Die Geburt von Prinzessin Emily Christina

[swissalicious]

I bin d Emily Christina und wetti eu vo miner Geburt verzellä aber i mues chli usholä damits verständlich wird.

I han mi bim Mami im Buuch sooo wohl gfühlt, s isch richtig warm und kuschelig wordä. Klar bini biz gwundrig gsi wiä ds Mami und min Daddy usgsehnd aber pressiert hets mer nid. I han am Mami au kei Problem gmacht für di ganzä 40 Wuchä. Usser dass am Mami am Afang uh schlecht gsi isch. Aber sie und de Daddy hend sich so gfreut uf mi, dass sie das halt uf sich gno hend.

Ab Wiähnachtä hend ds Mami und de Daddy chum meh chönä wartä! Sie sind immer nervöser und gspannter und ufgregter wordä.

Am Mentig de 5. Januar 09 het s Mami im Spital aglütä will sie gmeint het Fruchtwasser tröpfli usä.
Im Spital acho hends zerscht em Mami irä Bluetdruck gmässä und mini Herztön abgloset. De Bluetdruck vom Mami isch uh höch gsi, aber wahrschindli nu will sie so nervös gsi isch. Mier ischs guät gangä. Denn hends glueget öbs tatsächlich Fruchtwasser isch oder nid und hend au no kontrolliert öb min Chopf scho gnueg wiit unä isch und öb de Muetermund scho offä isch.
Ui het das weh tuä wo d Hebammä mitem Finger isch go luägä, sie het min Chopf no chönä usem Becki stossä, das isch denn unagnehm gsi. De Muetermund isch nonid offä gsi und es isch au kei Fruchtwasser gsi wo tröpflet het sondern s Mami het glaub eifach d Blasä nümä so guet unter Kontrollä gha will i so drufdruckt ha.
Also simmer wieder hei und s Mami und de Daddy hend sich druf iigstellt dases no es Wiili gaht.

Am Friitig 9. Januar het s Mami no de Terminuntersuäch gha bi de Fraueärztin, mier isch das eigentlich zimlich egal gsi. Aber s Mami het sich erhofft dases guäti Neuigkeitä git i glaub sie het zimli gnuäg gha vo mier im Buuch. Sie het mal immer wieder gseit dass sie nid chan wartä bis sie mi im Arm het.
Also d Fraueärztin het iri Untersüäch gmacht, mini Herztön gloset und em Mami iri Wehä kontrolliert. I bin top fit gsi aber ds Mami het eifach kei Wehä gha. Denn hets no Ultraschall ge und de Fraueärztin het öpis gar nid passt. Es het nämli zwenig Fruchtwasser gha. sie het zum Mami gseit dass wenn i bis am Mentig am Morgä nid vo selber usächo wetti (de Termin isch de Sunntig 11. Januar gsi) müässed mier am Mentig am Morgä am 8ti is Spital go iileitä.
S Mami isch ganz verstört gsi, sie het doch wellä dasi vo sälber chumä. Also het sie und de Daddy am Wuchäend alles möglichä probiert zum mier en Astoss geh zum doch no vo selber cho. Aber mier isch das alles zimlich Wurscht gsi, mier ischs ja guet gangä im Buuch.
Über Nacht also vom Sunntig uf de Mentig het s Mami immer wieder Wehä gha aber nid starchi und nid regelmässigi.
Also sind s Mami und Daddy am Mentig am Morgä is Spital gloffä und hend sich probiert druf iizstellä was chunt..

