch au ganz hin und wäg gsi vo dir!

Ich han ä wunderschöni, schnälli und unvergässlichi Geburt dörfe erläbe und bin sehr dankbar defür!

Du bisch am Mittwuch, 9. Mai 2012 am 8:14 Uhr mit 49cm, 3022g und 33.5cm Chopfumfang uf d’Wält cho.

Lenja, du bisch äs riesegrosses Gschänk für euis!
Lenja, du bisch so wunderschön und perfäkt!
Lenja, mir liebed dich über alles!

[2boysmam]

Hallo Turbohuän,

wunderschöne Geburtsbricht vo euere Lenja.
Wünsche eu alles Gueti und vieli unvergesslichi Moment mit ihre.