lange warte hät sich glohnt....

[chlini-79]

10. April 08 da wäri din errechnete geburtstermin gsi. a dem tag hani gad termin bim FA gha. er hät gmeint du segisch parat zum cho und dä muettermund segi au scho biz offe... jetzt heissts nume no warte uf dä startschuss!

5 täg spöter hani CTG gha. i han dis härzli schlage ghört, ganz luut. häsch zapplet wiä ä wildi im buch. d'hebamme hät richtig mühe gha dir nozlaufe.

dir häts richtig gfalle i mim buch dirn. 9 täg nochem ET hani mol dä wehecocktail übercho. PFUIIII isch da gebräu grusig gsi! doch au i däre nacht häsch du mich und dä papi schlofe loh..
am nöchste tag isch wieder CTG agstande. wehetätigkeit isch gleich null gsi. da gebräu und da viele laufe und putze hät gar nüt gnützt. du häsch eifach i mim buch welle blibe. kei wunder, i wär au drin blibä. so schön warm... d'hebamme hät mer der vorschlag gmacht gha mer chönnts mol mit ileite versuche.. gesagt, getan, so hani den diä nöchsti nacht im spitol verbrocht. sie hend mir äs zäpfli geh gha. und den häts gheisse warte...

Noch 24 stund isch gar nüt passiert. sogar die wehe wo i vorher gha han sind verschwunde gsi. am CTG hät sich nur no dnodle vo dim herzschlag bewegt... i ha gwüsst, dir gohts guet i mim buch, aber doch bin i entüscht gsi dass ileite nüt gnützt hät. i bi uffm bett gsässe und mer sind träne nur no abegrollt. dä papi und d'hebamme hend mich den tröstet. mer hend den besproche wieäs wiiter goht. i ha 2 möglichkeite gha. entweder no einmol probiere mit ileite oder süscht än KS. für mich isch dä fall klar gsi. well nomol ä sone entüschig mit ileite hani nüm welle erlebe. so hani den für dä nöchsti tag än termin für dä KS übercho.

12 täg nochem ET isch din grosse tag gsi. di ganzi nacht han i und dä papi nöd chönne schlofe. dä KS isch so gege 15 uhr agseit worde. also isch dä papi am morge no gschaffe gange. am 11 bini den is spitol. i ha nöd mol mini täsche uspackt gha scho isch dhebamme idä tür gstande und hät gseit gha dass i idä nöchste 30 min. in OP gschobe werde... schnell hani am papi aglüte er sölli cho, schliesslich hät er din geburtstag nöd welle verpasse. churz noch sim itreffe sind mer in OP. um 12.28 hani den din erste schrei ghört. mer sind träne nur no abegloffe....
träne vor freud.... träne vor erliechterig....

dä papi hät dich nüm us dä auge loh. er hät dhebamme uf schritt und tritt verfolgt. kurz noch dä erste kontrolle hani dich den törfe aluege. ha dich törfe streichle, dir törfe än kuss geh. am liebste wär i gad vom OP-tisch ufgstande und het dich niämeh losloh. dä papi isch den mit dir in ruheraum gange. dert hät er gwartet bis i zu eu uffe cho bin. und denn isch dä moment cho uf dä wo i 9 mönet lang gwartet han. i ha dich endlich i mine arme chöne schliesse...

dä 22. April 2008 isch definitiv dä aller schönsti tag i mim läbä.. liebi Mia, es isch din geburtstag.. mer liebed dich so sehr.

[MamaMo]

Hallo Chlini-79!

Ganz en herzige Geburtsbricht häsch gschribe! Das hät mich grad extrem a mis Erläbnis erinneret. Bi mir häts schlussändlich au en KS geh, nach erfolglosem Ileite bi ET+11...

Ich wünsche Eu alles Gueti!

[soundgarden]

jö, ganz schön geschrieben.. danke

[knudli]

hi chlini....
schön häsch das gschribä...!
alles guäti witerhin....!

lg knudli

[Jiddl]

Hoi Chlini

Schön gschribä. Wünsch eu alles Gueti.

Liäbä Gruäss
Jiddl

[samirah]

jöh, das isch würkli härzig gschrebe!!

vell spass mit euchem schätzi