12. Januar:
Nachdem d Hebammä, isch glaub ganz e Netti gsi, ds Mami het sich uf jedä Fall wohl gfühlt, ds Mami untersuecht het und mini Herztön und em Mami iri Wehä kontrolliert het, het sie gmeint, dass de Muetermund schön weich isch und scho 3 cm offä, mier gahts guet und de Chopf hani scho ganz im Becki inä gha.
Sie het denn am Mami e viertel Tablettä gä wo sötti Wehä uslösä. De ganz Morge het s Mami aber nu wenig Wehä gha und isch mitem Daddy am uno spilä und spazierä gsi.
Am Namitag am 3 hets namal en Untersuäch gä und namal e Viertel Tablettä. Gägä Abig het s Mami immer regelmässigeri Wehä gha. Nachem Znacht ischs scho so starch gsi dass sie het welä is Gebärzimmer ga.
D Hebammä het namal untersuecht und isch ganz fescht verschrockä. Vor allem het sie em Mami uh weh gmacht so dass sie het müässä brüälä. De GMH isch ganz wiit hinä gsi und so hert dass es em Mami und mier weh gmacht het.
S Mami het id Badwannä welä aber i dem Moment isch e anderi Frau cho wo scho wiiter gsi isch wo au id Badwannä het welä und denn hends halt em Mami gseit sie müässi no wartä.
Aber em Mami isch nümä wohl gsi, sie het so fescht weh gha dass d Hebammä gseit het dass dr einzig Weg zum ez no vorwärts cho e PDA segi. Ds Mami isch überhaupt nid begeisteret gsi vo derä Idee, sie und de Daddy hend lang gredet gha was söled machä. Aber denn hend sie sich doch entschidä zum d PDA machä, will d Hebammä het gseit s Mami chöni sich denn chli besser entspannä und vilicht werdi denn alles chli weicher.

Es isch ez öpä 9ni am Abig: Also isch de Anästesischt cho und het em Mami gseit sie müessi en runde Ruggä machä. Sie hets probiert, aber d Wehä sind so starch gsi dases fasch unmöglich gsi isch. De Daddy isch di ganz Ziit näbedraghocket und het em Mami d Hand ghebet. Sie het afangä brüälä wills so unagnehm gsi isch. Es isch au so hecktisch gsi will immer wieder e anderi Hebammä inägrännt isch zum öpis für di ander Frau go holä. S Mami het sich nümä wohl gfühlt.
Endlich isch diä PDA gmacht gsi, s Mami het s Medi übercho und het sich beruhigt. D Wehä het si zwar no biz gspürt aber es het nümä weh gmacht.

13.Januar
Um Mitternacht: het d Hebammä namal untersuecht und gseh dass de Muetermund 5 cm offä und de GMH isch aber immer no steihert und sehr wiit hinä.
S Mami het welä schlafä, de Daddy au. D Hebammä het denn gseit sie sprüzi namal Medi und richti em Daddy es Bett und denn kontrollieri sie am Morge namal.

Morge am 5i: S Mami isch verwachet, es het irä und mier guet tuä zum chli ruäbä. I han nämli immer dä Druck gspürt vo de Wehä.
D Hebammä het namal kontrolliert wiäs usgseht. Es isch kei Veränderig sichtbar gsi. S Mami isch ganz verzwiiflet gsi. Sie het so Angst übercho, dass alles mitemä Kaiserschnitt ändet. Und das isch s letschtä gsi wo sie und de Daddy hend wellä.
Zum Glück isch Schichtwechsel gsi, ez isch di nett Hebammä wieder cho. S Mami het zmorgä wellä aber sie het kei dörfä ha wills no unsicher gsi isch öbs KS git.
D Hebammä und de Dokter hend sich müässä besprächä was ez wiiter passiert.
S Mami isch so belämmeret gsi vom Medi und Müädigkeit dass irä alles egal gsi isch so lang dases kein KS git!
Mier isches di ganz Ziit über super gangä, mis Herz het d Wehä guät gmeisteret, das het em Mami Muet gä. Und au de Dokter und d Hebammä hend gseit so langs mier guet gaht gebis kein KS wenn s Mami weti wiitermachä. Denn het sie gseit sie welli öpis ässä und denn chöni sie wiitermachä. Also het sie doch no Zmorgä übercho.
Irgedwenn het d Hebammä gseit sie weli s Mami an Wehätropf henkä zum mal richtig Druck uf de Muetermund gä und weg de PDA het s Mami d Wehä au nid gmerkt.

