Geburtsbericht Gian Lennox

[lennoxsophia]

Gian Lennox
Am 18.12.07 23.15 Uhr hani wie agrührt wehen becho. Bin no am Laptop gsi und han plötzlich so es steche uf de rechte siete gha.
Wie Sietesteche eifach tusimal meh.
han mir den mal es heisses Bad gmacht. Leider isch es nur no schlimmer worde.
Denn han ich den mal din Papi gweckt und ihm gseit er söll mir mal es Dafalgan ghä. Leider hät das nöd würkli was bracht. So han ich im denn gseit er söll doch al i de Frauenklink Tel. und frage wie mir wieter sölet vorgha.
Die Hebamme hät den gmeint mir söllet no warte bis Abständ alli 5 Minute chömet. Nachere Stund hani gseit ich halte das nüm us und ich möchti in Spital gha.
Das hemer denn gmacht. Bi denn en halb Stund as CTG cho und meh hät scho gseh dasi wehen han. Hebi hät mi den untersucht und gseit das de Gebärmutterhals nur no en Zentimeter isch aber meh nöd.
Sie dänki das de Vorwehen sind und mir eigentlich wieder hei döfet gha usser ich sig unsicher und ich möchti da blibe. Ha den aber gseit denn ginget mir hei,wäri aber froh, wenn sie mir was gege Schmerze chan ghä. Das hät sie den au gmacht. Han es Zàpfli gege Bauchkrämpfe becho und eis gege Schmerze.
Dihei hani diä den grad gno und ha eigentlich wele go schlafe. Aber leider isch mit dem nöd würkli was gsi.
Han wieder diä Krämpf gha trotz Schmerze. Also hets für mich gheisse, Badewanne ine und Badewanne us. Leider häts kei besserig ghä. Nei es isch mer no uh schlecht worde und ich han dauernd müsse erbräche.
Am morge am halbi Achti het mich din Papi gfragt ob er söll go schaffe gha. Obwohl er kei Stund gschlafe het. Ich han den gseit, mir wäris lieber, wenn er dihei würdi blibe, wel ich so Schmerze gha han und so nöd möchti ellei blibe.
Er hät den is Gschäft aglüte und mal gseit das er am Vormittag nöd chömi. Isch also keis Problem gsi.
Denn hät din Papi wieder i Klinik aglüte a de Tagesärztin und diä het gseit mir söllet verbi cho das chämis ja nöd sie.
So simer ca. am 8.15 wieder uf de Gebursabteilig gsi. Das ganzi wieder vo vorne, en halb Stund as CTG und denn bini wieder untersucht worde. Und siehe da MuMu 3 cm offe...Juhui..
Die einti Hebamme het den zu de Lehrhebamme gseit das sie Gebärzimmer ging go parat mache. Din Papi het denn gseit, wieso mümer ines anders Zimmer? ich han ihm den gseit wel du hüt söttisch uf Welt cho. Er isch völlig perplex gsi.
Im Gebärsaal acho, hani den dinere Nana agüte und ihre gseit das Du sehr wahrschinlich hüt uf Welt wirsch cho.
So um diä 12 Uhr hani den mal es Bad gno und es hät mir würkli sehr guet tah.
leider hani immer wieder müsse erbräche, bi jedere wehen. Ca. am 14 Uhr hani den gseit ich möchti doch en PDA. SIe hent dem am Narkosearzt tel und de isch denn au sehr schnell cho.Er hät den gseit, dass er anhand vo mim Ruggeunfall nid en PDA sondern en Spinalanästhesie mache wird. De Unterschied siggi eifach, dass es bim dem Mittel direkt is Ruggemark sprützt wird. Oh man han ich Angst gha.
Aber Hebamme Ladina und au ihri Kollegin sind uh lieb zu mir gsi und de Papi het mir bi dem ganze immer Hand ghebet. Es hät also scho sehr weh tha wos da gsteckt hent. Aber kurz drufabe hani kei wehen meh gspührt gha.
Am ca. 16 Uhr hents denn gseit, well de MuMu vo 5 cm nüm wieter ufgange isch, dass mir zusätzlich no en Infusion gent mit Wehenmittel. Das isch denn au passiert. So ca. am 17.50 isch den Oberärzin Frau Stählli cho und het gseit, dass mir Blasen wirdet spränge wills trotz Infusion kei Fortschritt gebi. Sie het mir denn au grad gseit, dass es bis ca. am 20 Uhr en Fortschritt muss ghä sie süscht müsset en Kaiserschnitt mache, well das eifach für mich wie au für Dich denn irgenwenn nüm so guet wäri. Han den uh Angst gha, und han alles gmacht damits en veränderig git.
Am ca. 19.45 het mich den Ladina untersucht und mir leider gseit das es kei Fortschritt ghä heg. Ich bin nur no am brülle gsi und han uh Angst gha vorem KS. Frau Dr. Stähli isch den cho und het mir gseit das sie au nomal lugä muss wel sie ja de KS macht. Sie het mir den glichzitig au grad de Katheder gsetzt. Ich bin nur no am brüllet gsi. SIe hent mir den alli aber gseit das da scho guet chämi.
So bini den ca. am 20.10 im OP gsi und sie hent mich parat gmacht und au no de PDA oder sowas ändlich gsprützt wel diä Spinalanästesie wo ich becho han am Nami häti für OP nöd glanget.
Irgendwenn isch den din Papi nebet mir gsi und Narkoseärztin het den zu mir gseit das de KS agfange hegi. Ich bin völlig perplex gsi und nur am zittere. Sie hät den aber au gseit da sigi ganz normal. Plötzlich het sie mir den gseit es wirdi jetzt denn en starke Druck ghä wenns Dich holet. Ich han mich den so uf das konzentriert das ich gar nöd checket han, dass du scho duse bisch. Bis din Papi gseit hät ghörsch ihn schreie. Und plötzlich JA ich ghöre Dich. Sie hent dich den schnell zeigt und sind grad mit dir weg und de Papi het dich chöne begleite. Du bisch am 19.Dez. 07 am 20.46 Uhr uf Welt cho.
Kurz drufabe isch den de Papi mit dir zrugg cho, Du bisch so en süsse Fratz. Ich bin nur no am brülle gsi vor Freud und vo de Unfassbarkeit das Du endlich bi eus bisch.
Mich hents den no zäme genäht. Mir het Aerztin gseit das es ca. 20 Min. gad. Das sind diä längste 20 min vo mim Läbe gsi.
Wo ich den fertig gsi bin hents mich wieder in Gebärsaal bracht wo Du scho mitem Papi gwartet häsch. Ich han dich den grad döfe i Arme neh und du häsch erste Mal döfe a de Brust trinke .
Ich han den diä ganzi Nacht no döfe im Gebärsaal blibe.
Din Papi isch den ca. am 23.45 Uhr hei gange.
Danke Gian das Du bi eus bisch.

[BlackCat0401]

wow...da hast ja echt einiges mitgemacht...

sehr schön geschrieben...ich wünsch euch alles gute

[Sumsi]

Frasli
Herzliche Gratulation zu Gian Lennox. Du hast den Geburtsbericht wunderschön geschrieben.

lg und alles Gute Sumsi

[2boysmam]

Wunderschöne Geburtsbricht.

Ich gratuliere eu ganz herzlich zu eume Gian. Wünsche eu alles Gueti

[kleines Würmchen]

Ganz än schönä Geburtsbericht, häsch ja einiges durägmacht.
I gratuliere Dir ganz herzlich zu Eurem Gian und wünsch Eu ä wunderschöni kännälärnziit!