9i am Morge:
D Wehä sind jetzt richtig starch und i ganz kurzä Abständ cho. Irgedwiä het s Mami aber s Gfühl gha dass mit de PDA öpis nid stimmt.
De Daddy isch hei go duschä also het sie ihn für en Moment nid gha als Unterstützig, wo er am 10ni wieder cho isch het s Mami so starchi Schmerzä gha im Buuch dass de Anästesischt namal het müässä cho. De het namal Medi gsprüzt aber das het em Mami nu d Bei betäubt. Sie het d Wehä immer no gspürt. also hets halt es stärchers Medi gä. Mier isches immer no guät gangä. S Mami het endlich kei Schmerzä meh gha aber isch ufemä komplett anderä Planet gsi wo all denä Medis und Müädigkeit.
Irgedwenn het d Hebammä namal untersuächt und gseit ez chöni sie de Kopf gspürä wiäner abächem mit jedem Weh, de Muetermund segi 7 cm offä und wenn s Mami es Weh heg segi nu no en Saum zgspürä.
Denn isch alles ganz schnell gangä, s Mami het namal Chraft gsammlet und het plötzlich nu no wellä pressä.
Aber denn het d Hebammä gseit dass i reagieri, das heisst mini Herztön sind abä bi de Wehä. S Mami und Daddy hend ghofft dass es jetzt nid doch no imä KS ändet.
De Dokter isch cho und het s Mami au no untersuecht und het gseit sie dörfi prässä.
I han aber irgedwiä nid wellä wiiterabächo. Denn het de Dokter gseit dass em Mami ires Becki für min grossi Chopf es bizli z chli seg, er müässi mit de Suuggloggä nahälfä. Er het s Mami und de Daddy gfröget öb das in Ordnig isch und s Mami het nu gschreit, dass sie alles in Chauf nämi wenn i doch nu endlich chem ohni KS!
S Mami weiss nümä rächt was eigentlich passiert isch...i bin plötzlich da gsi. De Daddy het Tränä gha und s Mami isch eifach nu erliechteret gsi. De Daddy het mini Nabelschnuer durägschnittä und denn hani dörfä zum Mami uf de Buuch. Sie het mi ganz komisch aglueget. D Plazenta isch ganz schnell usächo und de Daddy het sie aglueget. S Mami het sie nid welä gseh. De Dokter het em Mami no de Damm gnäht will er het ja müässä schniide damit er überhaupt mit de Glogge zu mim Chopf herächo isch.

S Mami het de Moment mit mier ufem Buch gar nid richtig chönä gnüssä will sie immer no belämmeret gsi isch vo de Medis. D Bei het sie au immer nonid gspürt.
Denn het sie mi zum Daddy geh und isch iigschlafä.
Wo sie denn endlich wieder verwachet isch bini scho agleit gsi und z Zmittag für s Mami isch parat gstandä.
S Mami het zerscht müässä frögä um Weli Ziit dass i überhaupt geborä bin und wiä gross und schwer i bin. De Namä het de Daddy scho gseit und s Mami het no müässä en Zättel unterschriibä zum de Namä offiziell machä.

Mini offiziellä Geburtsdatä sind also:
Ziischtig, 13. Januar 2009, 12.30 Uhr
51cm lang, 3310 g schwer und min Chopfumfang isch 35 cm

S Mami het denn bald mal dörfä is Zimmer überä und i bin denn grad na cho.
Mier hend beidi zerscht müässä ä Rundi schlafä.
Und die 4 täg im Spital sind so schnell umä gsi und mier hends beidi nid richtig chönä gnüssä. Es het nämli am 12. Januar no 4 anderi Meitli gä, darum ischs au so hektisch gsi und es het niemer meh als 5 Minutä Ziit für üs gha.
Sobald mier dähei gsi sind hets am Mami glaub ersch rächt gschaltä was passiert isch und sie aber au i hend halt scho no chli z gnagä. Aber i bin ja so en liäbä Schatz dass s Mami sich guet chan erholä und mier beidi über d Geburt chönd afangä positiv denkä.

Nachtrag: De Dokter und d Hebamme hend em Mami em Tag nach miner Geburt no gseit, dass es einigi Moment ge heg wo sie zwiiflet hegend öbs normal chan wiiterga. Aber sie hegend gmerkt wiä sehr s Mami weti dasi uf "normalem" Weg chumä unds mier immer guet gangä isch und sie darum au starch gsi seg - au wenn nur unbewusst vilicht. Zudem het de Dokter gseit dass mini Nabelschnuer sehr churz gsi isch und i darum nid han welä richtig is Becki rutschä.

so das isches gsi vo mier ez will s Mami no öpis sägä. Liebi Grüässli Emily Christina


Liebi Emily:
Mier hends nid eifach gha, aber weni di aluägä fühli mi wohl. I bin so glücklich!!! Du bisch so wunderschön und i bin froh hemmer de Daddy gha wo üs so wunderbar biigstandä isch. De arm Ma het Schulteräweh gha will i so a sim Arm grissä ha.
I möchti dier eifach sägä wiä liäb i di han und wiä dankbar i dier bin dass mier di dörfed ha!

Dis Mami

To my darling husband
You mean everything to me! Thank you for standing by me every second of the long and difficult birth of our Princess Emily!
We wouldn't have managed without you, Honey!
I love you!

[CoolBlue]

wow.... das isch den schö gschriebe!

gratulation zu eure prinzessin!

[Manasota]

Gratuliere zu eurer princess!!
Das hat mich ganz stark an meine Geburt erinnert, nur das ich am Schluss den KS brauchte .

Euch wünsche euch 3 einen guten Start!

[schoggimüsli]

Gratuliere zu eurer Prinzessin Emily.
schön gschriebe

[schnüseli]

Ui, das war ein schwieriges Geburtserlebnis! Erinnert mich auch etwas an die Geburt von meiner Tochter... Ich hoffe, dass du das Ganze mit der Zeit gut verarbeiten kannst. Wünsche euch eine schöne Kennenlernzeit zusammen!

[leoja07]

hallo eva,
dina geburtsbricht isch so mega schön gschriba, ha gra träne in da auga.

wünscha eu nomal alles guati mit eurea tochter und das ihr di geburt bald amal verarbeite chönd. i chan nu vo miar reda, aber mit dr zit, vergisst ma dschmerza und dia sache wo nid so schön gsi sind und ma denkt nuno ans positiva.
liabs grüassli
leoja

[schlingel]

danke für den spannenden Geburtsbericht. Ich bin echt froh, dass alles gut ausgegangen ist und ihr euren kleinen Engel nun habt. Ich wünsche euch von Herzen alles Liebe und viel Freude zusammen.

[swissalicious]

Han nu schnell welä dankä sägä für diä liäbä postings!!!

Mier hets grad guat tua woni de bricht gschribä ha zums selber biz verarbeitä.

[Trochantor]

isch schön gschribe de geburtsbricht und find i herzig, dass us sich vo dinere tochter gschribe isch. Wünsch dir und dinere familie alles gute und viel kraft zum das erlebti verarbeite

[Lulu74]

wow sehr schön und idrücklich gschriba!!!
i hoffa, es goht eu guat und ier gnüsseds und du hesch dini geburt bitz chönna verarbeita!

meld mi no per pn.

liebs grüessli
lulu

[rula]

So schön geschrieben! Auch ich erkenne einiges in meinen Geburten wieder, kann Dir gut nachfühlen dass Du noch daran zu knabbern hast. Lass Dir dazu Zeit!

Alles, alles Liebe
rula

[swiss_scouser]

wow, we wish you and your husband all the best! congrats to the birth of your princess emily!!! im sure you are gonna have a wonderfull time after that difficult start!
enjoy every second with your princess, the time goes by so fast (lol jason is 11 weeks old now!! )

take care!